पश्चिम बंगालमध्ये नव्या सरकारच्या स्थापनेची प्रक्रिया आज, शुक्रवारी सुरू होत आहे. कोलकातामध्ये दुपारी २ वाजता भाजप विधिमंडळ पक्षाची महत्त्वाची बैठक आयोजित करण्यात आली आहे. या बैठकीला केंद्रीय गृहमंत्री अमित शाह निरीक्षक म्हणून उपस्थित राहणार असून मोहन चरण माझी यांची सह-निरीक्षक म्हणून नियुक्ती करण्यात आली आहे.
दोन्ही नेते भाजप आमदारांशी चर्चा करून त्यांची मते जाणून घेणार आहेत. बैठकीदरम्यान विधिमंडळ पक्षनेत्याची निवड केली जाणार असून त्यानंतर भाजप नेते राजभवनात जाऊन सरकार स्थापनेचा दावा सादर करणार आहेत.
सूत्रांच्या माहितीनुसार, भाजप विधिमंडळ पक्षाच्या बैठकीत पक्ष आपल्या नेत्याची निवड करेल आणि त्यानंतर राज्यपालांची भेट घेऊन सरकार स्थापनेचा दावा सादर केला जाईल. पक्ष नेतृत्व ही प्रक्रिया जलद आणि संघटित पद्धतीने पूर्ण करण्याच्या तयारीत आहे. या बैठकीत मोहन माझी सह-निरीक्षक म्हणून उपस्थित राहणार आहेत. वरिष्ठ नेते आमदारांची मते जाणून घेणे आणि नेतृत्व निवड प्रक्रियेत महत्त्वाची भूमिका बजावतील, अशी शक्यता व्यक्त केली जात आहे.
भाजपने संभाव्य शपथविधी सोहळ्याच्या तयारीलाही सुरुवात केली आहे. माहितीनुसार, ९ मे रोजी नव्या मुख्यमंत्री आणि मंत्रिमंडळाचा शपथविधी होऊ शकतो. या कार्यक्रमाला पंतप्रधान नरेंद्र मोदी, केंद्रीय गृहमंत्री अमित शाह, संरक्षणमंत्री राजनाथ सिंह यांच्यासह अनेक वरिष्ठ केंद्रीय मंत्र्यांच्या उपस्थितीची शक्यता आहे. तसेच देशातील विविध राज्यांचे मुख्यमंत्रीही या कार्यक्रमाला उपस्थित राहू शकतात.
पश्चिम बंगालमध्ये भाजपची सरकार स्थापन झाल्यास राज्याच्या राजकारणात मोठा बदल मानला जाईल. दीर्घकाळ प्रादेशिक पक्षांचा प्रभाव राहिलेल्या राज्यात भाजपची सत्ता स्थापन होणे राष्ट्रीय राजकारणाच्या दृष्टीनेही महत्त्वाचे मानले जात आहे. मुख्यमंत्रीपदासाठी पक्षामध्ये अनेक नावांची चर्चा सुरू असली तरी अंतिम निर्णय विधिमंडळ पक्षाच्या बैठकीनंतर स्पष्ट होणार आहे.
दरम्यान, दक्षिण भारतातील तामिळनाडूमध्येही सरकार स्थापनेच्या पार्श्वभूमीवर राजकीय हालचालींना वेग आला आहे. अभिनेते आणि राजकारणी विजय यांच्या तमिळगा वेत्री कळघम (TVK) पक्षाकडून सातत्याने पाठिंबा मिळवण्याचे प्रयत्न सुरू आहेत. सूत्रांच्या माहितीनुसार, TVK नेत्यांनी डावे पक्ष CPI आणि CPM यांच्या प्रतिनिधींशी भेट घेतली आहे. आज होणाऱ्या दोन्ही पक्षांच्या बैठकीत विजय यांना पाठिंबा देण्याबाबत निर्णय घेतला जाऊ शकतो.
