பஞ்சாப் ஃபதேகர் சாஹிப்பில் கார் மோதியதில் மூன்று காவடியர்கள் உயிரிழப்பு

ஞாயிற்றுக்கிழமை காலை பஞ்சாபின் ஃபதேகர் சாஹிப் பகுதியில் சர்ஹிந்த் ஜிடி சாலையில் நடந்த சாலை விபத்தில் மூன்று காவடியர்கள் உயிரிழந்தனர். மேலும் ஒருவர் தீவிரமாக காயமடைந்த நிலையில் சிகிச்சை பெற்று வருகிறார்.

காவடியர்கள் சாலையில் சென்று கொண்டிருந்தபோது, கார் ஒன்று அவர்கள் மீது மோதியதாக போலீசார் தெரிவித்தனர். இந்த விபத்தில் நான்கு காவடியர்கள் பாதிக்கப்பட்டனர். அவர்களில் மூவர் உயிரிழந்த நிலையில், ஒருவர் தீவிரமாக காயமடைந்தார்.

விபத்தைத் தொடர்ந்து உள்ளூர் மக்கள் மற்றும் பிறரின் உதவியுடன் காயமடைந்தவர்கள் உடனடியாக ஃபதேகர் சாஹிப் சிவில் மருத்துவமனைக்கு கொண்டு செல்லப்பட்டனர். அங்கு மூன்று காவடியர்கள் ஏற்கனவே உயிரிழந்ததாக மருத்துவர்கள் தெரிவித்தனர். காயமடைந்தவருக்கு தொடர்ந்து சிகிச்சை அளிக்கப்பட்டு வருகிறது

காவடியர்கள் குழு உத்தரகாண்ட் மாநிலம் கங்கோத்ரியில் இருந்து புனித நீரை எடுத்துக்கொண்டு, பஞ்சாபின் ஃபரீத்கோட் மாவட்டத்தில் உள்ள கோட்கபூராவுக்கு திரும்பிக் கொண்டிருந்தது. அப்போது சர்ஹிந்த் ஜிடி சாலையில் வேகமாக வந்த கார் குழுவினர் மீது மோதியது.

விபத்தில் உயிரிழந்தவர்கள் மகிந்தர் பால் என்கிற ககன் (43), தீபக் குமார் (42) மற்றும் ஜகதீஷ் மித்தல் என்கிற காலூ (40) என அடையாளம் காணப்பட்டுள்ளனர். மூவரும் கோட்கபூராவைச் சேர்ந்தவர்கள் என தெரிவிக்கப்பட்டுள்ளது.

விபத்து குறித்து பஞ்சாப் சட்டப்பேரவை சபாநாயகர் குல்தார் சிங் சந்த்வான் வருத்தம் தெரிவித்துள்ளார். உயிரிழந்தவர்களின் குடும்பங்களுக்கு தலா ரூ.2 லட்சம் நிதியுதவி வழங்கப்படும் என அவர் அறிவித்துள்ளார். மேலும், விபத்தில் காயமடைந்த காவடியரின் சிகிச்சைக்கான செலவை அரசு ஏற்கும் என தெரிவிக்கப்பட்டுள்ளது.

மூன்று பேர் உயிரிழந்தது மிகவும் வருத்தமளிப்பதாக தெரிவித்த சபாநாயகர், பாதிக்கப்பட்ட குடும்பங்களுக்கு இரங்கல் தெரிவித்ததுடன், உயிரிழந்தவர்களின் ஆன்மா சாந்தியடைய பிரார்த்தனை செய்தார்.

விபத்து தொடர்பாக போலீசார் வழக்குப் பதிவு செய்துள்ளனர். விபத்துக்குப் பிறகு கார் ஓட்டுநர் சம்பவ இடத்திலிருந்து தப்பிச் சென்றதாக ஏஎஸ்ஐ திலக் ராஜ் தெரிவித்தார். ஓட்டுநரின் அடையாளத்தை கண்டறிந்து அவரைத் தேடும் பணியில் போலீசார் ஈடுபட்டுள்ளனர்.

விபத்துக்கான காரணங்களையும் போலீசார் விசாரித்து வருகின்றனர். சம்பவ இடம் மற்றும் அதைச் சுற்றியுள்ள பகுதிகளில் இருந்து தகவல்களை சேகரிப்பதுடன், கார் ஓட்டுநர் தொடர்பான தடயங்களையும் தேடி வருகின்றனர். விசாரணை முடிந்த பிறகு அடுத்தகட்ட நடவடிக்கை மேற்கொள்ளப்படும்.