ਆਈਸੀਸੀ ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ (WTC) ਦੀ ਅੰਕ ਸੂਚੀ ਵਿੱਚ ਬੰਗਲਾਦੇਸ਼ ਅਤੇ ਪਾਕਿਸਤਾਨ ਵਿਚਾਲੇ ਖੇਡੇ ਗਏ ਪਹਿਲੇ ਟੈਸਟ ਤੋਂ ਬਾਅਦ ਵੱਡਾ ਬਦਲਾਅ ਵੇਖਣ ਨੂੰ ਮਿਲਿਆ ਹੈ। ਪਾਕਿਸਤਾਨ ਖ਼ਿਲਾਫ਼ ਜਿੱਤ ਤੋਂ ਬਾਅਦ ਬੰਗਲਾਦੇਸ਼ ਨੇ ਆਪਣੀ ਸਥਿਤੀ ਵਿੱਚ ਸੁਧਾਰ ਕੀਤਾ ਹੈ, ਜਦਕਿ ਪਾਕਿਸਤਾਨ ਨੂੰ ਅੰਕ ਪ੍ਰਤੀਸ਼ਤ ਅਤੇ ਰੈਂਕਿੰਗ ਦੋਵੇਂ ਵਿੱਚ ਨੁਕਸਾਨ ਝੱਲਣਾ ਪਿਆ ਹੈ।
ਤਾਜ਼ਾ ਅੰਕ ਸੂਚੀ ਮੁਤਾਬਕ ਆਸਟ੍ਰੇਲੀਆ 87.50 ਅੰਕ ਪ੍ਰਤੀਸ਼ਤ ਨਾਲ ਪਹਿਲੇ ਸਥਾਨ ‘ਤੇ ਕਾਇਮ ਹੈ। ਨਿਊਜ਼ੀਲੈਂਡ 77.78 PCT ਨਾਲ ਦੂਜੇ ਸਥਾਨ ‘ਤੇ ਹੈ। ਦੱਖਣੀ ਅਫਰੀਕਾ 75.0 PCT ਨਾਲ ਤੀਜੇ ਸਥਾਨ ‘ਤੇ ਬਣਿਆ ਹੋਇਆ ਹੈ, ਜਦਕਿ ਸ੍ਰੀਲੰਕਾ 66.67 PCT ਨਾਲ ਚੌਥੇ ਸਥਾਨ ‘ਤੇ ਹੈ।
ਭਾਰਤ ਨੇ ਕੋਈ ਮੈਚ ਖੇਡੇ ਬਿਨਾਂ ਹੀ ਅਪਡੇਟ ਕੀਤੀ ਅੰਕ ਸੂਚੀ ਵਿੱਚ ਆਪਣੀ ਸਥਿਤੀ ਮਜ਼ਬੂਤ ਕੀਤੀ ਹੈ ਅਤੇ ਹੁਣ ਟੀਮ ਪੰਜਵੇਂ ਸਥਾਨ ‘ਤੇ ਪਹੁੰਚ ਗਈ ਹੈ। ਭਾਰਤ ਦਾ ਮੌਜੂਦਾ ਅੰਕ ਪ੍ਰਤੀਸ਼ਤ 48.15 ਹੈ। ਭਾਰਤ ਨੇ ਹੁਣ ਤੱਕ 9 ਟੈਸਟ ਮੈਚ ਖੇਡੇ ਹਨ, ਜਿਨ੍ਹਾਂ ਵਿੱਚ 4 ਜਿੱਤ, 4 ਹਾਰ ਅਤੇ 1 ਮੈਚ ਡਰਾਅ ਰਿਹਾ ਹੈ। ਪਹਿਲਾਂ ਵੱਧ ਮੈਚ ਖੇਡਣ ਕਾਰਨ ਭਾਰਤ ਦੀ ਰੈਂਕਿੰਗ ਪ੍ਰਭਾਵਿਤ ਹੋਈ ਸੀ, ਪਰ ਪਾਕਿਸਤਾਨ ਦੀ ਹਾਰ ਤੋਂ ਬਾਅਦ ਸਥਿਤੀ ਬਦਲ ਗਈ ਹੈ।
ਇਸ ਮੈਚ ਤੋਂ ਪਹਿਲਾਂ ਪਾਕਿਸਤਾਨ ਦਾ ਅੰਕ ਪ੍ਰਤੀਸ਼ਤ 50 ਸੀ। ਟੀਮ ਨੇ 2 ਮੈਚਾਂ ਵਿੱਚ 1 ਜਿੱਤ ਅਤੇ 1 ਹਾਰ ਦਰਜ ਕੀਤੀ ਸੀ। ਪਰ ਬੰਗਲਾਦੇਸ਼ ਖ਼ਿਲਾਫ਼ ਪਹਿਲੇ ਟੈਸਟ ਵਿੱਚ ਹਾਰ ਤੋਂ ਬਾਅਦ ਪਾਕਿਸਤਾਨ ਦਾ PCT ਘਟ ਕੇ 33.33 ਰਹਿ ਗਿਆ ਹੈ। ਹੁਣ ਪਾਕਿਸਤਾਨ ਨੇ 3 ਮੈਚਾਂ ਵਿੱਚ 1 ਜਿੱਤ ਅਤੇ 2 ਹਾਰ ਦਰਜ ਕੀਤੀਆਂ ਹਨ, ਜਿਸ ਕਾਰਨ ਟੀਮ ਪੰਜਵੇਂ ਸਥਾਨ ਤੋਂ ਖਿਸਕ ਕੇ ਸੱਤਵੇਂ ਸਥਾਨ ‘ਤੇ ਪਹੁੰਚ ਗਈ ਹੈ।
ਬੰਗਲਾਦੇਸ਼ ਨੇ ਇਸ ਟੈਸਟ ਜਿੱਤ ਨਾਲ ਅੰਕ ਸੂਚੀ ਵਿੱਚ ਵੱਡੀ ਛਾਲ ਮਾਰੀ ਹੈ। ਪਹਿਲਾਂ ਟੀਮ ਦਾ PCT ਕੇਵਲ 16.67 ਸੀ, ਜੋ ਹੁਣ ਵੱਧ ਕੇ 44.44 ਹੋ ਗਿਆ ਹੈ। ਇਸ ਜਿੱਤ ਤੋਂ ਬਾਅਦ ਬੰਗਲਾਦੇਸ਼ ਅੱਠਵੇਂ ਸਥਾਨ ਤੋਂ ਛੇਵੇਂ ਸਥਾਨ ‘ਤੇ ਪਹੁੰਚ ਗਿਆ ਹੈ।
ਇਸ ਬਦਲਾਅ ਦਾ ਅਸਰ ਇੰਗਲੈਂਡ ‘ਤੇ ਵੀ ਪਿਆ ਹੈ। ਇੰਗਲੈਂਡ ਇੱਕ ਸਥਾਨ ਹੇਠਾਂ ਖਿਸਕ ਕੇ ਹੁਣ ਅੱਠਵੇਂ ਨੰਬਰ ‘ਤੇ ਪਹੁੰਚ ਗਿਆ ਹੈ। WTC ਦੀ ਦੌੜ ਵਿੱਚ ਹਰ ਟੈਸਟ ਮੈਚ ਦਾ ਨਤੀਜਾ ਟੀਮਾਂ ਦੀ ਰੈਂਕਿੰਗ ‘ਤੇ ਸਿੱਧਾ ਅਸਰ ਪਾ ਰਿਹਾ ਹੈ।
