இன்று முதல் ஹிமாச்சலப் பிரதேசம் பேரிடர் பாதித்த மாநிலமாக அறிவிக்கப்பட்டுள்ளது. முதலமைச்சர் சுகவிந்தர் சிங் சுகு சட்டசபையில் இதனை அறிவித்தார். ஆகஸ்ட் 21 முதல் மாநிலத்தில் பருவமழை மீண்டும் தீவிரமடைந்ததாகவும், அதன்பின்னர் பல்வேறு பகுதிகளில் கனமழை, மேக வெடிப்பு மற்றும் நிலச்சரிவு போன்ற சம்பவங்கள் நடந்துள்ளதாகவும் அவர் தெரிவித்தார்.
சிம்லா: ஹிமாச்சலப் பிரதேசத்தில் ஆகஸ்ட் 21 முதல் பருவமழை தீவிரமடைந்து கனமழை பெய்ததைத் தொடர்ந்து, முதலமைச்சர் சுகவிந்தர் சிங் சுகு மாநிலத்தை இன்று முதல் பேரிடர் பாதித்த மாநிலமாக அறிவித்துள்ளார். சட்டசபையில் வழங்கப்பட்ட அறிக்கையில், மாநிலத்தின் ஆரம்பகட்ட சேதங்கள் 3,056 கோடி ரூபாய் என மதிப்பிடப்பட்டுள்ளதாக முதல்வர் தெரிவித்தார். இந்த காலகட்டத்தில் சாலைகள், பாலங்கள், நீர் மற்றும் மின் கட்டமைப்புகளுக்கு மிகப்பெரிய சேதம் ஏற்பட்டுள்ளதாக முதல்வர் கூறினார். பாதிக்கப்பட்ட மாவட்டங்களில் சம்பா, குல்லு, லாஹவுல்-ஸ்பிட்டி, மாண்டி, சிம்லா, காங்க்ரா மற்றும் ஹமிர் பூர் ஆகியவை அடங்கும்.
கட்டுப்பாடற்ற கட்டுமானங்கள் குறித்து முதல்வர் சுகு எச்சரிக்கை
பேரிடர் மேலாண்மை சட்டத்தின் பிரிவுகளின் கீழ், மாவட்டங்கள், மாநில மற்றும் மத்திய அரசு துறைகளுக்கு நிவாரணம் மற்றும் மீட்புப் பணிகள், உள்கட்டமைப்பு மறுசீரமைப்பு பணிகளை போர்க்கால அடிப்படையில் முடிக்க உத்தரவுகளை மாநில அரசு பிறப்பித்துள்ளதாக முதல்வர் சுகு சட்டசபையில் தெரிவித்தார். அவர் கூறுகையில், "வீடுகள், கால்நடைகள் மற்றும் விவசாய நிலங்கள் பேரிடரால் பெரிதும் பாதிக்கப்பட்டுள்ளன. இந்த கடினமான நேரத்தில் பாதிக்கப்பட்ட சகோதர சகோதரிகளுடன் எங்கள் அரசு துணை நிற்கிறது. புனரமைப்பு மற்றும் நிவாரணப் பணிகளில் நாங்கள் எந்தக் குறையும் வைக்கவில்லை."
ஹிமாச்சலம் உட்பட அனைத்து மலை மாநிலங்களின் துயரமும் தேசிய அக்கறைக்குரிய விஷயம் என்று முதல்வர் கூறினார். மலைப் பகுதிகளில் கட்டுப்பாடற்ற கட்டுமானப் பணிகளுக்கு தடை விதிக்க வேண்டும் என்று மத்திய அரசுக்கு அவர் வலியுறுத்தினார். முதல்வர் கூறுகையில், எங்கள் மலைகள் சுற்றுலா தலங்கள் மட்டுமல்ல, உயிர் காக்கும் தூண்கள். புவி வெப்பமடைதலின் பாதிப்பு மலைப் பகுதிகளில் அதிகம் காணப்படுகிறது. சரியான நேரத்தில் விழிப்புணர்வு மற்றும் நடவடிக்கை என்பதே இன்று மிகப்பெரிய தேவை.
