ਦੁਨੀਆ ਭਰ ਵਿੱਚ ਵਰਤੇ ਜਾ ਰਹੇ ਕਈ Android ਸਮਾਰਟਫੋਨਾਂ ਵਿੱਚ ਇੱਕ ਗੰਭੀਰ ਸੁਰੱਖਿਆ ਖਤਰਾ ਸਾਹਮਣੇ ਆਇਆ ਹੈ। ਸਾਈਬਰ ਸੁਰੱਖਿਆ ਫਰਮ Ledger ਦੇ ਖੋਜਕਰਤਾਵਾਂ ਨੇ MediaTek ਚਿਪਸੈਟ ਵਿੱਚ ਇੱਕ ਅਜਿਹੀ ਕਮਜ਼ੋਰੀ ਦੀ ਪਛਾਣ ਕੀਤੀ ਹੈ ਜਿਸ ਨਾਲ ਹਮਲਾਵਰ ਸਿਰਫ਼ USB ਕਨੈਕਸ਼ਨ ਰਾਹੀਂ ਫੋਨ ਦੇ ਸੁਰੱਖਿਅਤ ਡਾਟਾ ਤੱਕ ਪਹੁੰਚ ਹਾਸਲ ਕਰ ਸਕਦੇ ਹਨ। ਟੈਸਟਿੰਗ ਦੌਰਾਨ CMF Phone 1 ਵਰਗੇ ਡਿਵਾਈਸ ’ਤੇ ਕੀਤੇ ਗਏ ਵਿਸ਼ਲੇਸ਼ਣ ਵਿੱਚ ਪਤਾ ਲੱਗਿਆ ਕਿ 45 ਸਕਿੰਟਾਂ ਦੇ ਅੰਦਰ ਐਨਕ੍ਰਿਪਟਡ ਸਟੋਰੇਜ ਤੱਕ ਪਹੁੰਚ ਸੰਭਵ ਹੋ ਸਕਦੀ ਹੈ। ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਇਸ ਕਿਸਮ ਦੇ ਚਿਪ ਵਰਤਣ ਵਾਲੇ ਲਗਭਗ 25 ਫੀਸਦੀ Android ਯੂਜ਼ਰ ਇਸ ਖਾਮੀ ਨਾਲ ਪ੍ਰਭਾਵਿਤ ਹੋ ਸਕਦੇ ਹਨ, ਜਿਸ ਕਰਕੇ ਕੰਪਨੀ ਨੇ ਤੁਰੰਤ ਸਿਸਟਮ ਅਪਡੇਟ ਕਰਨ ਦੀ ਸਲਾਹ ਦਿੱਤੀ ਹੈ।
ਸਾਈਬਰ ਸੁਰੱਖਿਆ ਫਰਮ Ledger ਦੇ Chief Technology Officer Charles Guillemet ਨੇ ਇਸ ਸੁਰੱਖਿਆ ਖਾਮੀ ਬਾਰੇ ਚੇਤਾਵਨੀ ਜਾਰੀ ਕੀਤੀ ਹੈ। ਕੰਪਨੀ ਦੇ ਰਿਸਰਚਰਾਂ ਨੇ ਟੈਸਟ ਦੌਰਾਨ ਪਾਇਆ ਕਿ ਕੁਝ MediaTek ਚਿਪਸੈਟ ਵਾਲੇ ਫੋਨਾਂ ਵਿੱਚ ਸੁਰੱਖਿਆ ਪ੍ਰਣਾਲੀ ਨੂੰ ਆਸਾਨੀ ਨਾਲ ਬਾਈਪਾਸ ਕੀਤਾ ਜਾ ਸਕਦਾ ਹੈ।
ਇਹ ਟੈਸਟ CMF Phone 1 ’ਤੇ ਕੀਤਾ ਗਿਆ ਸੀ, ਜਿਸ ਵਿੱਚ MediaTek Dimensity 7300 ਪ੍ਰੋਸੈਸਰ ਵਰਤਿਆ ਗਿਆ ਹੈ। ਰਿਸਰਚ ਟੀਮ ਦੇ ਅਨੁਸਾਰ ਕੇਵਲ 45 ਸਕਿੰਟਾਂ ਦੇ ਅੰਦਰ ਫੋਨ ਦੀ ਐਨਕ੍ਰਿਪਟਡ ਸਟੋਰੇਜ ਤੱਕ ਪਹੁੰਚ ਬਣਾਈ ਜਾ ਸਕਦੀ ਹੈ, ਅਤੇ ਇਹ ਤਦ ਵੀ ਸੰਭਵ ਦੱਸਿਆ ਗਿਆ ਹੈ ਜਦੋਂ ਡਿਵਾਈਸ ਬੰਦ ਹੋਵੇ।
