ವಿಶ್ವದಾದ್ಯಂತ ಅತ್ಯಧಿಕವಾಗಿ ಬಳಸಲಾಗುವ ವೆಬ್ ಬ್ರೌಸರ್‌ಗಳಲ್ಲಿ ಒಂದಾದ Google Chrome ಕುರಿತು ಭಾರತದ ಸೈಬರ್ ಭದ್ರತಾ ಸಂಸ್ಥೆ CERT-In ಗಂಭೀರ ಭದ್ರತಾ ಎಚ್ಚರಿಕೆಯನ್ನು ಹೊರಡಿಸಿದೆ. Chromeನ ಕೆಲವು ಹಳೆಯ ಆವೃತ್ತಿಗಳಲ್ಲಿ ಅಪಾಯಕಾರಿ ಭದ್ರತಾ ದುರ್ಬಲತೆಗಳು ಪತ್ತೆಯಾಗಿದ್ದು, ಅವುಗಳನ್ನು ದುರುಪಯೋಗಪಡಿಸಿಕೊಂಡು ಹ್ಯಾಕರ್‌ಗಳು ಬಳಕೆದಾರರ ಖಾಸಗಿ ಮಾಹಿತಿಯನ್ನು ಕದಿಯುವ ಸಾಧ್ಯತೆ ಇದೆ ಎಂದು ಸಂಸ್ಥೆ ತಿಳಿಸಿದೆ.
CERT-In ಬಿಡುಗಡೆ ಮಾಡಿದ ಎಚ್ಚರಿಕೆಯಲ್ಲಿ, ಈ ಭದ್ರತಾ ದುರ್ಬಲತೆಗಳನ್ನು ಬಳಸಿಕೊಂಡು ಸೈಬರ್ ದಾಳಿಕೋರರು ಸಿಸ್ಟಮ್‌ಗೆ ಅನಧಿಕೃತ ಪ್ರವೇಶ ಪಡೆಯಬಹುದು, ಖಾಸಗಿ ಮಾಹಿತಿಯನ್ನು ಕದಿಯಬಹುದು ಮತ್ತು ಮಾಲ್‌ವೇರ್ ಅನ್ನು ಸ್ಥಾಪಿಸಬಹುದು ಎಂದು ಹೇಳಲಾಗಿದೆ. ಬಳಕೆದಾರರು ತಮ್ಮ ಬ್ರೌಸರ್ ಅನ್ನು ತಕ್ಷಣವೇ ಅಪ್‌ಡೇಟ್ ಮಾಡಬೇಕು ಹಾಗೂ ಅಪರಿಚಿತ ಲಿಂಕ್‌ಗಳು ಅಥವಾ ಅನುಮಾನಾಸ್ಪದ ವೆಬ್‌ಸೈಟ್‌ಗಳ ಮೇಲೆ ಕ್ಲಿಕ್ ಮಾಡುವುದನ್ನು ತಪ್ಪಿಸಬೇಕು ಎಂದು ಸಂಸ್ಥೆ ಸಲಹೆ ನೀಡಿದೆ.
Google Chrome ವಿಶ್ವದಲ್ಲೇ ಅತ್ಯಧಿಕವಾಗಿ ಬಳಸಲಾಗುವ ಬ್ರೌಸರ್‌ಗಳಲ್ಲಿ ಒಂದಾಗಿರುವುದರಿಂದ ಭಾರತ ಸೇರಿದಂತೆ ಕೋಟ್ಯಾಂತರ ಬಳಕೆದಾರರ ಮೇಲೆ ಇದರ ಪರಿಣಾಮ ಬೀರುವ ಸಾಧ್ಯತೆ ಇದೆ ಎಂದು ತಿಳಿಸಲಾಗಿದೆ.
ಹಳೆಯ ಆವೃತ್ತಿ ಬಳಕೆದಾರರಿಗೆ ಹೆಚ್ಚಿನ ಅಪಾಯ
CERT-In ಪ್ರಕಾರ, ಹಳೆಯ ಆವೃತ್ತಿಗಳನ್ನು ಬಳಸುತ್ತಿರುವ ಬಳಕೆದಾರರಿಗೆ ಅಪಾಯ ಹೆಚ್ಚು ಇದೆ. Linux ನಲ್ಲಿ 148.0.7778.96 ಕ್ಕಿಂತ ಹಳೆಯ ಆವೃತ್ತಿಗಳು ಮತ್ತು Windows ಹಾಗೂ Mac ನಲ್ಲಿ 148.0.7778.96 / 148.0.7778.97 ಕ್ಕಿಂತ ಹಳೆಯ ಆವೃತ್ತಿಗಳು ಹೆಚ್ಚು ಅಪಾಯದಲ್ಲಿವೆ.
