ભારત અને ઈંગ્લેન્ડ વચ્ચે પાંચ મેચોની રોમાંચક ટેસ્ટ સીરિઝનો ચોથો મુકાબલો 23 જુલાઈથી માન્ચેસ્ટરના ઓલ્ડ ટ્રેફર્ડ મેદાન પર રમાશે. આ મુકાબલો ભારતીય ટીમ માટે સીરિઝમાં વાપસી કરવાની મહત્વની તક હશે.
IND vs ENG: ભારત અને ઈંગ્લેન્ડ વચ્ચે પાંચ ટેસ્ટ મેચોની રોમાંચક સીરિઝનો ચોથો મુકાબલો 23 જુલાઈ 2025થી માન્ચેસ્ટરના ઓલ્ડ ટ્રેફર્ડ મેદાન પર રમાશે. આ મુકાબલો ભારતીય ટીમ માટે ફક્ત સીરિઝમાં વાપસી કરવાની તક જ નથી, પરંતુ ભારતીય કેપ્ટન શુભમન ગિલ માટે એક ઐતિહાસિક રેકોર્ડ બનાવવાની સુવર્ણ તક પણ છે.
ગિલ વર્તમાન ટેસ્ટ સીરિઝમાં શાનદાર ફોર્મમાં છે અને હવે તે પાકિસ્તાનના પૂર્વ દિગ્ગજ બેટ્સમેન મોહમ્મદ યુસુફના 18 વર્ષ જૂના રેકોર્ડને તોડવાની ખૂબ જ નજીક છે.
શુભમન ગિલના નિશાને મોહમ્મદ યુસુફનો ઐતિહાસિક રેકોર્ડ
વર્ષ 2006માં ઈંગ્લેન્ડ પ્રવાસ પર મોહમ્મદ યુસુફે 4 ટેસ્ટ મેચોની સીરિઝમાં જબરદસ્ત બેટિંગ કરતા 631 રન બનાવ્યા હતા. તે સમયે તેમની સરેરાશ 90.14 હતી અને આ રેકોર્ડ આજ સુધી ઈંગ્લેન્ડમાં એશિયાઈ બેટ્સમેન દ્વારા એક ટેસ્ટ સીરિઝમાં સૌથી વધારે રન બનાવવાનો કીર્તિમાન બની રહ્યો છે. હવે શુભમન ગિલ આ રેકોર્ડને તોડવાથી ફક્ત 25 રન દૂર છે.
ગિલે અત્યાર સુધી ત્રણ મેચોમાં જ 607 રન બનાવ્યા છે અને તેમની સરેરાશ 101.16 છે. તેમણે બર્મિંગહામ ટેસ્ટમાં પહેલી ઇનિંગ્સમાં 269 રનની ઐતિહાસિક ઇનિંગ્સ રમીને પોતાની હાજરીનો પરચો બતાવ્યો. માન્ચેસ્ટર ટેસ્ટમાં જો શુભમન ગિલ 25 રન વધારે બનાવી લે છે, તો તે ઇંગ્લેન્ડમાં એક ટેસ્ટ સીરિઝમાં સૌથી વધારે રન બનાવનાર એશિયાઈ બેટ્સમેન બની જશે.
ઇંગ્લેન્ડમાં એક ટેસ્ટ સીરિઝમાં સૌથી વધારે રન બનાવનાર એશિયાઈ બેટ્સમેન
- મોહમ્મદ યુસુફ (પાકિસ્તાન) - 4 મેચોમાં 631 રન, 2006
- શુભમન ગિલ (ભારત) - 3 મેચોમાં 607 રન, 2025
- રાહુલ દ્રવિડ (ભારત) - 4 મેચોમાં 602 રન, 2002
- વિરાટ કોહલી (ભારત) - 5 મેચોમાં 593 રન, 2018
- સુનીલ ગાવસ્કર (ભારત) - 4 મેચોમાં 542 રન, 1979
- સલીમ મલિક (પાકિસ્તાન) - 5 મેચોમાં 488 રન, 1992
શુભમન ગિલનું ફોર્મ
શુભમન ગિલનું વર્તમાન ફોર્મ ભારતીય ટીમ માટે કોઈ વરદાનથી ઓછું નથી. આ સીરિઝમાં તેમણે સતત રન બનાવ્યા છે અને હવે તે ઇંગ્લેન્ડની તેજ પિચો અને કઠિન પરિસ્થિતિઓમાં પણ પોતાની ટેક્નિક અને ધૈર્યથી વિરોધી બોલરોની મુશ્કેલીઓ વધારી રહ્યા છે. તેમણે અત્યાર સુધી 3 ટેસ્ટ મેચોમાં 2 સદી અને 1 અર્ધસદી ફટકારી છે. તેમની સૌથી મોટી ઇનિંગ્સ 269 રનની રહી, જે ઇંગ્લેન્ડની ધરતી પર કોઈ ભારતીય બેટ્સમેન દ્વારા અત્યાર સુધીની સૌથી મોટી વ્યક્તિગત ઇનિંગ્સ માનવામાં આવી રહી છે.
આ સીરિઝમાં ઈંગ્લેન્ડ 2-1થી આગળ છે. લોર્ડ્સ ટેસ્ટમાં ભારતને માત્ર 22 રનથી નજીવી હારનો સામનો કરવો પડ્યો હતો. એવામાં માન્ચેસ્ટરનો આ મુકાબલો ભારતીય ટીમ માટે ખૂબ જ મહત્વપૂર્ણ થઈ જાય છે. ભારત જો આ ટેસ્ટ જીતે છે, તો સીરિઝ 2-2થી બરાબર થઈ જશે અને અંતિમ ટેસ્ટ મેચ નિર્ણાયક બની જશે.
