પંજાબના ફતેહગઢ સાહિબ જિલ્લામાં વૈસાખી મેળાથી પરત ફરતી શ્રદ્ધાળુઓની બસ પલટી જતાં 6 લોકોના મોત થયા છે અને 21 લોકો ઘાયલ થયા છે. પ્રાથમિક માહિતી મુજબ અકસ્માત ટેક્નિકલ ખામી બાદ બસ વીજના થાંભલા સાથે અથડાતાં થયો હતો.
અકસમાત મોડીરાત્રે થયો હતો, જ્યારે બસમાં સવાર શ્રદ્ધાળુઓ આનંદપુર સાહિબ ખાતે યોજાયેલા વૈસાખી મેળામાં ભાગ લઈ પોતાના ગામ પરત ફરી રહ્યા હતા.
પ્રારંભિક માહિતી મુજબ બસમાં આશરે 40 શ્રદ્ધાળુઓ સવાર હતા. તમામ યાત્રીઓ આનંદપુર સાહિબથી વૈસાખી ઉજવી ફતેહગઢ સાહિબ જિલ્લાના મૈણ માજરી ગામ તરફ જઈ રહ્યા હતા.
ગામ હિમ્મતપુરા નજીક બસમાં અચાનક ટેક્નિકલ ખામી આવી. ચાલકે વાહન નિયંત્રિત કરવાનો પ્રયાસ કર્યો, પરંતુ બસ બેકાબૂ બની ગઈ. વધુ ઝડપમાં બસ રસ્તા કિનારે આવેલા વીજના થાંભલા સાથે અથડાઈ અને પલટી ગઈ.
પ્રત્યક્ષદર્શીઓ મુજબ બસ પલટી જતા જ તેમાં કરંટ ફેલાયો, જેના કારણે અંદર ફસાયેલા મુસાફરોની મુશ્કેલીઓ વધી ગઈ.
બસ પલટી જતાં જ સ્થળ પર ચીસો પડી. રાત્રિનો સમય હોવાથી શરૂઆતમાં મદદ મેળવવામાં મુશ્કેલી પડી, પરંતુ નજીકના ગામલોકો તાત્કાલિક સ્થળે પહોંચ્યા.
સ્થાનિક લોકોએ જોખમ લઈને બસમાં ફસાયેલા શ્રદ્ધાળુઓને બહાર કાઢ્યા. કેટલાક લોકો સીટો અને બારીઓ વચ્ચે ફસાઈ ગયા હતા. ગ્રામજનો દ્વારા કાચ તોડી અને દરવાજા ખોલીને લોકોને બહાર કાઢવામાં આવ્યા.
થોડીવાર બાદ પોલીસ અને પ્રશાસનની ટીમો પણ સ્થળે પહોંચી ગઈ.
અકસમાતમાં ઘાયલ થયેલા 21 લોકોને તરત જ અલગ-અલગ હોસ્પિટલોમાં દાખલ કરવામાં આવ્યા. તેમાં 12 ઘાયલોને મોરિંડાની હોસ્પિટલમાં અને 9 લોકોને ફતેહગઢ સાહિબની હોસ્પિટલમાં દાખલ કરવામાં આવ્યા.
ગંભીર રીતે ઘાયલ શ્રદ્ધાળુઓને વધુ સારવાર માટે પોસ્ટગ્રેજ્યુએટ ઇન્સ્ટિટ્યૂટ ઓફ મેડિકલ એજ્યુકેશન એન્ડ રિસર્ચ (પીજીઆઈ ચંડીગઢ) મોકલવામાં આવ્યા છે. હોસ્પિટલ સૂત્રો મુજબ કેટલાક ઘાયલોની હાલત હજુ ગંભીર છે.
પોલીસ અધિકારીઓના જણાવ્યા મુજબ બસમાં સવાર શ્રદ્ધાળુઓ પોતાના ઘરે પહોંચવાના હતા. તેમનું ગામ મૈણ માજરી અકસ્માત સ્થળથી માત્ર 1.5 કિલોમીટર દૂર હતું.
ફતેહગઢ સાહિબના વરિષ્ઠ પોલીસ અધિકારી ડૉ. શુભમ અગ્રવાલે જણાવ્યું કે અકસ્માતની જાણ થતા જ પોલીસ ટીમ તાત્કાલિક સ્થળે પહોંચી ગઈ હતી. તેમણે જણાવ્યું કે બચાવ કાર્યમાં સ્થાનિક ગ્રામજનોની મહત્વપૂર્ણ ભૂમિકા રહી અને રાત્રે જ ઘાયલોને હોસ્પિટલ પહોંચાડવાની વ્યવસ્થા કરવામાં આવી.
સ્થાનિક લોકોના જણાવ્યા મુજબ અકસ્માત સમયે તેઓ નજીકમાં જ હતા. બસ પલટવાની અવાજ સાંભળતાં જ તેઓ સ્થળે પહોંચી ગયા.
તેમણે જણાવ્યું કે શ્રદ્ધાળુઓ થોડા સમય પહેલાં જ ભોજન કરી આગળ વધ્યા હતા અને અકસ્માત એટલો અચાનક થયો કે મુસાફરોને સંભાળવાનો મોકો મળ્યો નહોતો.
ગ્રામજનોના જણાવ્યા મુજબ એમ્બ્યુલન્સ મોડેથી પહોંચી, તેથી શરૂઆતનું બચાવ કાર્ય ગામલોકોએ જાતે સંભાળ્યું.
અકસમાતમાં સપડાયેલા તમામ લોકો વૈસાખી તહેવાર નિમિત્તે આનંદપુર સાહિબ ખાતે યોજાયેલા ધાર્મિક મેળામાં ભાગ લઈ પરત ફરી રહ્યા હતા.
આ ઘટનાને લઈ અનેક નેતાઓ અને સામાજિક સંગઠનો દ્વારા શોક વ્યક્ત કરવામાં આવ્યો છે. હરિસિમરત કૌર બાદલે સોશિયલ મીડિયા પર શોક વ્યક્ત કરી મૃતકોની આત્માને શાંતિ મળે તેવી પ્રાર્થના કરી અને ઘાયલોના જલદી સ્વસ્થ થવાની કામના વ્યક્ત કરી.
આ અકસ્માત બાદ માર્ગ સલામતી, જાહેર પરિવહનની ટેક્નિકલ તપાસ અને આપાતકાલીન રાહત વ્યવસ્થાને લઈને પ્રશ્નો ઊભા થયા છે.
