ਮਾਈਕ੍ਰੋਸਾਫਟ ਨੇ QR ਕੋਡ ਫਿਸ਼ਿੰਗ ਸਕੈਮ ਨੂੰ ਲੈ ਕੇ ਨਵੀਂ ਚੇਤਾਵਨੀ ਜਾਰੀ ਕੀਤੀ ਹੈ। ਫਰਜ਼ੀ ਈਮੇਲ ਅਤੇ ਨਕਲੀ ਲਾਗਇਨ ਪੇਜਾਂ ਰਾਹੀਂ ਹੈਕਰ ਯੂਜ਼ਰਾਂ ਦੀ ਲਾਗਇਨ ਜਾਣਕਾਰੀ ਅਤੇ ਸੰਵੇਦਨਸ਼ੀਲ ਡਾਟਾ ਚੋਰੀ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ।
ਮਾਈਕ੍ਰੋਸਾਫਟ ਦੇ ਸਾਈਬਰ ਸੁਰੱਖਿਆ ਮਾਹਿਰਾਂ ਦੇ ਅਨੁਸਾਰ, ਹਮਲਾਵਰ ਪੇਸ਼ੇਵਰ ਤਰੀਕੇ ਨਾਲ ਤਿਆਰ ਕੀਤੀਆਂ ਨਕਲੀ ਈਮੇਲਾਂ ਅਤੇ PDF ਫਾਈਲਾਂ ਦੀ ਮਦਦ ਨਾਲ QR ਕੋਡ ਰਾਹੀਂ ਯੂਜ਼ਰਾਂ ਨੂੰ ਫਰਜ਼ੀ ਲਾਗਇਨ ਪੇਜਾਂ ਵੱਲ ਭੇਜ ਰਹੇ ਹਨ। ਇਨ੍ਹਾਂ ਸਕੈਮਾਂ ਰਾਹੀਂ ਪਾਸਵਰਡ, ਅਕਾਊਂਟ ਐਕਸੈੱਸ ਅਤੇ ਹੋਰ ਸੰਵੇਦਨਸ਼ੀਲ ਜਾਣਕਾਰੀ ਹਾਸਲ ਕੀਤੀ ਜਾ ਰਹੀ ਹੈ।
ਮਾਈਕ੍ਰੋਸਾਫਟ ਨੇ ਕਿਹਾ ਕਿ ਸਾਈਬਰ ਅਪਰਾਧੀ ਈਮੇਲਾਂ ਵਿੱਚ QR ਕੋਡ ਭੇਜ ਕੇ ਲੋਕਾਂ ਨੂੰ ਫਰਜ਼ੀ ਵੈੱਬਸਾਈਟਾਂ ਤੱਕ ਲੈ ਕੇ ਜਾ ਰਹੇ ਹਨ। ਇਹ ਈਮੇਲਾਂ ਅਕਸਰ HR ਵਿਭਾਗ, IT ਸਹਾਇਤਾ ਜਾਂ ਕੰਪਨੀ ਮੈਨੇਜਮੈਂਟ ਵੱਲੋਂ ਭੇਜੇ ਗਏ ਅਧਿਕਾਰਕ ਸੁਨੇਹਿਆਂ ਵਾਂਗ ਦਿਖਾਈ ਦਿੰਦੀਆਂ ਹਨ।
ਈਮੇਲਾਂ ਵਿੱਚ ਅਕਾਊਂਟ ਬਲੌਕ ਹੋਣ, ਸੁਰੱਖਿਆ ਅਪਡੇਟ ਜਾਂ ਲਾਜ਼ਮੀ ਕੰਪਲਾਇੰਸ ਵਰਗੇ ਮਸਲਿਆਂ ਦਾ ਹਵਾਲਾ ਦੇ ਕੇ ਯੂਜ਼ਰਾਂ ਉੱਤੇ ਤੁਰੰਤ ਕਾਰਵਾਈ ਕਰਨ ਲਈ ਦਬਾਅ ਬਣਾਇਆ ਜਾਂਦਾ ਹੈ। ਜਿਵੇਂ ਹੀ ਯੂਜ਼ਰ QR ਕੋਡ ਸਕੈਨ ਕਰਦਾ ਹੈ, ਉਸਨੂੰ ਨਕਲੀ ਲਾਗਇਨ ਪੇਜ ਉੱਤੇ ਰੀਡਾਇਰੈਕਟ ਕਰ ਦਿੱਤਾ ਜਾਂਦਾ ਹੈ, ਜਿੱਥੇ ਉਸਦੀ ਲਾਗਇਨ ਜਾਣਕਾਰੀ ਚੋਰੀ ਹੋ ਸਕਦੀ ਹੈ।
