ગુરુવારે, પ્રધાનમંત્રી નરેન્દ્ર મોદીએ આસામની રાજધાની ગુવાહાટીમાં એડવાન્ટેજ આસામ 2.0 સમિટનું ઉદ્ઘાટન કર્યું. આ બે દિવસીય ગ્લોબલ ટ્રેડ અને ઈન્વેસ્ટમેન્ટ સમિટમાં 60 થી વધુ દેશોના રાજદૂતો અને વિશ્વભરના ઉદ્યોગપતિઓએ ભાગ લીધો.
ગુવાહાટી: ગુરુવારે, પ્રધાનમંત્રી નરેન્દ્ર મોદીએ આસામની રાજધાની ગુવાહાટીમાં એડવાન્ટેજ આસામ 2.0 સમિટનું ઉદ્ઘાટન કર્યું. આ બે દિવસીય ગ્લોબલ ટ્રેડ અને ઈન્વેસ્ટમેન્ટ સમિટમાં 60 થી વધુ દેશોના રાજદૂતો અને વિશ્વભરના ઉદ્યોગપતિઓએ ભાગ લીધો. પ્રધાનમંત્રી મોદીએ પોતાના સંબોધનમાં ઉત્તર-પૂર્વ ભારતની અપાર સંભાવનાઓ પર ભાર મૂકતા કહ્યું કે હવે ભારતના વિકાસનું આગલું કેન્દ્ર ઉત્તર-પૂર્વ બનવા જઈ રહ્યું છે.
ઉત્તર-પૂર્વ ભારત એક નવી ક્રાંતિના પગથિયા પર
પોતાના સંબોધનમાં પીએમ મોદીએ કહ્યું, "એડવાન્ટેજ આસામ, માત્ર એક સમિટ નથી, પરંતુ ઉત્તર-પૂર્વ ભારતના નવા યુગની શરૂઆત છે. પહેલા પણ પૂર્વ ભારત દેશની સમૃદ્ધિનું કેન્દ્ર હતું અને હવે તે ફરીથી પોતાની તાકાત દેખાડવા માટે તૈયાર છે." તેમણે આસામની ભૌગોલિક સ્થિતિ, સંસાધનો અને યુવા શક્તિને ભારતના આર્થિક વિકાસ માટે મહત્વપૂર્ણ ગણાવી. તેમણે એ પણ યાદ અપાવ્યું કે 2013માં આસામ પ્રવાસ દરમિયાન તેમણે કહ્યું હતું કે "A for Assam", અને આજે તે જ સપનું સાકાર થઈ રહ્યું છે.
AIનો અર્થ થશે - આસામ ઇન્ટેલિજન્સ
આ સમિટમાં રિલાયન્સ ઇન્ડસ્ટ્રીઝના ચેરમેન મુકેશ અંબાણી પણ ઉપસ્થિત રહ્યા હતા. તેમણે આસામને ટેકનોલોજિકલ ક્રાંતિનું આગલું કેન્દ્ર ગણાવતા કહ્યું, "આસામને અત્યાર સુધી દુનિયા ચાના સ્વર્ગ તરીકે ઓળખતી હતી, પરંતુ આવનારા સમયમાં તે ટેકનોલોજીનું સ્વર્ગ બનશે." તેમણે ભાર મૂકીને કહ્યું કે, "AIનો અર્થ માત્ર 'આર્ટિફિશિયલ ઇન્ટેલિજન્સ' નહીં, પરંતુ 'આસામ ઇન્ટેલિજન્સ' પણ થશે. આસામના યુવાનો દુનિયામાં ટેકનોલોજી ઇનોવેશનનું નવું કેન્દ્ર બનશે."
આસામને મળશે ગ્લોબલ મંચ
પ્રધાનમંત્રી મોદીએ આ પ્રસંગે ઉત્તર-પૂર્વમાં ચાલી રહેલી ઈન્ફ્રાસ્ટ્રક્ચર પ્રોજેક્ટ્સનો પણ ઉલ્લેખ કર્યો. તેમણે કહ્યું કે આસામ અને ઉત્તર-પૂર્વને રેલ્વે, હાઈવે અને ડિજિટલ કનેક્ટિવિટીથી જોડવામાં આવી રહ્યા છે, જેનાથી ટ્રેડ અને ઈન્વેસ્ટમેન્ટના નવા અવસરો ઉભા થશે. તેમણે આસામ સરકાર અને મુખ્યમંત્રી હિમંત બિસ્વા સરમાની પણ પ્રશંસા કરતા કહ્યું કે રાજ્યની વિકાસ નીતિઓ સ્થાનિક યુવાનોને ગ્લોબલ સ્તરે સ્પર્ધા કરવાનો અવસર આપી રહી છે.
એડવાન્ટેજ આસામ 2.0 સમિટનો ઉદ્દેશ્ય રાજ્યમાં રોકાણને આકર્ષિત કરવાનો અને તેને દક્ષિણ એશિયાના ટ્રેડિંગ સેન્ટર તરીકે વિકસાવવાનો છે. આ સમિટમાં વિવિધ ક્ષેત્રોમાં રોકાણ વધારવા અને નવા ટ્રેડ કરારો પર સહી થવાની સંભાવના છે.
