ଚାଇନାରେ AI ଚିପ୍ ରପ୍ତାନୀ ଉପରେ ରୋଲିଂ ଟେନିକାଲ୍ ଥ୍ରେସହୋଲ୍ଡ (RTT) ନୀତି ଲାଗୁ କରିବା ପାଇଁ ଆମେରିକା ବିଶେଷ ସଂସଦୀୟ କମିଟିର ଅଧ୍ୟକ୍ଷ ତଥା ମିଚିଗାନ୍ ରିପବ୍ଲିକାନ୍ ପ୍ରତିନିଧୀ ଜନ୍ ମଲ୍ଲିନାର୍, ବାଣିଜ୍ୟ ସଚିବ ହୋୱାର୍ଡ ଲୁଟ୍ନିକ୍ଙ୍କୁ ଏକ ଚିଠି ଲେଖିଛନ୍ତି।
ୱାଶିଂଟନ୍: ଆମେରିକା ଏବଂ ଚାଇନା ମଧ୍ୟରେ ଟେକ୍ନୋଲୋଜିକାଲ୍ ଆଧିପତ୍ୟ ପାଇଁ ସଂଘର୍ଷ ଏକ ନୂତନ ସ୍ତରରେ ପହଞ୍ଚିଛି। ଆମେରିକା ସଂସଦୀୟ ବିଶେଷ କମିଟିର ଅଧ୍ୟକ୍ଷ ତଥା ମିଚିଗାନ୍ ରିପବ୍ଲିକାନ୍ ପ୍ରତିନିଧୀ ଜନ୍ ମଲ୍ଲିନାର୍, ଚାଇନାକୁ AI (ଆର୍ଟିଫିସିଆଲ୍ ଇଣ୍ଟେଲିଜେନ୍ସ) ଚିପ୍ ରପ୍ତାନୀ ଉପରେ କଠୋର ପଦକ୍ଷେପ ଗ୍ରହଣ କରିବା ପାଇଁ ସୁପାରିଶ କରିଛନ୍ତି। ସେ ବାଣିଜ୍ୟ ସଚିବ ହୋୱାର୍ଡ ଲୁଟ୍ନିକ୍ଙ୍କୁ ଲେଖିଥିବା ଏକ ଚିଠିରେ ଚାଇନାକୁ AI ଚିପ୍ ରପ୍ତାନୀ ଉପରେ "ରୋଲିଂ ଟେନିକାଲ୍ ଥ୍ରେସହୋଲ୍ଡ" (RTT) ନୀତି ଲାଗୁ କରିବାକୁ ଅନୁରୋଧ କରିଛନ୍ତି।
ଏହି ନୀତିର ଲକ୍ଷ୍ୟ ସ୍ପଷ୍ଟ: ଚାଇନାର AI କମ୍ପ୍ୟୁଟିଂ କ୍ଷମତାକୁ ଆମେରିକାର ୧୦% ରେ ସୀମିତ ରଖିବା, ଫଳରେ ଦୀର୍ଘକାଳ ଧରି ଟେକ୍ନୋଲୋଜିରେ ଆମେରିକାର ଆଧିପତ୍ୟ ବଜାୟ ରଖିବା।
RTT ନୀତି କ'ଣ?
