ଟି20 ୱର୍ଲ୍ଡ କପ୍ 2026ର ଟ୍ରୋଫି ବୁଧବାର, ଫେବୃଆରୀ 4 ତାରିଖରେ ନୋଏଡାସ୍ଥିତ କାର୍ଯ୍ୟାଳୟକୁ ପହଞ୍ଚିଛି। ଏହି ଟୁର୍ଣ୍ଣାମେଣ୍ଟ ଫେବୃଆରୀ 7 ତାରିଖରୁ ଆରମ୍ଭ ହେବ, ଯେଉଁଥିରେ 20ଟି ଦଳ ଅଂଶଗ୍ରହଣ କରୁଛନ୍ତି ଏବଂ ସେମାନଙ୍କୁ ଚାରିଟି ଗୋଷ୍ଠୀରେ ବିଭକ୍ତ କରାଯାଇଛି।
ଟି20 ୱର୍ଲ୍ଡ କପ୍ ଟ୍ରୋଫି ପ୍ରତ୍ୟେକ ସଂସ୍କରଣରେ କ୍ରିକେଟ୍ ପ୍ରେମୀମାନଙ୍କ ପାଇଁ ମୁଖ୍ୟ ଆକର୍ଷଣ ରହିଆସିଛି। 2026 ସଂସ୍କରଣର ଟ୍ରୋଫି ମଧ୍ୟ ସେହି କ୍ରମରେ ନୋଏଡାକୁ ଆଣାଯାଇଛି।
ଆଇସିସି ପୁରୁଷ ଟି20 ୱର୍ଲ୍ଡ କପ୍ ଟ୍ରୋଫି ତିଆରି କରିବା ପାଇଁ ପାଞ୍ଚଟି ଭିନ୍ନ ଧାତୁ ବ୍ୟବହାର କରାଯାଇଛି। ଏହାର ଆଧାର ଭାଗ ସିଲଭର୍ ପ୍ଲେଟ୍ରୁ ତିଆରି। ସମ୍ପୂର୍ଣ୍ଣ ଟ୍ରୋଫି ଉଜ୍ଜ୍ୱଳ ଥିବାରୁ ଦୂରରୁ ଦେଖିଲେ ଚାଁଦି ପରି ଲାଗେ। ଏହି ଟ୍ରୋଫିକୁ ଲଣ୍ଡନ୍ରେ ଥିବା ଗୋଟିଏ ପ୍ରମୁଖ କମ୍ପାନୀ ଡିଜାଇନ୍ କରି ତିଆରି କରିଛି। ସେହି କମ୍ପାନୀ 2021ରେ ଏହି ଟ୍ରୋଫି ପ୍ରସ୍ତୁତ କରିଥିଲା ଏବଂ ସେଇ କମ୍ପାନୀ ଆଇସିସି ୱର୍ଲ୍ଡ ଟେଷ୍ଟ ଚାମ୍ପିଅନ୍ସିପ୍ ଟ୍ରୋଫି (ଗଦା) ମଧ୍ୟ ତିଆରି କରିଥିଲା।
ଟ୍ରୋଫିର ଡିଜାଇନ୍ରେ ଆଧୁନିକତା ଏବଂ ପାରମ୍ପରିକ ଶୈଳୀକୁ ଏକତ୍ର କରାଯାଇଛି। ଏହାର ଗଠନ, ଆକାର ଓ ଉଜ୍ଜ୍ୱଳତା ଟୁର୍ଣ୍ଣାମେଣ୍ଟର ଗରିମାକୁ ଆହୁରି ବଢ଼ାଏ।
ଟି20 ୱର୍ଲ୍ଡ କପ୍ ଟ୍ରୋଫିର ଓଜନ ପ୍ରାରମ୍ଭରେ ପ୍ରାୟ 12 କିଲୋଗ୍ରାମ୍ ଥିଲା। କିନ୍ତୁ 2021ରୁ ପୁରୁଷ ଟି20 ୱର୍ଲ୍ଡ କପ୍ ଟ୍ରୋଫିକୁ ହାଲୁକା କରାଯାଇ ଏହାର ଓଜନ ପ୍ରାୟ 3.9 କିଲୋଗ୍ରାମ୍ କରାଯାଇଛି। ଟ୍ରୋଫିର ଉଚ୍ଚତା 51 ସେଣ୍ଟିମିଟର୍।
ଟ୍ରୋଫିର ମୂଲ୍ୟ ସମ୍ପର୍କରେ ଆଇସିସି କିମ୍ବା ଟ୍ରୋଫି ତିଆରି କରିଥିବା କମ୍ପାନୀ କେବେ ବି ସାର୍ବଜନୀନ କରିନାହାନ୍ତି। ଏହାର ମୂଲ୍ୟ ବହୁତ ଅଧିକ ବୋଲି ଧାରଣା କରାଯାଏ, କିନ୍ତୁ ପ୍ରକୃତ ମୂଲ୍ୟ ଗୋପନ ରଖାଯାଇଛି।
କୌଣସି ଚାମ୍ପିଅନ୍ ଦଳକୁ ମୂଳ ଟ୍ରୋଫି ଦିଆଯାଏ ନାହିଁ। ଆଇସିସି ମୂଳ ଟ୍ରୋଫିକୁ ତାଙ୍କର ପ୍ରଧାନ କାର୍ଯ୍ୟାଳୟରେ ସୁରକ୍ଷିତ ଭାବେ ରଖେ ଏବଂ ବିଜେତା ଦଳକୁ ଟ୍ରୋଫିର ପ୍ରତିରୂପ ମାତ୍ର ପ୍ରଦାନ କରାଯାଏ। ଆଇସିସିର ପ୍ରଧାନ କାର୍ଯ୍ୟାଳୟ ଦୁବାଇରେ ଅବସ୍ଥିତ ଏବଂ ଟ୍ରୋଫି ସଦା ସେଠାରେ ରଖାଯାଏ।
