ભારતીય ક્રિકેટ કન્ટ્રોલ બોર્ડ (BCCI) સંબંધિત એક જૂના મામલે પૂર્વ કેન્દ્રીય મંત્રી અને BCCIના ભૂતપૂર્વ અધ્યક્ષ અનુરાગ ઠાકુરે સુપ્રીમ કોર્ટમાં અરજી દાખલ કરી છે. તેમણે 2 જાન્યુઆરી 2017ના સુપ્રીમ કોર્ટના આદેશમાં સુધારો માગ્યો છે, જેમાં તેમને તાત્કાલિક અસરથી BCCIના કાર્યમાંથી પોતાને અલગ રાખવાનો નિર્દેશ આપવામાં આવ્યો હતો.
અનુરાગ ઠાકુરની અરજી પર મુખ્ય ન્યાયાધીશ (CJI) સૂર્ય કાંત અને ન્યાયમૂર્તિ જયમાલ્યા બાગચીની ખંડપીઠે સુનાવણી કરી અને આ મામલે બે અઠવાડિયા બાદ સુનાવણી કરવાનો નિર્ણય કર્યો. અરજીકર્તા તરફથી હાજર વરિષ્ઠ વકીલ પી.એસ. પટવાલિયાએ કોર્ટને જણાવ્યું કે 2017નો આદેશ અનુરાગ ઠાકુરને સાંભળ્યા વિના પસાર કરવામાં આવ્યો હતો.
કોર્ટને જાણ કરાયું કે 2 જાન્યુઆરી 2017ના આદેશ દ્વારા અનુરાગ ઠાકુરને તાત્કાલિક અસરથી BCCIના કામકાજથી દૂર રહેવા જણાવ્યું હતું અને તેમની સામે અવમાનના તથા ખોટી સાક્ષી (પરજરી) અંગે કાર્યવાહી પણ શરૂ કરવામાં આવી હતી. આ કાર્યવાહી BCCIની સ્વાયત્તતા મુદ્દે તત્કાલીન ICC અધ્યક્ષ શશાંક મનોહરને લખાયેલા પત્ર સંબંધિત કથિત ખોટા હલફનામા અંગે હતી.
અનુરાગ ઠાકુર તરફથી રજૂ કરવામાં આવ્યું કે બાદમાં સુપ્રીમ કોર્ટે તેમની સામે શરૂ કરાયેલી અવમાનના અને પરજરીની કાર્યવાહી સમાપ્ત કરી દીધી હતી. તેમ છતાં, BCCIના મામલાઓથી દૂર રહેવાનો નિર્દેશ હજુ પણ અમલમાં છે, જેના સંદર્ભમાં હાલની અરજી દ્વારા સુધારાની માંગ કરવામાં આવી છે.
વરિષ્ઠ વકીલ પટવાલિયાએ દલીલ કરી કે જ્યારે અવમાનના અને પરજરીની કાર્યવાહી સમાપ્ત થઈ ચૂકી છે, ત્યારે BCCIના કામકાજથી દૂર રહેવા સંબંધિત ‘સીજ એન્ડ ડિસિસ્ટ’ પ્રકારના નિર્દેશને ચાલુ રાખવું યોગ્ય નથી અને આદેશમાં સુધારો થવો જોઈએ.
ખંડપીઠે આ દલીલો પર વિચાર કર્યા બાદ જણાવ્યું કે આ અરજી પર બે અઠવાડિયા બાદ સુનાવણી હાથ ધરવામાં આવશે. કોર્ટએ વધુમાં સ્પષ્ટ કર્યું કે BCCI સંબંધિત અન્ય તમામ બાકી અરજીઓ અને મામલાઓ પર ત્રણ અઠવાડિયા બાદ વિચાર કરવામાં આવશે.
આ મામલે નિમણૂક કરાયેલા અમિકસ ક્યુરી, વરિષ્ઠ વકીલ મનીંદર સિંહને પણ નિર્દેશ આપવામાં આવ્યા. સુપ્રીમ કોર્ટે તેમને BCCI સંબંધિત તમામ હસ્તક્ષેપ અને અંતરિમ અરજીઓને મુદ્દાવાર રીતે અલગ કરી સુવ્યવસ્થિત રૂપે કોર્ટ સમક્ષ રજૂ કરવા જણાવ્યું, જેથી સુનાવણીમાં સુવિધા રહે.