ରୋଲିଂ ଟେନିକାଲ୍ ଥ୍ରେସହୋଲ୍ଡ ନୀତି ଅନୁଯାୟୀ, ଚାଇନାରେ ସ୍ୱଦେଶୀ ଭାବରେ ନିର୍ମିତ ଚିପ୍ଗୁଡ଼ିକ ଠାରୁ କମ୍ କ୍ଷମତା ସମ୍ପନ୍ନ AI ଚିପ୍ଗୁଡ଼ିକ ହିଁ ଚାଇନାକୁ ରପ୍ତାନୀ କରାଯିବ। ଏହାର ଅର୍ଥ ହେଲା, ଆମେରିକା ଚାଇନାକୁ ସର୍ବାଧୁନିକ ଟେକ୍ନୋଲୋଜିରେ ସମ୍ପୂର୍ଣ୍ଣ ପ୍ରବେଶ ଦେବ ନାହିଁ। ଏହା ଚାଇନାର କ୍ଷମତାକୁ ସୀମିତ କରିବ ଏବଂ ଆମେରିକାର ଟେକ୍ନୋଲୋଜି ଉପରେ ନିର୍ଭରଶୀଳ କରାଇବ।
ଆମେରିକା ଏବଂ ଏହାର ସହଯୋଗୀ ଦେଶଗୁଡ଼ିକର ସମାନ ଉନ୍ନତ AI ମଡେଲଗୁଡ଼ିକ ଚାଇନା ନିଜେ ବିକଶିତ କରିପାରିବ ନାହିଁ ବୋଲି ଆମେରିକା ନିଶ୍ଚିତ କରୁଛି। ଆମେରିକା ତୁଳନାରେ ଚାଇନାର ମୋଟ AI କମ୍ପ୍ୟୁଟିଂ ଶକ୍ତି ମାତ୍ର ୧୦% ରହିବ। ଆମେରିକୀୟ ଟେକ୍ କମ୍ପାନୀଗୁଡ଼ିକୁ ଚାଇନାକୁ ରପ୍ତାନୀ କରାଯାଉଥିବା ଚିପ୍ଗୁଡ଼ିକ "କଟ୍-ଅଫ୍ ଲେଭଲ୍" ଉପରେ ନ ରଖିବାକୁ ନିର୍ଦ୍ଦେଶ ଦିଆଯିବ।
ଚାଇନାକୁ କାହିଁକି ନିୟନ୍ତ୍ରଣ କରାଯିବା ଉଚିତ୍?
ଜନ୍ ମଲ୍ଲିନାର୍ଙ୍କ ଅନୁଯାୟୀ, ଟେକ୍ନୋଲୋଜିରେ ଚାଇନାର ଅଗ୍ରଗତି ଆମେରିକା ଏବଂ ଏହାର ସହଯୋଗୀ ଦେଶମାନଙ୍କ ପାଇଁ ବିପଜ୍ଜନକ। ସେ ତାଙ୍କ ଚିଠିରେ ଉଲ୍ଲେଖ କରିଛନ୍ତି ଯେ, ଚାଇନା ନିଜର ସାମରିକ କ୍ଷମତା ବୃଦ୍ଧି କରିବା ସହିତ ରୁଷିଆ, ଇରାନ ଏବଂ ଅନ୍ୟ ଶତ୍ରୁ ଦେଶମାନଙ୍କ ସହ ଟେକ୍ନୋଲୋଜି ବାଣ୍ଟୁଛି। ଏହା ଆମେରିକା ଏବଂ ଏହାର ସହଯୋଗୀ ଦେଶମାନଙ୍କ ସୁରକ୍ଷା ପାଇଁ ବିପଦ ସୃଷ୍ଟି କରିବ।
ଏପ୍ରିଲ୍ ୨୦୨୫ ରେ ସଂସଦୀୟ କମିଟି ଦ୍ୱାରା ପ୍ରକାଶିତ ଏକ 'ଡିପ୍ସିକ୍' ରିପୋର୍ଟରେ ଉଲ୍ଲେଖ କରାଯାଇଛି ଯେ, ଆମେରିକୀୟ କମ୍ପାନୀ Nvidia ର H20 ଭଳି ଚିପ୍ଗୁଡ଼ିକ ଚାଇନାରେ ବିକଶିତ AI ମଡେଲ R1 ର