હોલીવુડના જાણીતા અભિનેતા અને બે વારના ઓસ્કાર વિજેતા જીન હેકમેનનું ૯૫ વર્ષની ઉંમરે તેમના ઘરે મૃત્યુ થયું છે. તેમની પત્ની બેટ્સી અરાકાવાનું મૃતદેહ પણ ઘરના અલગ રૂમમાં મળી આવ્યું છે, જેના કારણે આ મામલો વધુ રહસ્યમય બન્યો છે. ન્યૂ મેક્સિકો સ્થિત તેમના નિવાસસ્થાને જ્યારે પોલીસ પહોંચી, ત્યારે બંનેના મૃતદેહ અલગ-અલગ રૂમમાં હતા, અને પ્રારંભિક તપાસમાં કોઈ કાવતરાની શંકા વ્યક્ત કરવામાં આવી નથી.
હોલીવુડને મોટો આંચકો
જીન હેકમેન, જેમણે ‘ધ ફ્રેન્ચ કનેક્શન’ અને ‘અનફોર્ગિવન’ જેવી ફિલ્મોમાં તેમના દમદાર અભિનયથી ઓસ્કાર જીત્યા હતા, હોલીવુડના સૌથી પ્રતિષ્ઠિત અભિનેતાઓમાંના એક હતા. ૧૯૬૦ ના દાયકાથી લઈને તેમના અભિનય કારકિર્દીના અંત સુધી તેમણે અસંખ્ય યાદગાર પાત્રો ભજવ્યા. ‘સુપરમેન’માં તેમણે ભજવેલું ખલનાયક લેક્ષ લુથરનું પાત્ર પણ ખૂબ સરાહવામાં આવ્યું હતું.
ઘરમાં મળી આવી શંકાસ્પદ પરિસ્થિતિ
સાંતા ફે કાઉન્ટી શેરિફ કાર્યાલયના પ્રવક્તા ડેનિસ એવિલાએ જણાવ્યું કે પોલીસને સ્થાનિક સમય અનુસાર બપોરે લગભગ ૧:૪૫ વાગ્યે જાણ કરવામાં આવી હતી. જ્યારે અધિકારીઓ પહોંચ્યા, ત્યારે હેકમેનનું મૃતદેહ એક રૂમમાં અને તેમની પત્ની બેટ્સી અરાકાવાનું મૃતદેહ બાથરૂમમાં મળી આવ્યું હતું. તેમની પાસેથી ખુલ્લી દવાની બોટલ અને છૂટા પડેલી ગોળીઓ પણ મળી આવી હતી.
જોકે, હજુ સુધી પોલીસે મૃત્યુના કારણોનો ખુલાસો કર્યો નથી અને તપાસ ચાલુ છે. અધિકારીઓનું કહેવું છે કે આ મામલામાં કોઈ ગુનો થયો હોવાના સંકેતો મળ્યા નથી, પરંતુ પરિસ્થિતિ સંપૂર્ણ રીતે સ્પષ્ટ થવામાં સમય લાગશે.
હોલીવુડ સ્ટાર્સની લાગણીઓ ઉભરાઈ
જીન હેકમેનના નિધનના સમાચારથી ફિલ્મ ઉદ્યોગ શોકમાં ગરકાવ થઈ ગયો છે. પ્રખ્યાત નિર્દેશક ફ્રાન્સિસ ફોર્ડ કોપોલા, જેમણે ‘ધ કન્વર્સેશન’માં તેમની સાથે કામ કર્યું હતું, તેમણે ઇન્સ્ટાગ્રામ પર લખ્યું, "એક મહાન કલાકારને ગુમાવવો હંમેશા શોક અને ઉત્સવ બંનેનું કારણ બને છે. જીન હેકમેન એક પ્રેરણાદાયક અભિનેતા હતા, જેમણે તેમના દરેક પાત્રમાં જીવ પૂર્યો હતો."
"જીન હેકમેન સ્ક્રીનના તે દુર્લભ દિગ્ગજોમાંના એક હતા, જે કોઈપણ પાત્રમાં સંપૂર્ણ રીતે ઢળી જતા હતા. તેમની ખોટ હંમેશા અમને ખૂબ જ અનુભવાશે, પરંતુ તેમની કલા હંમેશા જીવંત રહેશે."
યાદગાર કરિયરની ઝલક
જીન હેકમેને ૧૯૬૭ની ‘બોની એન્ડ ક્લાઇડ’થી જબરદસ્ત ઓળખ મેળવી હતી. તે પહેલાં તેમણે ઘણા નાના-મોટા રોલ કર્યા હતા, પરંતુ આ ફિલ્મ તેમના કરિયરનો ટર્નિંગ પોઇન્ટ સાબિત થઈ. તેમની શ્રેષ્ઠ ફિલ્મોમાં ‘ધ ફ્રેન્ચ કનેક્શન’, ‘અનફોર્ગિવન’, ‘હોસિયર્સ’, ‘મિસિસિપી બર્નિંગ’, ‘ધ કન્વર્સેશન’, ‘ધ રોયલ ટેનેનબોમ્સ’ જેવી શાનદાર કૃતિઓનો સમાવેશ થાય છે.
જીન હેકમેન માત્ર એક અભિનેતા નહીં, પરંતુ હોલીવુડના સુવર્ણકાળના પ્રતીક હતા. તેમના મૃત્યુથી ફિલ્મ જગતે એક મહાન પ્રતિભા ગુમાવી છે. જોકે તેમની ફિલ્મો અને પાત્રો દ્વારા તેઓ હંમેશા યાદ કરવામાં આવશે.
