ભારતીય ક્રિકેટ કંટ્રોલ બોર્ડ (BCCI)ની પસંદગી સમિતિની મુંબઈમાં બેઠક ચાલી રહી છે અને આયર્લેન્ડ તથા ઇંગ્લેન્ડ સામેની ટી20 શ્રેણી તેમજ એશિયન ગેમ્સ 2026 માટે ભારતીય ટીમની જાહેરાત આજે થવાની સંભાવના છે. મુખ્ય પસંદગીકાર અજિત અગરકરની આગેવાનીમાં યોજાયેલી બેઠક બાદ બીસીસીઆઈ મુખ્યાલય ખાતે બપોર સુધી સત્તાવાર પ્રેસ કોન્ફરન્સ યોજાઈ શકે છે, જેમાં ટીમની જાહેરાત કરવામાં આવશે.
પસંદગી સમિતિ આ વખતે એકસાથે બે અલગ ટીમોની જાહેરાત કરી શકે છે. તેમાં આયર્લેન્ડ અને ઇંગ્લેન્ડ સામેની મર્યાદિત ઓવરની શ્રેણી માટેની ટીમ તેમજ એશિયન ગેમ્સ 2026ના ટી20 ક્રિકેટ ઇવેન્ટ માટેની ટીમનો સમાવેશ થઈ શકે છે.
ભારત 26 અને 28 જૂને આયર્લેન્ડ સામે બે ટી20 મેચ રમશે. ત્યારબાદ 1 જુલાઈથી ઇંગ્લેન્ડ સામે પાંચ ટી20 અને ત્રણ વનડે મેચોની શ્રેણી રમાશે. એશિયન ગેમ્સ માટે અલગ ટીમની પસંદગી કરવામાં આવશે, કારણ કે ટુર્નામેન્ટ માટેની પસંદગીની સમયમર્યાદા અગાઉથી નક્કી કરવામાં આવી ચૂકી છે.
ભારતીય ટી20 ટીમની કપ્તાનીને લઈને સૌથી વધુ ચર્ચા ચાલી રહી છે. વર્તમાન ટી20 કપ્તાન સૂર્યકુમાર યાદવના ભવિષ્ય અંગે પસંદગી સમિતિ ગંભીર વિચારણા કરી શકે છે.
સૂત્રોના જણાવ્યા અનુસાર, ટીમ મેનેજમેન્ટ આ ભૂમિકા માટે શ્રેયસ અય્યરને વિકલ્પ તરીકે જોઈ રહ્યું છે. ખાસ કરીને આઈપીએલમાં તેમના સતત સફળ નેતૃત્વને કારણે તેમને કપ્તાનીની દોડમાં આગળ માનવામાં આવી રહ્યા છે.
શ્રેયસ અય્યરે દિલ્હી કેપિટલ્સ, કોલકાતા નાઈટ રાઈડર્સ અને પંજાબ કિંગ્સ જેવી ટીમોને આઈપીએલ ફાઇનલ સુધી પહોંચાડી છે. 2024માં તેમની કપ્તાની હેઠળ કોલકાતા નાઈટ રાઈડર્સે આઈપીએલ ખિતાબ જીત્યો હતો. તેઓ એકમાત્ર એવા કપ્તાન છે જેમણે ત્રણ અલગ-અલગ ટીમોને આઈપીએલ ફાઇનલ સુધી પહોંચાડી છે. દબાણની પરિસ્થિતિમાં તેમની બેટિંગ અને નેતૃત્વમાં સ્થિરતા જોવા મળી છે, જેના કારણે તેઓ ટી20 કપ્તાની માટે મજબૂત દાવેદાર માનવામાં આવી રહ્યા છે.
અહેવાલો મુજબ, પસંદગી સમિતિ માત્ર કપ્તાની જ નહીં પરંતુ સૂર્યકુમાર યાદવના ટીમમાં સ્થાન અંગે પણ વિચારણા કરી શકે છે. તેના પાછળનું કારણ તાજેતરના મહિનાઓમાં તેમના ફોર્મમાં થયેલો ઘટાડો હોવાનું જણાવવામાં આવી રહ્યું છે.
તેમ છતાં, બીસીસીઆઈ તરફથી અત્યાર સુધી કોઈ સત્તાવાર પુષ્ટિ કરવામાં આવી નથી. જોકે, ટીમની પસંદગીને લઈને ચર્ચાઓ તેજ બની છે.
મુંબઈમાં યોજાયેલી આ બેઠકમાં અજિત અગરકર સાથે બીસીસીઆઈ સચિવ દેવજિત સૈકિયા પણ હાજર રહેશે. પસંદગી પ્રક્રિયા પૂર્ણ થયા બાદ યોજાનારી પ્રેસ કોન્ફરન્સમાં બંને શ્રેણીઓ અને એશિયન ગેમ્સ માટેના સ્ક્વોડની જાહેરાત કરવામાં આવશે.
ઇંગ્લેન્ડ સામે ભારતની મર્યાદિત ઓવરની શ્રેણીને મહત્વપૂર્ણ માનવામાં આવી રહી છે. આ શ્રેણીને આવનારી મોટી ICC ટુર્નામેન્ટોની તૈયારી તરીકે જોવામાં આવી રહી છે. તેમાં ટીમ સંયોજન, નવા ખેલાડીઓની પસંદગી અને કપ્તાની અંગેનો નિર્ણય ભારતીય ક્રિકેટની ભવિષ્યની દિશા નક્કી કરી શકે છે.
