મહિલા ટી20 વિશ્વ કપ 2026માં ભારતીય મહિલા ક્રિકેટ ટીમે પોતાના બીજા મુકાબલામાં નેધરલેન્ડને 95 રનથી હરાવીને વધુ એક પ્રભાવશાળી જીત નોંધાવી છે. લીડ્સના હેડિંગ્લી મેદાન ખાતે રમાયેલા આ મુકાબલામાં ભારતે પ્રથમ બેટિંગ કરતાં 20 ઓવરમાં 5 વિકેટે 209 રન બનાવ્યા અને ત્યારબાદ નેધરલેન્ડની ટીમને 17.3 ઓવરમાં 114 રન પર ઓલઆઉટ કરી દીધી. આ જીત સાથે ભારત ગ્રુપ એમાં ટોચના સ્થાને પહોંચી ગયું છે.
ટોસ હારીને પ્રથમ બેટિંગ કરવા ઉતરેલી ભારતીય ટીમને ઓપનિંગ જોડી શેફાલી વર્મા અને સ્મૃતિ મંધાનાએ મજબૂત શરૂઆત અપાવી. બંનેએ પ્રથમ વિકેટ માટે 70 બોલમાં 115 રનની ભાગીદારી નોંધાવી. શેફાલી વર્માએ 38 બોલમાં 55 રન બનાવ્યા, જેમાં 10 ચોગ્ગાનો સમાવેશ થયો.
ત્યારબાદ સ્મૃતિ મંધાનાએ જેમિમા રોડ્રિગ્સ સાથે ઇનિંગ્સને આગળ વધારી. મંધાનાએ 47 બોલમાં 74 રનની ઇનિંગ્સ રમી, જેમાં 11 ચોગ્ગા અને 1 છગ્ગાનો સમાવેશ થયો. જેમિમા રોડ્રિગ્સે 13 બોલમાં 19 રનનું યોગદાન આપ્યું. મધ્યક્રમમાં યાસ્તિકા ભાટિયા વહેલી આઉટ થઈ ગઈ હતી, પરંતુ કેપ્ટન હરમનપ્રીત કૌર અને ઋચા ઘોષે અંતિમ ઓવરોમાં ઝડપી રન ઉમેરીને ટીમને મજબૂત સ્કોર સુધી પહોંચાડી.
ઋચા ઘોષ 20 રન બનાવીને અણનમ રહી, જ્યારે દીપ્તિ શર્માએ અંતિમ બોલોમાં એક છગ્ગો અને એક ચોગ્ગો ફટકારી મહત્વપૂર્ણ યોગદાન આપ્યું. ભારતનો 209/5નો સ્કોર મહિલા ટી20 વિશ્વ કપના ઇતિહાસમાં ટીમનો સર્વોચ્ચ સ્કોર છે.
210 રનના લક્ષ્યનો પીછો કરવા ઉતરેલી નેધરલેન્ડની ટીમે શરૂઆતમાં સંયમિત બેટિંગ કરી. હિથર સીગર્સ અને ફીબે મોલ્કેનબોઅરે પ્રથમ વિકેટ માટે 34 રન જોડ્યા. જોકે, ભારતીય બોલરોએ મધ્યક્રમમાં સતત દબાણ જાળવી રાખતાં નિયમિત અંતરે વિકેટો ઝડપી.
નેધરલેન્ડની કેપ્ટન બેબેટ ડી લીડેએ 27 બોલમાં 28 રન બનાવી સંઘર્ષ કર્યો, પરંતુ અન્ય બેટરો તેમનો સાથ આપી શક્યા નહીં. નેધરલેન્ડની આખી ટીમ 17.3 ઓવરમાં 114 રન પર ઓલઆઉટ થઈ ગઈ.
મુકાબલાનો મહત્વપૂર્ણ તબક્કો અંતિમ ઓવરોમાં જોવા મળ્યો, જ્યારે નેધરલેન્ડે 16મા ઓવર બાદ 5 વિકેટે 113 રન બનાવ્યા હતા. જોકે, ત્યારબાદની 9 બોલમાં માત્ર 1 રન ઉમેરતાં બાકીની તમામ વિકેટો ગુમાવી દીધી.
ભારત તરફથી શ્રી ચરણીએ 19 રન આપી 4 વિકેટ ઝડપી. શેફાલી વર્માએ પણ બોલિંગમાં 20 રન આપી 3 વિકેટ મેળવી. નંદિની શર્માએ 2 વિકેટ લઈને નેધરલેન્ડની બેટિંગ લાઇનઅપને વધુ નુકસાન પહોંચાડ્યું.
