ਦੱਖਣੀ ਇਰਾਨ ਵਿੱਚ ਦੁਰਘਟਨਾ ਦਾ ਸ਼ਿਕਾਰ ਹੋਏ ਅਮਰੀਕੀ F-15 ਫਾਈਟਰ ਜੈੱਟ ਦੇ ਪਾਇਲਟ ਨੂੰ ਖੋਜਣ ਲਈ ਸੰਯੁਕਤ ਰਾਜ ਅਮਰੀਕਾ ਨੇ ‘Ghost Murmur’ ਤਕਨਾਲੋਜੀ ਦੀ ਵਰਤੋਂ ਕੀਤੀ। ਇਸ ਓਪਰੇਸ਼ਨ ਵਿੱਚ CIA ਅਤੇ ਅਮਰੀਕੀ ਫੌਜ ਸ਼ਾਮਲ ਸਨ, ਜਿਨ੍ਹਾਂ ਨੇ ਦੋ ਦਿਨਾਂ ਤੋਂ ਲਾਪਤਾ ਪਾਇਲਟ ਦੀ ਲੋਕੇਸ਼ਨ ਕਰੀਬ 40 ਮੀਲ ਦੂਰੋਂ ਟ੍ਰੈਕ ਕੀਤੀ। ਪਾਇਲਟ ਦੁਸ਼ਮਣ ਖੇਤਰ ਵਿੱਚ ਪਹਾੜੀ ਦਰਾਰਾਂ ਵਿੱਚ ਲੁਕਿਆ ਹੋਇਆ ਸੀ, ਜਦਕਿ ਇਰਾਨੀ ਫੌਜ ਉਸ ਦੀ ਤਲਾਸ਼ ਵਿੱਚ ਲੱਗੀ ਹੋਈ ਸੀ। ਮੁਸ਼ਕਲ ਭੂਗੋਲਿਕ ਹਾਲਾਤਾਂ ਵਿੱਚ ਰਵਾਇਤੀ ਤਰੀਕੇ ਕਾਰਗਰ ਨਾ ਹੋਣ ਕਾਰਨ ਇਸ ਤਕਨਾਲੋਜੀ ਦੀ ਵਰਤੋਂ ਕੀਤੀ ਗਈ।
ਰਿਪੋਰਟਾਂ ਮੁਤਾਬਕ, ਅਮਰੀਕੀ F-15 ਫਾਈਟਰ ਜੈੱਟ ਨੂੰ ਦੱਖਣੀ ਇਰਾਨ ਵਿੱਚ ਮਾਰ ਦਿੱਤਾ ਗਿਆ ਸੀ। ਹਾਦਸੇ ਤੋਂ ਬਾਅਦ Dude 44 Bravo ਨਾਮ ਨਾਲ ਜਾਣੇ ਜਾਣ ਵਾਲੇ ਪਾਇਲਟ ਨੇ ਇਰਾਨੀ ਫੌਜ ਤੋਂ ਬਚਣ ਲਈ ਪਹਾੜੀ ਚਿਰਾਂ ਵਿੱਚ ਸ਼ਰਨ ਲਈ। ਇਰਾਨੀ ਸੁਰੱਖਿਆ ਏਜੰਸੀਆਂ ਉਸ ਦੀ ਲਗਾਤਾਰ ਤਲਾਸ਼ ਕਰ ਰਹੀਆਂ ਸਨ ਅਤੇ ਉਸ ‘ਤੇ ਇਨਾਮ ਵੀ ਘੋਸ਼ਿਤ ਕੀਤਾ ਗਿਆ ਸੀ। ਅਜਿਹੀ ਸਥਿਤੀ ਵਿੱਚ ਪਾਇਲਟ ਨੂੰ ਜਿੰਦਾ ਲੱਭਣਾ ਅਮਰੀਕੀ ਏਜੰਸੀਆਂ ਲਈ ਵੱਡੀ ਚੁਣੌਤੀ ਸੀ।
ਇਸ ਪੂਰੇ ਓਪਰੇਸ਼ਨ ਵਿੱਚ ‘Ghost Murmur’ ਤਕਨਾਲੋਜੀ ਨੇ ਮੁੱਖ ਭੂਮਿਕਾ ਨਿਭਾਈ। ਇਹ ਪ੍ਰਣਾਲੀ ਮਨੁੱਖ ਦੇ ਦਿਲ ਦੀ ਧੜਕਨ ਤੋਂ ਨਿਕਲਣ ਵਾਲੇ ਸੁਖਮ ਇਲੈਕਟ੍ਰੋਮੈਗਨੇਟਿਕ ਸੰਕੇਤਾਂ ਨੂੰ ਪਕੜ ਸਕਦੀ ਹੈ, ਜਿਨ੍ਹਾਂ ਨੂੰ ਆਮ ਉਪਕਰਣ ਪਕੜ ਨਹੀਂ ਸਕਦੇ। ਇਹ ਤਕਨਾਲੋਜੀ ਕਵਾਂਟਮ ਮੈਗਨੇਟੋਮੀਟਰੀ ਅਤੇ ਆਰਟੀਫੀਸ਼ਲ ਇੰਟੈਲੀਜੈਂਸ ਦੀ ਵਰਤੋਂ ਕਰਦੀ ਹੈ, ਜਿਸ ਨਾਲ ਇਹ ਭੀੜ ਜਾਂ ਸ਼ੋਰ ਵਿੱਚ ਵੀ ਕਿਸੇ ਇਕ ਵਿਅਕਤੀ ਦੀ ਧੜਕਨ ਦੀ ਪਛਾਣ ਕਰ ਸਕਦੀ ਹੈ। ਘੱਟ ਇਲੈਕਟ੍ਰੋਮੈਗਨੇਟਿਕ ਦਖਲ ਵਾਲੇ ਖੇਤਰਾਂ ਵਿੱਚ ਇਹ ਹੋਰ ਪ੍ਰਭਾਵਸ਼ਾਲੀ ਮੰਨੀ ਜਾਂਦੀ ਹੈ।
ਮੀਡੀਆ ਰਿਪੋਰਟਾਂ ਅਨੁਸਾਰ, ‘Ghost Murmur’ ਨੇ ਕਰੀਬ 40 ਮੀਲ ਦੂਰੋਂ ਪਾਇਲਟ ਦੀ ਸਹੀ ਲੋਕੇਸ਼ਨ ਦਾ ਸੰਕੇਤ ਦਿੱਤਾ। ਰੈਸਕਿਊ ਓਪਰੇਸ਼ਨ ਵਿੱਚ ਸੈਂਕੜੇ ਅਮਰੀਕੀ ਸੈਨਿਕ ਸ਼ਾਮਲ ਸਨ। ਮਿਸ਼ਨ ਦੌਰਾਨ ਕੁਝ ਜਹਾਜ਼ਾਂ ਦੇ ਫਸ ਜਾਣ ਦੀ ਸਮੱਸਿਆ ਵੀ ਆਈ, ਜਿਨ੍ਹਾਂ ਨੂੰ ਬਾਅਦ ਵਿੱਚ ਨਸ਼ਟ ਕਰਨਾ ਪਿਆ। ਹਾਲਾਂਕਿ, ਆਖ਼ਿਰਕਾਰ ਪਾਇਲਟ ਸਮੇਤ ਸਾਰੇ ਅਮਰੀਕੀ ਸੁਰੱਖਿਅਤ ਵਾਪਸ ਆ ਗਏ।
