ਪਾਕਿਸਤਾਨ ਦੀ ਸਪੇਸ ਏਜੰਸੀ SUPARCO ਨੇ 2028 ਦੇ Chang'e-8 ਚੰਦਰ ਮਿਸ਼ਨ ਵਿੱਚ ਚੀਨ ਨਾਲ ਹੱਥ ਮਿਲਾ ਲਿਆ ਹੈ। ਇਹ ਮਿਸ਼ਨ ਖਾਸ ਤੌਰ 'ਤੇ ਚੰਦ ਦੇ ਦੱਖਣੀ ਧਰੁਵ ਦੇ ਵਿਗਿਆਨਕ ਅਧਿਐਨ 'ਤੇ ਕੇਂਦ੍ਰਿਤ ਹੋਵੇਗਾ।
China-Pakistan moon mission: ਭਾਰਤ ਦੇ ਸਫਲ ਚੰਦਰ ਅਭਿਆਨਾਂ ਤੋਂ ਬਾਅਦ ਹੁਣ ਪਾਕਿਸਤਾਨ ਵੀ ਚੰਦ ਤੱਕ ਪਹੁੰਚਣ ਦੇ ਯਤਨ ਕਰ ਰਿਹਾ ਹੈ। ਪਰ ਇਸ ਮਿਸ਼ਨ ਵਿੱਚ ਪਾਕਿਸਤਾਨ ਆਪਣੇ ਦਮ 'ਤੇ ਨਹੀਂ, ਸਗੋਂ ਚੀਨ ਦੇ ਸਹਾਰੇ ਚੰਦ 'ਤੇ ਪਹੁੰਚਣ ਦੀ ਯੋਜਨਾ ਬਣਾ ਰਿਹਾ ਹੈ। 2028 ਵਿੱਚ ਚੀਨ ਦੇ ਪ੍ਰਸਤਾਵਿਤ Chang'e-8 ਚੰਦਰ ਮਿਸ਼ਨ ਵਿੱਚ ਪਾਕਿਸਤਾਨ ਵੀ ਸ਼ਾਮਲ ਹੋਵੇਗਾ। ਇਸ ਮਿਸ਼ਨ ਵਿੱਚ ਪਾਕਿਸਤਾਨ ਦੀ ਸਪੇਸ ਏਜੰਸੀ SUPARCO ਪਹਿਲੀ ਵਾਰ ਕਿਸੇ ਵੱਡੇ ਚੰਦਰ ਮਿਸ਼ਨ ਦਾ ਹਿੱਸਾ ਬਣੇਗੀ।
ਚੀਨ ਦੇ ਮਿਸ਼ਨ ਵਿੱਚ ਸ਼ਾਮਲ ਹੋਵੇਗਾ ਪਾਕਿਸਤਾਨ ਦਾ ਰੋਵਰ
ਸਪੇਸ ਐਂਡ ਅੱਪਰ ਏਟਮੌਸਫੇਅਰ ਰਿਸਰਚ ਕਮਿਸ਼ਨ (SUPARCO) ਦੁਆਰਾ ਵਿਕਸਤ ਇੱਕ ਸਵਦੇਸ਼ੀ 35 ਕਿਲੋਗ੍ਰਾਮ ਦਾ ਰੋਵਰ Chang'e-8 ਮਿਸ਼ਨ ਦਾ ਹਿੱਸਾ ਹੋਵੇਗਾ। ਇਹ ਰੋਵਰ ਖਾਸ ਤੌਰ 'ਤੇ ਚੰਦਰਮਾ ਦੇ ਦੱਖਣੀ ਧਰੁਵ ਦੇ ਅਧਿਐਨ ਵਿੱਚ ਚੀਨ ਦੀ ਮਦਦ ਕਰੇਗਾ। ਇਸ ਮਿਸ਼ਨ ਦਾ ਉਦੇਸ਼ ਇੰਟਰਨੈਸ਼ਨਲ ਲੂਨਰ ਰਿਸਰਚ ਸਟੇਸ਼ਨ (ILRS) ਪ੍ਰੋਜੈਕਟ ਨੂੰ ਅੱਗੇ ਵਧਾਉਣਾ ਹੈ, ਜਿਸ ਵਿੱਚ ਕਈ ਦੇਸ਼ ਸ਼ਾਮਲ ਹੋ ਸਕਦੇ ਹਨ।
ਚੀਨ ਕਿਉਂ ਦੇ ਰਿਹਾ ਪਾਕਿਸਤਾਨ ਨੂੰ ਮੌਕਾ?
