ચીનમાં યોજાનારા SCO સંમેલન અંગે વડાપ્રધાન મોદીની સંભવિત મુલાકાત પર ચીને સકારાત્મક પ્રતિભાવ આપ્યો છે. તેને એકતા અને મિત્રતાનું પ્રતીક ગણાવીને ચીને આ આયોજનને ઐતિહાસિક ગણાવ્યું છે.
Modi China Visit: વડાપ્રધાન નરેન્દ્ર મોદી આ મહિનાના અંતમાં શાંઘાઈ સહયોગ સંગઠન (SCO) શિખર સંમેલન માટે ચીનના તિયાનજિન શહેરની મુલાકાત લેશે. આ મુલાકાત અનેક રીતે ખાસ છે કારણ કે 2019 પછીની મોદીની આ પ્રથમ ચીન યાત્રા હશે. ચીને આ યાત્રાનું ખુલ્લા દિલે સ્વાગત કર્યું છે અને તેને ક્ષેત્રીય મિત્રતા અને સહયોગને મજબૂત કરવાની તક ગણાવી છે.
ચીનના વિદેશ મંત્રાલયના પ્રવક્તા ગુઓ જિયાકુને વડાપ્રધાન મોદીની પ્રસ્તાવિત યાત્રા અંગે સકારાત્મક પ્રતિભાવ આપ્યો છે. તેમણે કહ્યું કે આ સંમેલન એકતા, મિત્રતા અને સાર્થક પરિણામોનું સંગમ હશે. ગુઓના જણાવ્યા અનુસાર, આ સંમેલન SCOના ઇતિહાસમાં અત્યાર સુધીનું સૌથી મોટું શિખર સંમેલન માનવામાં આવે છે. તેમાં 20થી વધુ દેશોના નેતાઓ ભાગ લેશે, જેમાં SCO સભ્ય દેશો ઉપરાંત 10 આંતરરાષ્ટ્રીય સંગઠનોના વડાઓ પણ સામેલ થશે.
જાપાનમાં રોકાયા બાદ મોદી પહોંચશે તિયાનજિન
વડાપ્રધાન મોદીની ચીન યાત્રા પહેલા તેઓ જાપાનમાં રોકાશે. 30 ઓગસ્ટના રોજ તેઓ જાપાનના વડાપ્રધાન શિગેરુ ઇશિબા સાથે વાર્ષિક ભારત-જાપાન શિખર સંમેલનમાં ભાગ લેશે. ત્યારબાદ તેઓ તિયાનજિન માટે રવાના થશે, જ્યાં તેઓ 31 ઓગસ્ટથી 1 સપ્ટેમ્બર સુધી ચાલનારા SCO સંમેલનમાં ભાગ લેશે.
ભારત-ચીન સંબંધોની પૃષ્ઠભૂમિમાં મહત્વપૂર્ણ પ્રવાસ
વડાપ્રધાન મોદીની આ યાત્રા એવા સમયે થઈ રહી છે જ્યારે વૈશ્વિક મંચ પર અનેક ભૂ-રાજકીય તણાવ વધી રહ્યા છે. તાજેતરના મહિનાઓમાં ભારતના સંરક્ષણ મંત્રી રાજનાથ સિંહ, રાષ્ટ્રીય સુરક્ષા સલાહકાર અજીત ડોભાલ અને વિદેશ મંત્રી એસ જયશંકર પહેલાથી જ ચીનમાં SCO સંબંધિત મહત્વપૂર્ણ બેઠકોમાં ભાગ લઈ ચૂક્યા છે. મોદીની યાત્રા આ બેઠકોની કડી તરીકે જોવામાં આવી રહી છે.
રશિયા અને અમેરિકા વચ્ચે તણાવનો પડછાયો
આ સંમેલન એવા સમયે થઈ રહ્યું છે જ્યારે અમેરિકા અને રશિયા વચ્ચે તણાવ વધ્યો છે. અમેરિકી રાષ્ટ્રપતિ ડોનાલ્ડ ટ્રમ્પે બ્રિક્સ દેશો દ્વારા રશિયા પાસેથી તેલ ખરીદવા અંગે ટીકા કરી છે. કારણ કે બ્રિક્સ અને SCOના ઘણા સભ્ય દેશો એક સરખા છે, એવામાં આ સંમેલન એક નવી દિશા નક્કી કરી શકે છે. રશિયા સંમેલનમાં પોતાના પ્રતિનિધિઓને મોકલશે, જોકે હજી એ સ્પષ્ટ નથી કે રાષ્ટ્રપતિ વ્લાદિમીર પુતિન સ્વયં ઉપસ્થિત રહેશે કે નહીં.
SCO સંરક્ષણ દસ્તાવેજ પર ભારતનો વિરોધ
જૂન 2025માં ભારતે SCOના સંરક્ષણ મંત્રીઓની બેઠકમાં રજૂ કરાયેલા એક દસ્તાવેજ પર હસ્તાક્ષર કરવાનો ઇનકાર કર્યો હતો. કારણ હતું કે તે દસ્તાવેજમાં જમ્મુ-કાશ્મીરના પહેલગામમાં થયેલા આતંકી હુમલાનો ઉલ્લેખ કરવામાં આવ્યો ન હતો, જેમાં 26 લોકોના જીવ ગયા હતા. તેનાથી વિપરીત, દસ્તાવેજમાં પાકિસ્તાનના બલૂચિસ્તાન પ્રાંતમાં અશાંતિનો ઉલ્લેખ કરવામાં આવ્યો હતો. ભારતે આ પક્ષપાતી વલણનો વિરોધ કર્યો હતો.
જોકે, જુલાઈમાં ચીને પહેલગામ આતંકી હુમલાની સખત નિંદા કરતા પ્રાદેશિક આતંકવાદ વિરોધી સહયોગને વધુ મજબૂત કરવાની વાત કહી હતી. આ પ્રતિક્રિયાને ભારત માટે એક સકારાત્મક સંકેત તરીકે જોવામાં આવી રહી છે.