ନିର୍ମାଣରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ଏହି ମଡେଲଟି ଚାଇନାର ସାମରିକ ବାହିନୀ ପାଇଁ ବିକଶିତ କରାଯାଇଛି, ଯାହାକି ଭବିଷ୍ୟତରେ AI- ଆଧାରିତ ସାମରିକ ଡ୍ରୋନ୍, ଇଲେକ୍ଟ୍ରୋନିକ୍ ୱାରଫେୟାର୍ ସିଷ୍ଟମ୍ ଏବଂ ଅଟୋନୋମସ୍ ଅସ୍ତ୍ରଶସ୍ତ୍ରରେ ବ୍ୟବହୃତ ହୋଇପାରେ। ମଲ୍ଲିନାର୍ ଚେତାବନୀ ଦେଇଛନ୍ତି ଯେ, ଚାଇନା ଯଦି ଏହିଭଳି ଡ୍ରୋନ୍ ଇରାନକୁ ବିକ୍ରି କରେ, ତେବେ ତାହା ଆମେରିକା-ଇସ୍ରାଏଲ୍ ସେନା ପାଇଁ ଏକ ଗମ୍ଭୀର ଚ୍ୟାଲେଞ୍ଜ୍ ହେବ।
AI ଟେକ୍ନୋଲୋଜି ଏବଂ ବିଶ୍ୱ ସୁରକ୍ଷା
ଆମେରିକାର ଚିନ୍ତା କେବଳ ଆର୍ଥିକ କ୍ଷେତ୍ରରେ ନୁହେଁ, ବରଂ ସୁରକ୍ଷା ଏବଂ କୂଟନୈତିକ ସମ୍ପର୍କ ଉପରେ ମଧ୍ୟ କେନ୍ଦ୍ରିତ। AI, କ୍ୱାଣ୍ଟମ୍ କମ୍ପ୍ୟୁଟିଂ ଏବଂ ସେମିକଣ୍ଡକ୍ଟରଗୁଡ଼ିକ ବର୍ତ୍ତମାନ କେବଳ ବାଣିଜ୍ୟିକ ବସ୍ତୁ ନୁହେଁ, ବରଂ ଜାତୀୟ ସୁରକ୍ଷା ଏବଂ ବିଶ୍ୱ ପ୍ରଭାବର ମୂଳଦୁଆ ହୋଇପାରିଛି। ମଲ୍ଲିନାର୍ଙ୍କ ମତରେ, ଚାଇନା ଉନ୍ନତ AI ଟେକ୍ନୋଲୋଜି ହାସଲ କଲେ, ତାହା ନିଜର ଭୌଗୋଳିକ-ରାଜନୈତିକ ସ୍ୱାର୍ଥ ଏବଂ ସାମରିକ ବିସ୍ତାର ପାଇଁ ବ୍ୟବହାର କରିବ।
ବିଶେଷ ଭାବରେ ଇରାନ, ରୁଷିଆ ଭଳି ଦେଶମାନଙ୍କ ସହ ଚାଇନାର ନିକଟତା ଏହି ବିପଦକୁ ବଢାଇ ଦେଇଛି। ଚାଇନାକୁ AI ଚିପ୍ ରପ୍ତାନୀ ସମ୍ପର୍କରେ ଆମେରିକୀୟ ପ୍ରତିନିଧୀମାନେ ଚିନ୍ତା ପ୍ରକାଶ କରିବା ଏହା ପ୍ରଥମ ଥର ନୁହେଁ। ଗତ ମାସରେ, Nvidia ଚାଇନାକୁ H20 ଚିପ୍ ରପ୍ତାନୀ କରିବା ପ୍ରସଙ୍ଗରେ ଜନ୍ ମଲ୍ଲିନାର୍ ଅସନ୍ତୋଷ ପ୍ରକାଶ କରିଥିଲେ। ସେ କହିଥିଲେ ଯେ, ଏହିଭଳି ଉନ୍ନତ ଚିପ୍ଗୁଡ଼ିକ ଚାଇନା ନିଜେ ବିକଶିତ କରିପାରିବ ନାହିଁ ଏବଂ ଆମେରିକୀୟ କମ୍ପାନୀଗୁଡ଼ିକ ଏହା ରପ୍ତାନୀ କରିବା ଜାତୀୟ ସୁରକ୍ଷା ପାଇଁ ବିପଦ।