ಈ ಆವೃತ್ತಿಗಳಲ್ಲಿರುವ ಭದ್ರತಾ ದುರ್ಬಲತೆಗಳನ್ನು ಬಳಸಿಕೊಂಡು ಸೈಬರ್ ಅಪರಾಧಿಗಳು ಸಿಸ್ಟಮ್ ಅನ್ನು ದೂರದಿಂದ ನಿಯಂತ್ರಿಸಬಹುದು ಎಂದು ಸಂಸ್ಥೆ ಸ್ಪಷ್ಟಪಡಿಸಿದೆ.
ಡೇಟಾ ಕಳವು ಮತ್ತು ಮಾಲ್‌ವೇರ್ ದಾಳಿಯ ಅಪಾಯ
ಸೈಬರ್ ಭದ್ರತಾ ತಜ್ಞರ ಪ್ರಕಾರ, ಈ ದುರ್ಬಲತೆಗಳನ್ನು ಬಳಸಿಕೊಂಡು ಹ್ಯಾಕರ್‌ಗಳು ನಕಲಿ ಅಥವಾ ಹಾನಿಕಾರಕ ವೆಬ್‌ಸೈಟ್‌ಗಳ ಮೂಲಕ ಬಳಕೆದಾರರನ್ನು ಗುರಿಯಾಗಿಸಬಹುದು. ಸೋಂಕಿತ ಲಿಂಕ್‌ಗಳ ಮೇಲೆ ಕ್ಲಿಕ್ ಮಾಡಿಸುವ ಮೂಲಕ ಸಿಸ್ಟಮ್‌ನಲ್ಲಿ ಮಾಲ್‌ವೇರ್ ಸ್ಥಾಪಿಸಬಹುದು ಮತ್ತು ಪಾಸ್‌ವರ್ಡ್‌ಗಳು, ಬ್ಯಾಂಕಿಂಗ್ ವಿವರಗಳು ಹಾಗೂ ಇತರೆ ಸಂವೇದನಾಶೀಲ ಮಾಹಿತಿಯನ್ನು ಕದಿಯಬಹುದು.
ವರದಿಯ ಪ್ರಕಾರ, ದಾಳಿಕೋರರು ಬ್ರೌಸರ್‌ನ ಭದ್ರತಾ ವ್ಯವಸ್ಥೆಯನ್ನು ಬೈಸ್ಪಾಸ್ ಮಾಡುವುದು, ಸಿಸ್ಟಮ್ ಕ್ರ್ಯಾಶ್ ಮಾಡುವುದು ಅಥವಾ ಸಂಪೂರ್ಣವಾಗಿ ಲಾಕ್ ಮಾಡುವುದು ಕೂಡ ಸಾಧ್ಯ. ಇಂತಹ ದಾಳಿಗಳು ಸಾಮಾನ್ಯವಾಗಿ “ಡ್ರೈವ್-ಬೈ ಅಟಾಕ್” ಅಥವಾ “ಫಿಶಿಂಗ್ ಲಿಂಕ್”ಗಳ ಮೂಲಕ ನಡೆಯುತ್ತವೆ. ಈ ಸಂದರ್ಭ ಬಳಕೆದಾರರಿಗೆ ತಮ್ಮ ಡೇಟಾ ಕಳವಾಗುತ್ತಿದೆ ಎಂಬುದು ತಿಳಿಯದೇ ಇರಬಹುದು.
Chrome ನಲ್ಲಿ ಪತ್ತೆಯಾದ ತಾಂತ್ರಿಕ ಭದ್ರತಾ ದುರ್ಬಲತೆಗಳು
ವರದಿ ಪ್ರಕಾರ, Google Chromeನ ಹಲವು ಪ್ರಮುಖ ಘಟಕಗಳಲ್ಲಿ ಭದ್ರತಾ ದುರ್ಬಲತೆಗಳು ಪತ್ತೆಯಾಗಿವೆ. ಇದರಲ್ಲಿ Rendering Engine ಸಂಬಂಧಿತ ದುರ್ಬಲತೆಗಳು, Graphics Processing ಸಮಸ್ಯೆಗಳು, Memory Management ದೋಷಗಳು, Input Validation ಸಮಸ್ಯೆಗಳು ಮತ್ತು Security Policy Bypass ಸಂಬಂಧಿತ ದೋಷಗಳು ಸೇರಿವೆ.
CERT-In ಎಲ್ಲಾ ಬಳಕೆದಾರರು ತಮ್ಮ ಬ್ರೌಸರ್ ಅನ್ನು ತಕ್ಷಣವೇ ಅಪ್‌ಡೇಟ್ ಮಾಡಬೇಕು ಎಂದು ಸೂಚಿಸಿದೆ. ಈ ದುರ್ಬಲತೆಗಳನ್ನು ಸರಿಪಡಿಸಲು Google ಈಗಾಗಲೇ ಭದ್ರತಾ ಪ್ಯಾಚ್‌ಗಳನ್ನು ಬಿಡುಗಡೆ ಮಾಡಿದೆ ಎಂದು ಸಂಸ್ಥೆ ತಿಳಿಸಿದೆ.
