ਅਨਿਲ ਅਗਰਵਾਲ ਦੀ ਅਗਵਾਈ ਵਾਲੀ ਖਣਨ ਅਤੇ ਧਾਤੂ ਕੰਪਨੀ Vedanta Resources ਨੇ ਆਪਣੀ ਗਲੋਬਲ ਕਰਜ਼ਾ ਪ੍ਰਬੰਧਨ ਰਣਨੀਤੀ ਤਹਿਤ 3.6 ਅਰਬ ਡਾਲਰ (ਲਗਭਗ ₹34,000 ਕਰੋੜ) ਦੇ ਬਾਂਡ ਬਾਇਬੈਕ ਪ੍ਰੋਗਰਾਮ ਦੀ ਸ਼ੁਰੂਆਤ ਕੀਤੀ ਹੈ। ਲੰਡਨ ਸਟਾਕ ਐਕਸਚੇਂਜ ਵਿੱਚ ਸੂਚੀਬੱਧ ਬਾਂਡਾਂ ਨੂੰ ਨਿਸ਼ਾਨਾ ਬਣਾਉਂਦੀ ਇਹ ਪਹਿਲ ਕੰਪਨੀ ਦੀ ਕੁੱਲ 5.4 ਅਰਬ ਡਾਲਰ ਦੀ ਵਿਆਪਕ ਰੀਫਾਇਨੈਂਸਿੰਗ ਯੋਜਨਾ ਦਾ ਪਹਿਲਾ ਪੜਾਅ ਮੰਨਿਆ ਜਾ ਰਿਹਾ ਹੈ।
ਇਹ ਕਦਮ ਭਾਰਤ ਵਿੱਚ ਵੇਦਾਂਤਾ ਨਾਲ ਸੰਬੰਧਿਤ ਚਾਰ ਵੱਖ-ਵੱਖ ਕੰਪਨੀਆਂ ਦੀ 15 ਜੂਨ ਨੂੰ ਹੋਣ ਵਾਲੀ ਪ੍ਰਸਤਾਵਿਤ ਲਿਸਟਿੰਗ ਤੋਂ ਪਹਿਲਾਂ ਚੁੱਕਿਆ ਗਿਆ ਹੈ। ਇਸ ਤੋਂ ਪਹਿਲਾਂ 1 ਮਈ ਨੂੰ ਕੰਪਨੀ ਦੀ ਡੀਮਰਜਰ ਯੋਜਨਾ ਲਾਗੂ ਕੀਤੀ ਗਈ ਸੀ, ਜਿਸ ਦੇ ਤਹਿਤ ਕਾਰੋਬਾਰ ਨੂੰ ਵੱਖ-ਵੱਖ ਇਕਾਈਆਂ ਵਿੱਚ ਵੰਡਿਆ ਗਿਆ ਸੀ।
ਕੰਪਨੀ ਦੇ ਅਨੁਸਾਰ, ਬਾਂਡ ਬਾਇਬੈਕ ਆਫਰ ਦਾ ਉਦੇਸ਼ ਮੌਜੂਦਾ ਕਰਜ਼ੇ ਦਾ ਪੁਨਰਗਠਨ ਕਰਨਾ, ਵਿੱਤੀ ਲਾਗਤ ਘਟਾਉਣਾ ਅਤੇ ਦੇਣਦਾਰੀਆਂ ਦੀ ਮਿਆਦ ਨੂੰ ਲੰਬੇ ਸਮੇਂ ਤੱਕ ਫੈਲਾਉਣਾ ਹੈ। ਰਿਪੋਰਟਾਂ ਮੁਤਾਬਕ, ਇਹ ਬਾਇਬੈਕ ਆਫਰ 23 ਜੂਨ ਤੱਕ ਖੁੱਲ੍ਹਾ ਰਹੇਗਾ। ਇਸ ਦੌਰਾਨ ਕੰਪਨੀ ਲੰਡਨ, ਨਿਊਯਾਰਕ ਅਤੇ ਬੋਸਟਨ ਦੇ ਗਲੋਬਲ ਨਿਵੇਸ਼ਕਾਂ ਨਾਲ ਨਵੇਂ ਬਾਂਡ ਜਾਰੀ ਕਰਨ ਅਤੇ ਕਰਜ਼ੇ ਦੀ ਰੀਫਾਇਨੈਂਸਿੰਗ ਬਾਰੇ ਵੀ ਗੱਲਬਾਤ ਕਰ ਰਹੀ ਹੈ।
ਕੰਪਨੀ ਦਾ ਮੰਨਣਾ ਹੈ ਕਿ ਇਸ ਰਣਨੀਤੀ ਨਾਲ ਉਸਦੀ ਉਧਾਰੀ ਲਾਗਤ ਵਿੱਚ ਲਗਭਗ 3 ਫੀਸਦੀ ਤੱਕ ਕਮੀ ਆ ਸਕਦੀ ਹੈ, ਜਿਸ ਨਾਲ ਲੰਬੇ ਸਮੇਂ ਵਿੱਚ ਵਿੱਤੀ ਸਥਿਰਤਾ ਨੂੰ ਮਜ਼ਬੂਤੀ ਮਿਲ ਸਕਦੀ ਹੈ।
