कोलकाता येथील ईडन गार्डन्स मैदानावर खेळल्या गेलेल्या कोलकाता नाइट रायडर्स आणि लखनऊ सुपर जायंट्स यांच्यातील सामन्यात लखनऊने अखेरच्या चेंडूवर 3 विकेट्सने विजय मिळवला. या विजयासह लखनऊने सलग दुसरा विजय नोंदवला.
कोलकाताने प्रथम फलंदाजी करत 20 षटकांत 4 बाद 181 धावा केल्या. कर्णधार अजिंक्य रहाणे यांनी 41 धावा तर यष्टिरक्षक अंगकृष रघुवंशी यांनी 45 धावा केल्या. या दोघांमध्ये दुसऱ्या विकेटसाठी 85 धावांची भागीदारी झाली. मात्र त्यांच्या बाद झाल्यानंतर मधल्या फळीत मोठी धावसंख्या उभारण्यात अपयश आले. सुनील नारायणच्या पुनरागमनानंतरही संघाला गती राखता आली नाही, तर रिंकू सिंगही मोठी खेळी करू शकला नाही.
डेथ ओव्हर्समध्ये लखनऊच्या गोलंदाजांनी नियंत्रण राखले. मोहम्मद शमी यांनी 4 षटकांत 27 धावा देत दबाव निर्माण केला, जरी त्यांना विकेट मिळाली नाही. एम. सिद्धार्थ आणि दिग्वेश सिंह राठी यांनी महत्त्वाच्या विकेट्स घेतल्या.
182 धावांच्या लक्ष्याचा पाठलाग करताना लखनऊची सुरुवात वेगवान झाली. मिचेल मार्श आणि एडेन मार्करम यांनी पहिल्या विकेटसाठी 41 धावा जोडल्या. मात्र पाचव्या षटकात दोघे बाद झाल्याने संघावर दबाव आला. मार्करमने 22 धावा तर मार्शने 15 धावा केल्या.
कर्णधार ऋषभ पंत 10 धावांवर बाद झाला, तर निकोलस पूरनने 13 धावा केल्या. सलग पडणाऱ्या विकेट्समुळे लखनऊची स्थिती कठीण झाली.
या परिस्थितीत आयुष बदोनीने 34 चेंडूत 54 धावांची खेळी करत संघाला स्थिरता दिली. त्याच्या बाद झाल्यानंतर सामना कोलकाताच्या बाजूने झुकत असल्याचे दिसत होते. मात्र सातव्या क्रमांकावर फलंदाजीला आलेल्या मुकुल चौधरीने 27 चेंडूत नाबाद 54 धावा करत सामन्याचा निकाल बदलला.
त्याच्या खेळीत 2 चौकार आणि 7 षटकारांचा समावेश होता. अखेरच्या चेंडूवर लखनऊने विजय मिळवला. या कामगिरीसाठी मुकुल चौधरी याला सामनावीर पुरस्कार देण्यात आला. कोलकाताला या हंगामातील आणखी एक पराभव स्वीकारावा लागला असून संघ अद्याप विजय नोंदवू शकलेला नाही.
