ફિલ્મ ઉદ્યોગ સાથે જોડાયેલા વ્યક્તિઓને મળતી ધમકીઓની ઘટનાઓ વચ્ચે અભિનેતા રણવીર સિંહને વોટ્સએપ વોઇસ નોટ દ્વારા ધમકી મળ્યાનો મામલો સામે આવ્યો છે. મુંબઈ પોલીસ મુજબ અજ્ઞાત નંબર પરથી મોકલાયેલા સંદેશમાં કરોડો રૂપિયાની માંગ કરવામાં આવી છે અને કેસની તપાસ શરૂ કરવામાં આવી છે.
મુંબઈ પોલીસના જણાવ્યા મુજબ રણવીર સિંહને અજ્ઞાત નંબર પરથી વોટ્સએપ વોઇસ નોટ મોકલવામાં આવી હતી, જેમાં તેમને ધમકી આપી મોટી રકમની માંગ કરવામાં આવી હતી. અહેવાલો મુજબ ધમકી આપનાર વ્યક્તિએ પોતે કુખ્યાત લોરેન્સ બિશ્નોઈ ગેંગ સાથે જોડાયેલ હોવાનો દાવો કર્યો છે. જોકે આ દાવાની સત્તાવાર પુષ્ટિ હજુ સુધી થઈ નથી અને પોલીસ આ મુદ્દે ગંભીરતાથી તપાસ કરી રહી છે.
ધમકીભર્યો વોઇસ નોટ સામે આવ્યા બાદ રણવીર સિંહના નિવાસસ્થાન બહાર સુરક્ષા વધારવામાં આવી છે. મુંબઈ પોલીસની વિશેષ ટીમ સાયબર સેલની મદદથી તે નંબર અને અવાજની ઓળખ કરવાનો પ્રયાસ કરી રહી છે, જેણે આ સંદેશ મોકલ્યો હતો. અભિનેતા તરફથી આ મામલે હજી સુધી કોઈ સત્તાવાર નિવેદન જાહેર કરવામાં આવ્યું નથી.
થોડા દિવસો પહેલા જાણીતા નિર્દેશક રોહિત શેટ્ટીના નિવાસસ્થાન બહાર મોડીરાત્રે ફાયરિંગની ઘટના નોંધાઈ હતી. હવે રણવીર સિંહને નિશાન બનાવવાની ઘટનાથી ફિલ્મ ઉદ્યોગમાં સુરક્ષા સંબંધિત ચિંતાઓ વધતી જોવા મળી રહી છે.
રણવીર સિંહ હાલના સમયમાં ફિલ્મ ઉદ્યોગના સફળ અભિનેતાઓમાં ગણાય છે. તેમની તાજેતરની ફિલ્મ “ધુરંધર” એ બોક્સ ઓફિસ પર નોંધપાત્ર પ્રદર્શન કર્યું છે.