ਜਾਣਕਾਰੀ ਅਨੁਸਾਰ, ਬਾਇਬੈਕ ਪ੍ਰਕਿਰਿਆ ਦੌਰਾਨ ਕੰਪਨੀ ਨੂੰ ਲਗਭਗ 300 ਮਿਲੀਅਨ ਡਾਲਰ ਤੱਕ ਦਾ ਵਾਧੂ ਭੁਗਤਾਨ ਕਰਨਾ ਪੈ ਸਕਦਾ ਹੈ, ਕਿਉਂਕਿ ਕੁਝ ਮੌਜੂਦਾ ਬਾਂਡ ਆਪਣੇ ਫੇਸ ਵੈਲਿਊ ਤੋਂ ਉੱਪਰ ਟ੍ਰੇਡ ਕਰ ਰਹੇ ਹਨ। ਹਾਲਾਂਕਿ, ਕੰਪਨੀ ਦਾ ਮੰਨਣਾ ਹੈ ਕਿ ਇਹ ਛੋਟੇ ਸਮੇਂ ਦੀ ਲਾਗਤ ਲੰਬੇ ਸਮੇਂ ਵਿੱਚ ਲਾਭਦਾਇਕ ਸਾਬਤ ਹੋ ਸਕਦੀ ਹੈ, ਕਿਉਂਕਿ ਇਸ ਨਾਲ ਕਰਜ਼ਾ ਸੰਰਚਨਾ ਹੋਰ ਸਥਿਰ ਅਤੇ ਪ੍ਰਬੰਧਨਯੋਗ ਬਣੇਗੀ।
ਮਾਹਿਰਾਂ ਦੇ ਅਨੁਸਾਰ, ਜਿਹੜੇ ਨਿਵੇਸ਼ਕ ਮੌਜੂਦਾ ਬਾਜ਼ਾਰ ਮੁੱਲ 'ਤੇ ਪੂੰਜੀਗਤ ਲਾਭ ਹਾਸਲ ਕਰ ਰਹੇ ਹਨ, ਉਨ੍ਹਾਂ ਲਈ ਬਾਂਡ ਵਾਪਸ ਵੇਚਣਾ ਆਸਾਨ ਨਹੀਂ ਹੋਵੇਗਾ, ਕਿਉਂਕਿ ਇਹ ਪ੍ਰੀਮੀਅਮ ਮੁੱਲ 'ਤੇ ਟ੍ਰੇਡ ਕਰ ਰਹੇ ਹਨ।
ਕੰਪਨੀ ਦੇ ਇਸ ਵੱਡੇ ਰੀਫਾਇਨੈਂਸਿੰਗ ਯਤਨ ਵਿੱਚ Citigroup, JPMorgan Chase ਅਤੇ Barclays ਵਰਗੇ ਪ੍ਰਮੁੱਖ ਅੰਤਰਰਾਸ਼ਟਰੀ ਬੈਂਕ ਸਹਿਯੋਗ ਕਰ ਰਹੇ ਹਨ। ਇਨ੍ਹਾਂ ਵਿੱਤੀ ਸੰਸਥਾਵਾਂ ਦੀ ਮਦਦ ਨਾਲ ਵੇਦਾਂਤਾ ਆਪਣੇ ਕਰਜ਼ੇ ਦੇ ਪੁਨਰਗਠਨ ਅਤੇ ਨਵੇਂ ਫੰਡਿੰਗ ਵਿਕਲਪਾਂ 'ਤੇ ਕੰਮ ਕਰ ਰਹੀ ਹੈ।
ਵਿਸ਼ਲੇਸ਼ਕਾਂ ਦੇ ਅਨੁਸਾਰ, ਹਾਲੀਆ ਮਹੀਨਿਆਂ ਵਿੱਚ ਕਮੋਡਿਟੀ ਕੀਮਤਾਂ ਵਿੱਚ ਸੁਧਾਰ ਅਤੇ ਕਰੈਡਿਟ ਰੇਟਿੰਗ ਵਿੱਚ ਅਪਗ੍ਰੇਡ ਨੇ ਵੇਦਾਂਤਾ ਲਈ ਰੀਫਾਇਨੈਂਸਿੰਗ ਪ੍ਰਕਿਰਿਆ ਨੂੰ ਹੋਰ ਸੁਗਮ ਬਣਾਇਆ ਹੈ। ਕੰਪਨੀ ਪਹਿਲਾਂ ਹੀ ਲਗਭਗ 1.8 ਅਰਬ ਡਾਲਰ ਦੇ ਕਰਜ਼ੇ ਦਾ ਅੰਸ਼ਿਕ ਭੁਗਤਾਨ ਕਰ ਚੁੱਕੀ ਹੈ, ਜਿਸ ਨਾਲ ਇਸਦੀ ਬੈਲੈਂਸ ਸ਼ੀਟ ਉੱਤੇ ਦਬਾਅ ਕੁਝ ਹੱਦ ਤੱਕ ਘਟਿਆ ਹੈ।
ਵੇਦਾਂਤਾ ਸਮੂਹ ਨੇ ਹਾਲ ਹੀ ਵਿੱਚ ਆਪਣੇ ਕਾਰੋਬਾਰ ਦਾ ਪੁਨਰਗਠਨ ਕਰਦੇ ਹੋਏ ਚਾਰ ਨਵੀਆਂ ਕੰਪਨੀਆਂ ਦੇ ਡੀਮਰਜਰ ਦੀ ਪ੍ਰਕਿਰਿਆ ਪੂਰੀ ਕੀਤੀ ਸੀ। ਇਸ ਤੋਂ ਬਾਅਦ ਹੁਣ ਇਨ੍ਹਾਂ ਕੰਪਨੀਆਂ ਦੀ ਭਾਰਤੀ ਸ਼ੇਅਰ ਬਾਜ਼ਾਰ ਵਿੱਚ ਲਿਸਟਿੰਗ ਦੀ ਤਿਆਰੀ ਅੰਤਿਮ ਪੜਾਅ ਵਿੱਚ ਹੈ।
