ટાટા પરિવારના જાણીતા સભ્ય સિમોન ટાટા (Simone Tata) નું શુક્રવારે 95 વર્ષની વયે અવસાન થયું. તેઓ મુંબઈની બ્રીચ કેન્ડી હોસ્પિટલમાં ઉંમર સંબંધિત સ્વાસ્થ્ય સમસ્યાઓ સામે ઝઝૂમી રહ્યા હતા.
મુંબઈ: ભારતના કોસ્મેટિક્સ અને રિટેલ ઉદ્યોગના જાણીતા સભ્ય સિમોન ટાટા (Simone Tata) નું 95 વર્ષની વયે મુંબઈમાં અવસાન થયું. તેઓ લાંબા સમયથી ઉંમર સંબંધિત સ્વાસ્થ્ય સમસ્યાઓ સામે ઝઝૂમી રહ્યા હતા અને અંતે બ્રીચ કેન્ડી હોસ્પિટલમાં તેમનું નિધન થયું. સિમોન ટાટાએ ભારતીય કોસ્મેટિક બ્રાન્ડ લેક્મે (Lakme) ને નવી ઊંચાઈઓ પર પહોંચાડી અને ટ્રેન્ટ (Trent) ની વેસ્ટસાઈડ (Westside) રિટેલ ચેઈન દ્વારા આધુનિક ફેશન ઉદ્યોગનો પાયો નાખ્યો.
સિમોન ટાટા અને ટાટા પરિવારનો સંબંધ
સિમોન ટાટા, ટાટા ટ્રસ્ટ્સના ચેરમેન નોએલ ટાટાના માતા અને ટાટા ગ્રુપના પૂર્વ ચેરમેન રતન ટાટાના સાવકા માતા હતા. તેમણે ટ્રેન્ટના ચેરપર્સન એમેરિટસ તરીકે ઘણા વર્ષો સુધી કંપની અને બ્રાન્ડના સંચાલનમાં માર્ગદર્શન આપ્યું. તેમના યોગદાનથી ટાટા ગ્રુપનો રિટેલ અને કોસ્મેટિક્સ વ્યવસાય નવી ઊંચાઈઓ પર પહોંચ્યો.
સિમોન ટાટાનો જન્મ 1930માં સ્વિટ્ઝર્લેન્ડના જીનીવામાં થયો હતો. તેમનું જન્મનું નામ સિમોન ડુનોયર હતું. તેઓ એક શ્રીમંત ફ્રેન્ચ-સ્વિસ પરિવારમાં ઉછર્યા હતા. 1950ના દાયકાની શરૂઆતમાં તેઓ પહેલીવાર ભારત આવ્યા અને એર ઇન્ડિયામાં નાની નોકરી દરમિયાન તેમનો પરિચય નવલ ટાટા સાથે થયો. 1955માં બંનેએ લગ્ન કર્યા.
લેક્મે દ્વારા મહિલાઓની વિચારધારા બદલાઈ
1962માં સિમોન ટાટા લેક્મેના બોર્ડમાં જોડાયા. તે સમયે લેક્મે ટાટા ઓઇલ મિલ્સનું એક નાનું કોસ્મેટિક યુનિટ હતું. ભારતમાં તે સમયે મધ્યમ વર્ગની મહિલાઓ મેકઅપને લઈને સંકોચ અનુભવતી હતી. સિમોને એ વિશ્વાસ ફેલાવ્યો કે સૌંદર્ય દરેક ભારતીય મહિલાનો અધિકાર છે, માત્ર લક્ઝરી નહીં. આગામી બે દાયકામાં તેમણે લેક્મેને માત્ર એક કોસ્મેટિક બ્રાન્ડ જ નહીં, પરંતુ મહિલાઓના આત્મવિશ્વાસ અને આધુનિકતાનું પ્રતીક બનાવી દીધું.
1970 અને 1980ના દાયકામાં તેમની વ્યૂહરચના હેઠળ લેક્મેએ ગ્લેમરની સાથે ભારતીય મહિલાઓની જરૂરિયાતો અને બજેટ અનુસાર પ્રોડક્ટ્સ લોન્ચ કરી. પરિણામે, લેક્મે ભારતની અગ્રણી કોસ્મેટિક કંપની બની ગઈ.
બ્રાન્ડનું વેચાણ અને નવું રિટેલ વેન્ચર
1990ના દાયકામાં ભારતના આર્થિક ઉદારીકરણ દરમિયાન સિમોન ટાટાએ લેક્મેને હિન્દુસ્તાન યુનિલિવરને 45 મિલિયન ડોલરમાં વેચી દીધું. આ પગલાથી મળેલી મૂડીનો ઉપયોગ તેમણે નવું રિટેલ વેન્ચર ટ્રેન્ટ શરૂ કરવામાં કર્યો. આજે ટ્રેન્ટ વેસ્ટસાઇડ અને જુડિઓ ચેઇન દ્વારા આધુનિક ફેશન રિટેલનું એક મજબૂત નેટવર્ક ચલાવે છે.
લેક્મે ટાટાનું એક વેન્ચર હતું, જેની સ્થાપના તત્કાલીન વડાપ્રધાન જવાહરલાલ નેહરુના અનુરોધ પર થઈ હતી. તેમણે જોયું કે ભારતીય મહિલાઓ મોટાભાગે આયાતી કોસ્મેટિક્સનો ઉપયોગ કરતી હતી, જેના કારણે વિદેશી મુદ્રા બહાર જતી હતી. બ્રાન્ડનું નામ ફ્રેન્ચ ઓપેરા ‘લેક્મે’ પરથી લેવામાં આવ્યું હતું, જેનો સંબંધ લક્ષ્મી સાથે છે. સિમોન ટાટાએ માર્કેટિંગના નવા આયામો રજૂ કર્યા અને મહિલાઓમાં મેકઅપને લઈને સામાજિક સંકોચને દૂર કર્યો.
સિમોન ટાટાએ સર રતન ટાટા ઇન્સ્ટિટ્યૂટ અને અન્ય ચેરિટેબલ સંસ્થાઓના કામમાં પણ સક્રિય ભૂમિકા ભજવી. તેમનું યોગદાન માત્ર વ્યવસાય પૂરતું મર્યાદિત ન હતું, પરંતુ તેમણે ભારતીય સમાજમાં મહિલાઓના આત્મવિશ્વાસ અને આધુનિકતાને પ્રોત્સાહન આપ્યું.
