કેરળ વિધાનસભા ચૂંટણી 2026 માટે ભારતીય રાષ્ટ્રીય કોંગ્રેસે પોતાના ઉમેદવારોની બીજી યાદી જાહેર કરી છે, જેમાં કુલ 37 ઉમેદવારોના નામ સમાવેશ થાય છે. આ સાથે, પાર્ટીએ અત્યાર સુધી કુલ 92 બેઠકો પર પોતાના ઉમેદવારો નક્કી કર્યા છે.
પાર્ટીની અગાઉની યાદી 17 માર્ચે જાહેર કરવામાં આવી હતી, જેમાં 55 ઉમેદવારોના નામ હતા. કેરળ વિધાનસભાની કુલ 140 બેઠકો માટે મતદાન 9 એપ્રિલ 2026ના રોજ યોજાશે અને મતગણતરી 4 મેના રોજ થશે.
બીજી યાદીમાં કન્નુર બેઠક માટે ટી ઓ મોહનનને ઉમેદવાર બનાવવામાં આવ્યા છે, જ્યારે નેમોમ બેઠક પરથી સબરીનાધનને ટિકિટ આપવામાં આવી છે. વરિષ્ઠ કોંગ્રેસ નેતા અને કન્નુરથી સાંસદ કે. સુધાકરણને આ વખતે ટિકિટ આપવામાં આવી નથી. સુધાકરણએ કન્નુર બેઠક પરથી ચૂંટણી લડવાની માંગ કરી હતી અને બાદમાં જણાવ્યું હતું કે પાર્ટી જે નિર્ણય કરશે તે તેમને સ્વીકાર્ય રહેશે. તેમ છતાં, પાર્ટીએ તેમની ઉમેદવારી પર વિચાર કર્યો નથી.
કે. સુધાકરણ, જેમનું પૂરું નામ કુંભકુડી સુધાકરણ છે, તેઓ કેરળ કોંગ્રેસના વરિષ્ઠ નેતાઓમાંના એક છે. તેઓ 2009, 2019 અને 2024માં કન્નુરમાંથી સાંસદ તરીકે ચૂંટાયા છે. તેઓ અગાઉ કેરળ પ્રદેશ કોંગ્રેસ સમિતિના અધ્યક્ષ રહી ચૂક્યા છે અને ચાર વખત વિધાનસભ્ય તરીકે સેવા આપી છે. તેઓએ રાજ્યમાં વન અને રમતગમત મંત્રી તરીકે પણ જવાબદારી સંભાળી છે.
2021ની વિધાનસભા ચૂંટણીમાં કોંગ્રેસે કુલ 93 બેઠકો પર ચૂંટણી લડી હતી અને બાકી બેઠકો પર પોતાના ગઠબંધન સાથીઓ સાથે સમજૂતી કરી હતી. તે ચૂંટણીમાં પાર્ટીને 21 બેઠકો મળી હતી.
પાર્ટી દ્વારા આ વખત ઉમેદવારોની પસંદગી કરતી વખતે બેઠકોનું ગણિત, સ્થાનિક વસ્તી અને પાર્ટીની પકડને ધ્યાનમાં લેવામાં આવી છે. પાર્ટીનો ઉદ્દેશ અગાઉની ચૂંટણીની સરખામણીમાં વધુ સારો પ્રદર્શન કરવાનો છે.
