ભારતમાં દક્ષિણ-પશ્ચિમ ચોમાસું ફરી સક્રિય બન્યું છે અને આગામી 24 કલાક દરમિયાન અનેક રાજ્યોમાં હવામાન ગંભીર સ્વરૂપ ધારણ કરી શકે છે. ભારતીય હવામાન વિભાગ (IMD)એ 4 જુલાઈ માટે ઉત્તર, પૂર્વ અને મધ્ય ભારતના અનેક વિસ્તારોમાં ભારેથી અતિભારે વરસાદ, ગાજવીજ, વીજળી પડવાની શક્યતા અને તેજ પવનની ચેતવણી જાહેર કરી છે. કેટલાક વિસ્તારોમાં પવનની ગતિ પ્રતિ કલાક 90 કિલોમીટર સુધી પહોંચી શકે છે, જેના કારણે જનજીવન અને વાહનવ્યવહાર પ્રભાવિત થવાની શક્યતા છે.
હવામાન વિભાગના જણાવ્યા અનુસાર ઉત્તર-પશ્ચિમ બંગાળની ખાડી ઉપર સર્જાયેલા નીચા દબાણના ક્ષેત્ર અને પશ્ચિમ ભારતમાં સક્રિય ચક્રવાતી પરિભ્રમણના કારણે ચોમાસાની પ્રણાલી મજબૂત બની છે. તેના પ્રભાવથી ઉત્તર, મધ્ય અને પૂર્વ ભારતના અનેક રાજ્યોમાં આગામી કેટલાક દિવસો સુધી વ્યાપક વરસાદ પડવાની સંભાવના છે.
IMDએ ઉત્તર પ્રદેશ, દિલ્હી, બિહાર, ઝારખંડ, રાજસ્થાન, ઉત્તરાખંડ, હિમાચલ પ્રદેશ, પંજાબ, જમ્મુ-કાશ્મીર, મહારાષ્ટ્ર અને કેરળ સહિત અનેક રાજ્યોમાં ભારે વરસાદ, ગાજવીજ અને તેજ પવનની ચેતવણી જાહેર કરી છે. કેટલાક વિસ્તારોમાં વીજળી પડવાની શક્યતા પણ વ્યક્ત કરવામાં આવી છે, તેથી લોકોને અનાવશ્યક રીતે ખુલ્લા સ્થળોએ ન જવાની સલાહ આપવામાં આવી છે.
રાષ્ટ્રીય રાજધાની દિલ્હી અને આસપાસના વિસ્તારોમાં 4 જુલાઈએ ભારે વરસાદ અને ગાજવીજ સાથે વરસાદી ઝાપટાં પડવાની શક્યતા છે. હવામાન વિભાગના અનુમાન મુજબ આ દરમિયાન પ્રતિ કલાક 60થી 70 કિલોમીટરની ઝડપે પવન ફૂંકાઈ શકે છે. વરસાદને કારણે તાપમાનમાં ઘટાડો થશે, જોકે પાણી ભરાવા અને વાહનવ્યવહાર પ્રભાવિત થવાની શક્યતા યથાવત રહેશે.
ઉત્તર પ્રદેશના પશ્ચિમ, મધ્ય અને પૂર્વ જિલ્લાઓમાં ભારે વરસાદ સાથે પ્રતિ કલાક 80થી 90 કિલોમીટરની ઝડપે પવન ફૂંકાઈ શકે છે. મેરઠ, ગાઝિયાબાદ, કાનપુર, પ્રયાગરાજ, વારાણસી અને ગોરખપુર સહિત અનેક જિલ્લાઓમાં સાવચેતી રાખવાની સલાહ આપવામાં આવી છે. બિહારમાં પશ્ચિમ ચંપારણ, પટણા, મુઝફ્ફરપુર, દરભંગા, પૂર્ણિયા, કટિહાર અને ભાગલપુર સહિત અનેક જિલ્લાઓમાં ભારે વરસાદ અને આંધીની ચેતવણી જાહેર કરવામાં આવી છે. હવામાન વિભાગે વીજળી પડવાની ઘટનાઓને ધ્યાનમાં રાખીને વિશેષ સાવચેતી રાખવાની અપીલ કરી છે.
ઉત્તરાખંડ, હિમાચલ પ્રદેશ અને જમ્મુ-કાશ્મીરમાં સતત વરસાદને કારણે ભૂસ્ખલન, પથ્થરો ખાબકવા અને માર્ગ અવરોધિત થવાનો ખતરો વધ્યો છે. પર્વતીય વિસ્તારોમાં પ્રવાસ કરનાર લોકોને હવામાન અંગેની તાજી માહિતી મેળવવા અને વહીવટીતંત્રની સલાહનું પાલન કરવાની સલાહ આપવામાં આવી છે.
રાજસ્થાનના અનેક જિલ્લાઓમાં ભારે વરસાદ અને પ્રતિ કલાક 60થી 70 કિલોમીટરની ઝડપે પવન ફૂંકાવાની શક્યતા છે. મધ્ય પ્રદેશના કેટલાક વિસ્તારોમાં પણ ભારે વરસાદ અને તેજ પવનનું અનુમાન જાહેર કરવામાં આવ્યું છે. હવામાન વિભાગના જણાવ્યા અનુસાર પશ્ચિમ અને મધ્ય ભારતમાં ચોમાસાની સક્રિયતા આગામી કેટલાક દિવસો સુધી યથાવત રહી શકે છે.