ਮਾਈਕ੍ਰੋਸਾਫਟ ਦੇ ਸੁਰੱਖਿਆ ਖੋਜਕਾਰਾਂ ਦੇ ਅਨੁਸਾਰ, ਹੁਣ ਤੱਕ 13,000 ਕੰਪਨੀਆਂ ਦੇ 35,000 ਤੋਂ ਵੱਧ ਯੂਜ਼ਰ ਇਸ ਤਰ੍ਹਾਂ ਦੇ ਸਕੈਮਾਂ ਦਾ ਨਿਸ਼ਾਨ ਬਣ ਚੁੱਕੇ ਹਨ। ਹਮਲਾਵਰ ਸਿਰਫ਼ ਪਾਸਵਰਡ ਹੀ ਨਹੀਂ, ਸੈਸ਼ਨ ਟੋਕਨ ਅਤੇ ਹੋਰ ਸੰਵੇਦਨਸ਼ੀਲ ਜਾਣਕਾਰੀ ਵੀ ਪ੍ਰਾਪਤ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ।
ਕੰਪਨੀ ਨੇ ਕਿਹਾ ਕਿ ਕੁਝ ਮਾਮਲਿਆਂ ਵਿੱਚ ਟੂ-ਸਟੈਪ ਵੇਰੀਫਿਕੇਸ਼ਨ ਚਾਲੂ ਹੋਣ ਦੇ ਬਾਵਜੂਦ ਵੀ ਅਕਾਊਂਟ ਤੱਕ ਪਹੁੰਚ ਬਣਾਉਣ ਦੀ ਸੰਭਾਵਨਾ ਸਾਹਮਣੇ ਆਈ ਹੈ। ਸਾਈਬਰ ਸੁਰੱਖਿਆ ਮਾਹਿਰਾਂ ਦੇ ਅਨੁਸਾਰ, QR ਕੋਡ ਆਮ ਤੌਰ ‘ਤੇ ਸੁਰੱਖਿਅਤ ਮੰਨੇ ਜਾਂਦੇ ਹਨ, ਜਿਸ ਕਾਰਨ ਕਈ ਯੂਜ਼ਰ ਬਿਨਾਂ ਜਾਂਚ ਕੀਤੇ ਇਨ੍ਹਾਂ ਨੂੰ ਸਕੈਨ ਕਰ ਲੈਂਦੇ ਹਨ ਅਤੇ ਇਸੇ ਕਾਰਨ ਇਹ ਸਕੈਮ ਤੇਜ਼ੀ ਨਾਲ ਫੈਲ ਰਹੇ ਹਨ।
ਸਾਈਬਰ ਸੁਰੱਖਿਆ ਮਾਹਿਰਾਂ ਨੇ ਯੂਜ਼ਰਾਂ ਨੂੰ ਅਣਜਾਣ ਈਮੇਲਾਂ ਜਾਂ ਸੁਨੇਹਿਆਂ ਵਿੱਚ ਮਿਲੇ QR ਕੋਡ ਸਕੈਨ ਨਾ ਕਰਨ ਦੀ ਸਲਾਹ ਦਿੱਤੀ ਹੈ। ਕਿਸੇ ਵੀ ਲਿੰਕ ਜਾਂ ਲਾਗਇਨ ਪੇਜ ‘ਤੇ ਜਾਣ ਤੋਂ ਪਹਿਲਾਂ ਭੇਜਣ ਵਾਲੇ ਦੀ ਪਹਿਚਾਣ ਦੀ ਜਾਂਚ ਕਰਨ ਅਤੇ ਘਬਰਾਹਟ ਜਾਂ ਤੁਰੰਤ ਕਾਰਵਾਈ ਲਈ ਦਬਾਅ ਬਣਾਉਣ ਵਾਲੀਆਂ ਈਮੇਲਾਂ ਤੋਂ ਸਾਵਧਾਨ ਰਹਿਣ ਲਈ ਕਿਹਾ ਗਿਆ ਹੈ।
ਮਾਹਿਰਾਂ ਨੇ ਫੋਨ ਅਤੇ ਸਿਸਟਮ ਨੂੰ ਨਿਯਮਿਤ ਤੌਰ ‘ਤੇ ਅਪਡੇਟ ਰੱਖਣ ਅਤੇ ਸਾਰੇ ਮਹੱਤਵਪੂਰਨ ਅਕਾਊਂਟਾਂ ਵਿੱਚ ਟੂ-ਫੈਕਟਰ ਔਥੈਂਟੀਕੇਸ਼ਨ ਚਾਲੂ ਰੱਖਣ ਦੀ ਵੀ ਸਿਫਾਰਸ਼ ਕੀਤੀ ਹੈ।
ਜੇਕਰ ਕਿਸੇ ਸੰਦੇਹਾਸਪਦ QR ਕੋਡ ਨੂੰ ਸਕੈਨ ਕਰ ਲਿਆ ਗਿਆ ਹੋਵੇ ਤਾਂ ਤੁਰੰਤ ਇੰਟਰਨੈੱਟ ਕਨੈਕਸ਼ਨ ਬੰਦ ਕਰਨ, ਪਾਸਵਰਡ ਬਦਲਣ ਅਤੇ ਅਕਾਊਂਟ ਗਤੀਵਿਧੀ ਦੀ ਜਾਂਚ ਕਰਨ ਦੀ ਸਲਾਹ ਦਿੱਤੀ ਗਈ ਹੈ। ਮਾਹਿਰਾਂ ਨੇ ਕਿਹਾ ਕਿ ਲੋੜ ਪੈਣ ‘ਤੇ ਪ੍ਰਭਾਵਿਤ ਡਿਵਾਈਸ ਨੂੰ ਫੈਕਟਰੀ ਰੀਸੈਟ ਕਰਨਾ ਵੀ ਸੁਰੱਖਿਅਤ ਵਿਕਲਪ ਹੋ ਸਕਦਾ ਹੈ।
