પશ્ચિમ દિલ્હીના પશ્ચિમ વિહાર વિસ્તારમાં આવેલી એક જિમ પર મોડીરાતે ગોળીબાર થયો હોવાની ઘટના સામે આવી છે. આ ઘટના સોમવાર અને મંગળવારની વચ્ચેની રાત્રિની હોવાનું જણાવાયું છે. આ ફાયરિંગમાં કોઈને ઇજા થવાની માહિતી નથી.
પોલીસના જણાવ્યા અનુસાર, પશ્ચિમ વિહારમાં આવેલી આરકે ફિટનેસ જિમને નિશાન બનાવવામાં આવી હતી. મોડીરાતે કેટલાક અજાણ્યા લોકો જિમની બહાર આવ્યા અને અચાનક ગોળીબાર કર્યો. તે સમયે જિમ બંધ હતી અને અંદર કોઈ હાજર ન હતું. ગોળીઓના અવાજથી આસપાસના લોકોમાં ભય ફેલાયો અને તરત જ પોલીસને જાણ કરવામાં આવી.
ઘટનાના થોડા કલાકો બાદ સોશિયલ મીડિયા પર એક પોસ્ટ સામે આવી હતી, જેમાં પોતાને લોરેન્સ બિશ્નોઈ ગેંગ સાથે જોડાયેલો બતાવનાર રણદીપ મલિકે ફાયરિંગની જવાબદારી લીધી હોવાનો દાવો કર્યો હતો. પોસ્ટ વાયરલ થતા પોલીસ અને ગુપ્તચર એજન્સીઓ સતર્ક બની હતી.
વાયરલ પોસ્ટમાં જણાવાયું હતું કે જિમના માલિકને અગાઉ ફોન કોલ કરવામાં આવ્યો હતો, પરંતુ કોલનો જવાબ ન મળતાં ફાયરિંગ કરવામાં આવી. પોસ્ટમાં આગળ વધુ ગંભીર પરિણામોની ધમકી પણ આપવામાં આવી હતી.
રણદીપ મલિકની પોસ્ટમાં ફાયરિંગની જવાબદારી સાથે સાથે અન્ય ગુનાહિત ગેંગોના નામોનો પણ ઉલ્લેખ કરવામાં આવ્યો હતો, જેમાં લોરેન્સ બિશ્નોઈ ગ્રુપ, જીતેન્દ્ર ગોગી માન ગ્રુપ, હાશિમ બાબા ગ્રુપ અને કાળા રાણા ગ્રુપનો સમાવેશ થાય છે.
ઘટનાની જાણ થતાં જ દિલ્હી પોલીસની અનેક ટીમો ઘટનાસ્થળે પહોંચી હતી. સમગ્ર વિસ્તારને સીલ કરવામાં આવ્યો અને જિમની આસપાસ સઘન તપાસ હાથ ધરવામાં આવી. ફોરેન્સિક ટીમને પણ બોલાવવામાં આવી હતી. ઘટનાસ્થળેથી એક જીવંત કારતૂસ મળી આવ્યું છે, જેને તપાસ માટે જપ્ત કરવામાં આવ્યું છે.
પોલીસ આસપાસ લાગેલા સીસીટીવી કેમેરાની ફૂટેજની તપાસ કરી રહી છે, જેથી હુમલાખોરો કયા માર્ગે આવ્યા અને ફાયરિંગ બાદ કઈ દિશામાં ફરાર થયા તે જાણી શકાય. આસપાસના દુકાનદારો અને સ્થાનિક લોકોની પૂછપરછ પણ કરવામાં આવી રહી છે.
પોલીસે જણાવ્યું છે કે સોશિયલ મીડિયા પર સામે આવેલી પોસ્ટની સત્યતા તપાસ હેઠળ છે. પોસ્ટ ખરેખર રણદીપ મલિકના અકાઉન્ટમાંથી કરવામાં આવી હતી કે નહીં, તેની પણ તપાસ કરવામાં આવી રહી છે. આ મામલે સાઇબર સેલને પણ જોડવામાં આવી છે.
