પંજાબી ગાયક અને અભિનેતા Diljit Dosanjh ફરી એક વખત ચર્ચામાં આવ્યા છે. આ વખતે ચર્ચા તેમના સંગીત પ્રવાસ અથવા ફિલ્મોને લઈને નહીં પરંતુ તેમની કથિત નાગરિકતાને લઈને થઈ રહી છે. તાજેતરમાં સામે આવેલી કેટલીક મીડિયા રિપોર્ટ્સમાં દાવો કરવામાં આવ્યો છે કે દિલજીત દોસાંઝ હવે ભારતીય નાગરિક નથી રહ્યા અને તેમણે અમેરિકી નાગરિકતા મેળવી લીધી છે. આ અહેવાલો બાદ સોશિયલ મીડિયા પર ચર્ચા અને અટકળો તેજ થઈ ગઈ છે.
રિપોર્ટ્સ અનુસાર, દિલજીતે વર્ષ 2022માં અમેરિકી નાગરિકતા પ્રાપ્ત કરી હતી અને ત્યારથી તેઓ કથિત રીતે અમેરિકી પાસપોર્ટનો ઉપયોગ કરી રહ્યા છે. એવું પણ કહેવામાં આવી રહ્યું છે કે ભારત આવવા માટે તેઓ હવે ઈ-વીઝા (E-Visa) નો ઉપયોગ કરે છે. જોકે, આ દાવાઓ અંગે હજુ સુધી દિલજીત દોસાંઝ અથવા તેમની ટીમ તરફથી કોઈ સત્તાવાર નિવેદન જાહેર કરવામાં આવ્યું નથી.
કેટલીક મીડિયા રિપોર્ટ્સ મુજબ, દિલજીતનો છેલ્લો ભારતીય પાસપોર્ટ વર્ષ 2018માં મુંબઈ અને ઝામ્બિયામાંથી જારી થયો હતો. ત્યારબાદ તેમણે કથિત રીતે અમેરિકી નાગરિકતા માટે અરજી કરી અને 2022માં અમેરિકી પાસપોર્ટ મેળવ્યો હતો. રિપોર્ટ્સમાં એવો પણ દાવો કરવામાં આવ્યો છે કે અમેરિકી નાગરિકતા મળ્યા પછી તેમણે કેલિફોર્નિયામાં આવેલ પોતાના પાંચ બેડરૂમના ઘરના સરનામાનો ઉપયોગ સત્તાવાર દસ્તાવેજોમાં કર્યો હતો.
આ ઉપરાંત તેમની પત્ની સંદીપ કૌર અમેરિકામાં રહે છે તેવી પણ ચર્ચા કરવામાં આવી રહી છે. જોકે, આ તમામ માહિતીની સ્વતંત્ર રીતે પુષ્ટિ થઈ નથી અને કોઈ સરકારી દસ્તાવેજ જાહેર કરવામાં આવ્યા નથી.
દિલજીત દોસાંઝની કથિત નાગરિકતા અંગે સોશિયલ મીડિયા પર વિવિધ પ્રકારની પ્રતિક્રિયાઓ જોવા મળી રહી છે. કેટલાક પ્રશંસકોએ તેને તેમની વ્યક્તિગત પસંદગી ગણાવી હતી, જ્યારે કેટલાક લોકોએ પ્રશ્ન ઉઠાવ્યો હતો કે ભારતીય મૂળના કલાકારોનું વિદેશમાં વસવાટ ભારતીય મનોરંજન ઉદ્યોગ પર અસર કરી શકે છે કે નહીં.
દિલજીત લાંબા સમયથી વૈશ્વિક સ્તરે પંજાબી સંગીત અને ભારતીય સંસ્કૃતિને લોકપ્રિય બનાવવાના કારણે જાણીતા રહ્યા છે. તેમના આંતરરાષ્ટ્રીય કોન્સર્ટ અને મ્યુઝિક ટૂર વિશ્વભરમાં મોટી સંખ્યામાં દર્શકોને આકર્ષિત કરે છે.
આ દિવસોમાં દિલજીત તેમના ‘Ora World Tour 2026’ને કારણે આંતરરાષ્ટ્રીય સ્તરે ચર્ચામાં છે. તેઓ ઉત્તર અમેરિકા સહિત અનેક દેશોમાં લાઇવ પરફોર્મન્સ આપી રહ્યા છે, જેના વિડિયો ક્લિપ્સ સોશિયલ મીડિયા પર ઝડપથી વાયરલ થઈ રહ્યા છે. તેમની લોકપ્રિયતા માત્ર ભારતીય સમુદાય સુધી મર્યાદિત રહી નથી, પરંતુ વૈશ્વિક સંગીતપ્રેમીઓ વચ્ચે પણ તેમની મોટી પ્રશંસક સંખ્યા ઉભી થઈ છે.
તાજેતરમાં દિલજીત દોસાંઝના રાજકારણમાં પ્રવેશ અંગે પણ અટકળો સામે આવી હતી. કેટલીક રિપોર્ટ્સમાં દાવો કરવામાં આવ્યો હતો કે સામાજિક કાર્યકરો અને ભૂતપૂર્વ સૈનિકોના એક જૂથે તેમને રાજકારણમાં આવવાની સલાહ આપી હતી. જોકે, દિલજીતે સોશિયલ મીડિયા પ્લેટફોર્મ X પર પ્રતિક્રિયા આપતાં સ્પષ્ટ જણાવ્યું હતું કે તેમનો રાજકારણમાં આવવાનો કોઈ ઇરાદો નથી. તેમણે લખ્યું હતું કે લોકોનું મનોરંજન કરવું તેમનું કામ છે અને તેઓ પોતાના વ્યવસાયથી સંપૂર્ણ સંતોષમાં છે.
સંગીત ઉપરાંત દિલજીત દોસાંઝ ફિલ્મ ઉદ્યોગમાં પણ સતત સક્રિય છે. તેઓ તાજેતરમાં Border 2ને લઈને ચર્ચામાં રહ્યા હતા, જેમાં તેમના સાથે Sunny Deol, Varun Dhawan અને Ahan Shetty મુખ્ય ભૂમિકામાં જોવા મળ્યા હતા. આ ઉપરાંત તેઓ નિર્દેશક Imtiaz Aliની આગામી ફિલ્મ Main Wapas Aaungaમાં પણ જોવા મળશે. આ ફિલ્મમાં Naseeruddin Shah, Sharvari Wagh અને Vedang Raina પણ મહત્વપૂર્ણ ભૂમિકામાં છે.