ਪਾਕਿਸਤਾਨ ਆਬਜ਼ਰਵਰ ਦੀ ਇੱਕ ਰਿਪੋਰਟ ਮੁਤਾਬਕ, ਚੀਨ ਅਤੇ ਪਾਕਿਸਤਾਨ ਦੇ ਇਸ ਸਪੇਸ ਸਹਿਯੋਗ ਦਾ ਉਦੇਸ਼ ਚੰਦਰਮਾ 'ਤੇ ਵਿਗਿਆਨਕ ਖੋਜ ਵਿੱਚ ਯੋਗਦਾਨ ਦੇਣਾ ਹੈ। ਖਾਸ ਕਰਕੇ, ਚੰਦ ਦੇ ਦੱਖਣੀ ਧਰੁਵ ਨੂੰ ਲੈ ਕੇ ਨਵੀਆਂ ਸੰਭਾਵਨਾਵਾਂ ਦੀ ਖੋਜ ਕੀਤੀ ਜਾ ਰਹੀ ਹੈ, ਜਿੱਥੇ ਪਾਣੀ ਅਤੇ ਹੋਰ ਮਹੱਤਵਪੂਰਨ ਸਰੋਤਾਂ ਦੀ ਮੌਜੂਦਗੀ ਦੇ ਸੰਕੇਤ ਮਿਲੇ ਹਨ।
Chang'e-8 ਕਰੇਗਾ ਚੰਦਰਮਾ 'ਤੇ ਤਕਨੀਕਾਂ ਦਾ ਪਰਖ
NASA ਮੁਤਾਬਕ, Chang'e-8 ਮਿਸ਼ਨ ਨੂੰ ਚੰਦਰਮਾ 'ਤੇ ਭਵਿੱਖ ਵਿੱਚ ਵਿਗਿਆਨਕ ਅਧਾਰ (Lunar Science Base) ਬਣਾਉਣ ਦੀ ਦਿਸ਼ਾ ਵਿੱਚ ਇੱਕ ਅਹਿਮ ਕਦਮ ਮੰਨਿਆ ਜਾ ਰਿਹਾ ਹੈ। ਇਹ ਮਿਸ਼ਨ ਧਰਤੀ ਦੇ ਨਿਰੀਖਣ, ਚੰਦ ਦੀ ਸਤਹ ਤੋਂ ਨਮੂਨੇ ਇਕੱਠੇ ਕਰਨ ਅਤੇ ਸੰਸਾਧਨ ਵਰਤੋਂ ਤਕਨੀਕਾਂ ਦਾ ਪਰਖ ਕਰੇਗਾ, ਤਾਂ ਜੋ ਭਵਿੱਖ ਵਿੱਚ ਚੰਦਰਮਾ 'ਤੇ ਸਥਾਈ ਮਨੁੱਖੀ ਵਸਤੀ ਵਸਾਉਣ ਵਿੱਚ ਮਦਦ ਮਿਲ ਸਕੇ।
ਕਿਵੇਂ ਮਦਦ ਕਰੇਗਾ ਪਾਕਿਸਤਾਨੀ ਰੋਵਰ?
ਸਾਊਥ ਚਾਈਨਾ ਮੌਰਨਿੰਗ ਪੋਸਟ ਦੀ ਰਿਪੋਰਟ ਮੁਤਾਬਕ, ਪਾਕਿਸਤਾਨ ਦੇ SUPARCO ਦੁਆਰਾ ਵਿਕਸਤ ਰੋਵਰ ਨੂੰ ਚੰਦ ਦੇ ਦੱਖਣੀ ਧਰੁਵ ਦੇ ਔਖੇ ਭੂ-ਭਾਗ ਦਾ ਅਧਿਐਨ ਕਰਨ ਲਈ ਡਿਜ਼ਾਈਨ ਕੀਤਾ ਗਿਆ ਹੈ। ਇਸ ਖੇਤਰ ਨੂੰ ਵਿਗਿਆਨਕ ਦ੍ਰਿਸ਼ਟੀ ਤੋਂ ਬਹੁਤ ਮਹੱਤਵਪੂਰਨ ਮੰਨਿਆ ਜਾਂਦਾ ਹੈ, ਕਿਉਂਕਿ ਇੱਥੇ ਪਾਣੀ ਅਤੇ ਖਣਿਜਾਂ ਦੀ ਮੌਜੂਦਗੀ ਦੀ ਸੰਭਾਵਨਾ ਹੈ।
ਮਿਸ਼ਨ ਵਿੱਚ ਹੋਰ ਦੇਸ਼ਾਂ ਲਈ ਵੀ ਜਗ੍ਹਾ
Chang'e-8 ਮਿਸ਼ਨ ਦੇ ਡਿਪਟੀ ਚੀਫ਼ ਡਿਜ਼ਾਈਨਰ ਵਾਂਗ ਕਿਓਂਗ ਮੁਤਾਬਕ, ਚੀਨ ਨੇ ਦਿਲਚਸਪੀ ਰੱਖਣ ਵਾਲੇ ਦੇਸ਼ਾਂ ਲਈ 200 ਕਿਲੋਗ੍ਰਾਮ (440 ਪੌਂਡ) ਦੀ ਪੇਲੋਡ ਸਮਰੱਥਾ ਦੀ ਪੇਸ਼ਕਸ਼ ਕੀਤੀ ਹੈ। ਇਸਦਾ ਮਤਲਬ ਹੈ ਕਿ ਹੋਰ ਦੇਸ਼ ਵੀ ਆਪਣੇ ਵਿਗਿਆਨਕ ਯੰਤਰ ਜਾਂ ਰੋਬੋਟ ਇਸ ਮਿਸ਼ਨ ਵਿੱਚ ਭੇਜ ਸਕਦੇ ਹਨ। ਇਹ ਪੇਲੋਡ ਲੈਂਡਰ 'ਤੇ ਲੱਗੇ ਸੈਂਸਰ, ਰੋਬੋਟਿਕ ਰੋਵਰ ਜਾਂ ਫਲਾਈਟ ਵਹੀਕਲ ਹੋ ਸਕਦੇ ਹਨ, ਜੋ ਲੈਂਡਿੰਗ ਤੋਂ ਬਾਅਦ ਸੁਤੰਤਰ ਤੌਰ 'ਤੇ ਕੰਮ ਕਰ ਸਕਦੇ ਹਨ।
