कायदा आणि व्यवस्थापन अभ्यासक्रमांमध्ये प्रवेशासाठी होणाऱ्या CLAT 2027 आणि XAT 2027 परीक्षांच्या तारखा तसेच अर्जाचे वेळापत्रक जाहीर करण्यात आले आहे. दोन्ही प्रवेश परीक्षांच्या अभ्यासक्रम आणि परीक्षा पद्धतीमध्ये कोणताही बदल करण्यात आलेला नाही.
कन्सोर्टियम ऑफ नॅशनल लॉ युनिव्हर्सिटीज (Consortium of NLUs) ने CLAT 2027 परीक्षेचे वेळापत्रक जाहीर केले आहे. ही परीक्षा 6 डिसेंबर 2026 रोजी दुपारी 2 ते सायंकाळी 4 या वेळेत होणार आहे. इच्छुक उमेदवार 3 ऑगस्टपासून ऑनलाइन अर्ज करू शकतील, तर अर्ज करण्याची अंतिम तारीख 31 ऑक्टोबर 2026 निश्चित करण्यात आली आहे.
यंदाही परीक्षा पद्धती आणि अभ्यासक्रम पूर्वीप्रमाणेच कायम ठेवण्यात आले आहेत. परीक्षेत एकूण 120 बहुपर्यायी प्रश्न (MCQs) विचारले जातील आणि परीक्षेचा कालावधी 2 तास असेल. प्रश्नपत्रिकेत इंग्लिश लँग्वेज, करंट अफेअर्स आणि जनरल नॉलेज, लीगल रिझनिंग, लॉजिकल रिझनिंग आणि क्वांटिटेटिव्ह टेक्निक्स या विषयांचा समावेश असेल. CLAT गुणांच्या आधारे देशातील 24 नॅशनल लॉ युनिव्हर्सिटीज (NLUs) तसेच अनेक प्रमुख विधी संस्थांमध्ये प्रवेश दिला जाईल.
XLRI जमशेदपूरने Xavier Aptitude Test (XAT) 2027 परीक्षेची तारीखही जाहीर केली आहे. ही परीक्षा 4 जानेवारी 2027 रोजी संगणक-आधारित (CBT) पद्धतीने आयोजित केली जाईल. या परीक्षेसाठी अर्ज प्रक्रिया सुरू झाली असून उमेदवार 5 डिसेंबर 2026 पर्यंत consortiumofnlus.ac.in वर ऑनलाइन अर्ज करू शकतात. अर्ज शुल्क 2,300 रुपये निश्चित करण्यात आले आहे.
या परीक्षेसाठी कोणत्याही मान्यताप्राप्त विद्यापीठातून पदवीधर किंवा अंतिम वर्षात शिकणारे विद्यार्थी अर्ज करण्यास पात्र आहेत. प्रश्नपत्रिकेत Verbal and Logical Ability, Decision Making, Quantitative Ability and Data Interpretation तसेच General Knowledge या प्रमुख विभागांचा समावेश असेल. त्यापैकी Decision Making विभाग ही XAT परीक्षेची प्रमुख वैशिष्ट्ये मानली जाते.
XAT 2027 च्या गुणांच्या आधारे XLRI जमशेदपूर व्यतिरिक्त XIM University, IMT गाझियाबाद, TAPMI मणिपाल, GIM गोवा, Great Lakes, FORE School of Management, LIBA यांच्यासह 250 हून अधिक प्रतिष्ठित बिझनेस स्कूल्समध्ये MBA आणि PGDM अभ्यासक्रमांसाठी प्रवेश दिला जाईल.
शिक्षण तज्ज्ञांच्या मते, दोन्ही परीक्षांच्या अभ्यासक्रम आणि परीक्षा पद्धतीमध्ये कोणताही बदल नसल्याने उमेदवार आपली सध्याची तयारीची रणनीती कायम ठेवू शकतात. तसेच, अंतिम तारखेची वाट न पाहता वेळेत अर्ज पूर्ण केल्यास तांत्रिक अडचणी टाळता येतील आणि परीक्षेच्या तयारीवर लक्ष केंद्रित करता येईल.
