உலகளாவிய சந்தைகளில் இருந்து கிடைத்த பலவீனமான சிக்னல்கள் மற்றும் அமெரிக்கா–ஈரான் இடையிலான அதிகரித்து வரும் புவிசார் அரசியல் பதற்றம் காரணமாக புதன்கிழமை இந்திய பங்குச்சந்தையில் நாள் முழுவதும் ஏற்றத்தாழ்வு நிலவியது. முதலீட்டாளர்கள் எச்சரிக்கையுடன் செயல்பட்டதால், சந்தை வர்த்தக நேரம் முழுவதும் பச்சை மற்றும் சிவப்பு குறியீடுகளுக்கு இடையில் மாறிக் கொண்டே இருந்தது. இறுதியில் சென்செக்ஸ் மற்றும் நிப்டி இரண்டும் கிட்டத்தட்ட மாறாத நிலையில் முடிவடைந்தன.
வர்த்தக முடிவில் பிஎஸ்இ சென்செக்ஸ் 141.90 புள்ளிகள் அல்லது 0.19 சதவீதம் சரிந்து 75,867.80 ஆக முடிவடைந்தது. என்எஸ்இ நிப்டி 6.55 புள்ளிகள் அல்லது 0.03 சதவீதம் குறைந்து 23,907.15 என்ற நிலையில் நிறைவடைந்தது.
நாள் முழுவதும் நடைபெற்ற வர்த்தகத்தில் சந்தையில் பரவலான செயல்பாடு காணப்பட்டது. மொத்தம் 2,168 பங்குகள் உயர்வுடன் முடிந்த நிலையில், 1,877 பங்குகள் சரிவை பதிவு செய்தன. இதனால் துறை சார்ந்த நகர்வுகள் வலுவாக இருந்தபோதிலும், ஒட்டுமொத்த குறியீடுகள் குறுகிய வரம்புக்குள் மட்டுமே இருந்தது தெளிவானது.
நிப்டி குறியீட்டில் ஹிண்டால்கோ இண்டஸ்ட்ரீஸ், பவர் கிரிட், டாடா மோட்டார்ஸ், என்டிபிசி மற்றும் Eternal போன்ற முக்கிய பங்குகளில் வலுவான வாங்குதல் காணப்பட்டது. குறிப்பாக மெட்டல் மற்றும் பவர் துறைகளில் முதலீட்டாளர்களின் ஆர்வம் அதிகரித்தது. பவர் மற்றும் உட்கட்டமைப்பு தொடர்பான பங்குகளில் தொடர்ந்து இரண்டாவது நாளாக வாங்கும் போக்கு நீடித்தது.
மற்றுபுறம், ஓஎன்ஜிசி, ஐடிசி, எச்டிஎஃப்சி வங்கி, எச்டிஎஃப்சி லைஃப் மற்றும் விப்ரோ போன்ற முன்னணி பங்குகளில் விற்பனை அழுத்தம் காணப்பட்டது. குறிப்பாக தகவல் தொழில்நுட்பம் மற்றும் வங்கி துறைகளில் ஏற்பட்ட பலவீனம் சந்தையின் மொத்த முன்னேற்றத்தை கட்டுப்படுத்தியது. பொதுவாக சந்தைக்கு திசை காட்டும் வங்கி மற்றும் ஐடி துறைகள் இந்த முறை அழுத்தத்தில் இருந்ததால், முதலீட்டாளர்களின் மனநிலையிலும் தாக்கம் ஏற்பட்டது.
துறை சார்ந்த குறியீடுகளைப் பார்க்கும்போது, சந்தையில் தெளிவான துறை அடிப்படையிலான ரோட்டேஷன் காணப்பட்டது. மீடியா, பவர் மற்றும் கேபிடல் குட்ஸ் குறியீடுகள் சுமார் 3 சதவீதம் வரை உயர்ந்தன. ஆட்டோ, மெட்டல் மற்றும் டெலிகாம் துறைகள் சுமார் 1 சதவீத உயர்வுடன் முடிந்தன. மிட்கேப் குறியீடும் 0.4 சதவீத உயர்வுடன் முடிந்தது. ஸ்மால்கேப் குறியீட்டிலும் லேசான உயர்வு பதிவானது.
ஆனால் ஐடி, எஃப்எம்சிஜி, வங்கி மற்றும் எண்ணெய் மற்றும் எரிவாயு துறைகளில் விற்பனை அழுத்தம் நீடித்ததால், சந்தையின் மொத்த வலிமை கட்டுப்படுத்தப்பட்டது.
சந்தையில் ஏற்பட்ட முக்கிய அழுத்தத்திற்கு புவிசார் அரசியல் பதற்றமே காரணம் என நிபுணர்கள் தெரிவித்துள்ளனர். அமெரிக்கா மற்றும் ஈரான் இடையிலான பதற்றம் அதிகரித்திருப்பதுடன், தெற்கு ஈரானில் அமெரிக்க ராணுவ நடவடிக்கை தொடர்பான தகவல்கள் உலகளாவிய முதலீட்டாளர்களின் கவலையை அதிகரித்துள்ளதாக கூறப்பட்டுள்ளது.