ਇਸ ਸੁਰੱਖਿਆ ਖਾਮੀ ਦਾ ਸਭ ਤੋਂ ਚਿੰਤਾਜਨਕ ਪੱਖ ਇਹ ਹੈ ਕਿ ਹਮਲਾਵਰਾਂ ਨੂੰ ਕਿਸੇ ਵੀ ਕਿਸਮ ਦਾ ਮਾਲਵੇਅਰ ਇੰਸਟਾਲ ਕਰਨ ਦੀ ਲੋੜ ਨਹੀਂ ਪੈਂਦੀ। ਉਨ੍ਹਾਂ ਨੂੰ ਸਿਰਫ਼ ਕੁਝ ਸਕਿੰਟਾਂ ਲਈ ਫੋਨ ਨੂੰ ਕੰਪਿਊਟਰ ਨਾਲ USB ਰਾਹੀਂ ਜੋੜਨਾ ਹੁੰਦਾ ਹੈ ਅਤੇ ਉਹ ਮਹੱਤਵਪੂਰਨ ਜਾਣਕਾਰੀ ਤੱਕ ਪਹੁੰਚ ਹਾਸਲ ਕਰ ਸਕਦੇ ਹਨ। ਇਸ ਪ੍ਰਕਿਰਿਆ ਰਾਹੀਂ ਫੋਨ ਵਿੱਚ ਮੌਜੂਦ PIN, ਪਾਸਵਰਡ ਅਤੇ ਹੋਰ ਸੁਰੱਖਿਅਤ ਡਾਟਾ ਨੂੰ ਡੀਕ੍ਰਿਪਟ ਕੀਤਾ ਜਾ ਸਕਦਾ ਹੈ। ਅਜਿਹੇ ਹਾਲਾਤ ਵਿੱਚ ਜੇ ਫੋਨ ਚੋਰੀ ਹੋ ਜਾਵੇ ਜਾਂ ਕੁਝ ਸਮੇਂ ਲਈ ਕਿਸੇ ਹੋਰ ਦੇ ਹੱਥ ਲੱਗ ਜਾਵੇ ਤਾਂ ਨਿੱਜੀ ਡਾਟਾ ਖਤਰੇ ਵਿੱਚ ਪੈ ਸਕਦਾ ਹੈ।
ਟੈਕ ਉਦਯੋਗ ਦੇ ਅੰਦਾਜ਼ਿਆਂ ਮੁਤਾਬਕ ਦੁਨੀਆ ਭਰ ਦੇ ਲਗਭਗ 25 ਫੀਸਦੀ Android ਸਮਾਰਟਫੋਨਾਂ ਵਿੱਚ MediaTek ਪ੍ਰੋਸੈਸਰ ਵਰਤੇ ਜਾਂਦੇ ਹਨ। ਇਸਦਾ ਅਰਥ ਹੈ ਕਿ ਵੱਡੀ ਗਿਣਤੀ ਵਿੱਚ ਯੂਜ਼ਰ ਇਸ ਸੁਰੱਖਿਆ ਖਾਮੀ ਨਾਲ ਪ੍ਰਭਾਵਿਤ ਹੋ ਸਕਦੇ ਹਨ।
ਹਾਲਾਂਕਿ ਕੰਪਨੀ ਨੇ ਇਸ ਸਮੱਸਿਆ ਨੂੰ ਸਵੀਕਾਰ ਕਰਦੇ ਹੋਏ ਇੱਕ ਸੁਰੱਖਿਆ ਪੈਚ ਜਾਰੀ ਕੀਤਾ ਹੈ। MediaTek ਨੇ ਸਮਾਰਟਫੋਨ ਨਿਰਮਾਤਾਵਾਂ ਅਤੇ ਯੂਜ਼ਰਾਂ ਨੂੰ ਸਲਾਹ ਦਿੱਤੀ ਹੈ ਕਿ ਉਹ ਆਪਣੇ ਡਿਵਾਈਸ ਨੂੰ ਜਲਦੀ ਤੋਂ ਜਲਦੀ ਨਵੇਂ ਸਿਸਟਮ ਅਪਡੇਟ ’ਤੇ ਅਪਗ੍ਰੇਡ ਕਰਨ, ਤਾਂ ਜੋ ਇਸ ਖਤਰੇ ਤੋਂ ਬਚਿਆ ਜਾ ਸਕੇ।
