પશ્ચિમ બંગાળ વિધાનસભામાં વિપક્ષના નેતાની નિમણૂક સંબંધિત વિવાદ હવે અદાલત સુધી પહોંચ્યો છે. આ મામલે કલકત્તા હાઈકોર્ટે કોઈ અંતરિમ આદેશ આપવાનો ઇનકાર કર્યો છે, જેના કારણે હાલ માટે વિધાનસભા અધ્યક્ષનો નિર્ણય યથાવત્ રહેશે.
ગુરુવાર, 18 જૂન 2026ના રોજ થયેલી સુનાવણી દરમિયાન જસ્ટિસ કૃષ્ણ રાવની બેન્ચે જણાવ્યું કે આ તબક્કે કોઈ અંતરિમ આદેશ પસાર કરવામાં આવશે નહીં. અદાલતે તમામ પક્ષોને બે અઠવાડિયામાં પોતાના જવાબો અને વાંધાઓ હલફનામા સ્વરૂપે દાખલ કરવાનો નિર્દેશ આપ્યો છે. મામલાની આગામી સુનાવણી 28 જુલાઈએ નિર્ધારિત કરવામાં આવી છે. હાઈકોર્ટના આ વલણ બાદ વિધાનસભા અધ્યક્ષ દ્વારા લેવાયેલો નિર્ણય હાલ માટે માન્ય રહેશે.
આ વિવાદ ત્યારે શરૂ થયો હતો જ્યારે વિપક્ષના નેતાના પદ માટે તૃણમૂલ કોંગ્રેસ (ટીએમસી)ની અંદરથી બે અલગ-અલગ નામો સામે આવ્યા હતા. પક્ષના એક ગૃપે શોભનદેબ ચટ્ટોપાધ્યાયના નામનો પ્રસ્તાવ મૂક્યો હતો, જ્યારે પક્ષના કથિત બાગી ધારાસભ્યોના જૂથે ઋતબ્રત બેનર્જીના નામને સમર્થન આપ્યું હતું. ત્યારબાદ વિધાનસભા અધ્યક્ષ બિમાન બેનર્જીએ ઋતબ્રત બેનર્જીના નામને સ્વીકારી તેમને વિપક્ષના નેતા તરીકે નિયુક્ત કર્યા હતા. આ નિર્ણય બાદ પક્ષની અંદર અસંતોષ વધ્યો અને મામલો અદાલત સુધી પહોંચ્યો.
સુનાવણી દરમિયાન અદાલતે અનેક મહત્વપૂર્ણ બંધારણીય અને પ્રક્રિયાત્મક પ્રશ્નો ઉઠાવ્યા હતા. અદાલતે પૂછ્યું કે જો એક જ રાજકીય પક્ષ બે અલગ-અલગ નામો મોકલે તો અધ્યક્ષે શું નિર્ણય લેવો જોઈએ. સાથે જ એ પણ પ્રશ્ન ઉઠાવ્યો કે નિર્ણય લેતા પહેલાં તમામ પક્ષોને સુનાવણીનો અવસર આપવો જરૂરી છે કે નહીં અને શું અધ્યક્ષ સ્વપ્રેરિત રીતે નિર્ણય લઈ શકે છે.
અધ્યક્ષ તરફથી હાજર વકીલે દલીલ કરી હતી કે વિધાનસભાના નિયમો અનુસાર વિપક્ષના નેતા તરીકે તે વ્યક્તિને માન્યતા આપવામાં આવે છે જે ગૃહમાં સૌથી મોટા વિપક્ષી પક્ષનું પ્રતિનિધિત્વ કરે છે. વધુમાં તેમણે જણાવ્યું કે આંતરિક વિવાદોમાં અધ્યક્ષનો નિર્ણય અંતિમ માનવામાં આવે છે.
મામલામાં વધુ એક વળાંક ત્યારે આવ્યો જ્યારે કેટલાક દસ્તાવેજો પર કથિત નકલી હસ્તાક્ષરના આક્ષેપો સામે આવ્યા. આ દસ્તાવેજો કથિત રીતે વિપક્ષના નેતાના નામંકન સાથે સંબંધિત હોવાનું જણાવાયું હતું. સૂત્રોના જણાવ્યા અનુસાર, ઋતબ્રત બેનર્જી અને અન્ય એક ધારાસભ્ય સંદીપન સાહાએ સૌથી પહેલાં આ હસ્તાક્ષરો અંગે પ્રશ્નો ઉઠાવ્યા હતા. ત્યારબાદ મામલો વિધાનસભા સચિવાલય સુધી પહોંચ્યો અને એક એફઆઈઆર નોંધવામાં આવી.
પશ્ચિમ બંગાળ સીઆઈડી (ક્રિમિનલ ઇન્વેસ્ટિગેશન ડિપાર્ટમેન્ટ)એ ત્યારબાદ ઔપચારિક તપાસ શરૂ કરી છે. તપાસના ભાગરૂપે સંબંધિત ધારાસભ્યોના નિવેદનો નોંધવામાં આવી રહ્યા છે અને હસ્તાક્ષરના નમૂનાઓ પણ એકત્રિત કરવામાં આવી રહ્યા છે.
