میچ میں ٹاس جیت کر پہلے بیٹنگ کرنے والی راجستھان رائلز نے 20 اوور میں 6 وکٹ کے نقصان پر 225 رنز بنائے۔ جواب میں دہلی کیپیٹلز نے 19.1 اوور میں 3 وکٹ پر 226 رنز بنا کر میچ جیت لیا۔
راجستھان رائلز نے بیٹنگ کا آغاز کیا لیکن ابتدائی مرحلے میں یشسوی جیسوال اور ویبھو سوریاونشی جلد آؤٹ ہو گئے۔ اس کے بعد کپتان ریان پراگ نے اننگز کو سنبھالتے ہوئے 50 گیندوں پر 90 رنز بنائے، جس میں 5 چھکے اور 8 چوکے شامل تھے۔ دھرو جوریل نے 42 رنز کا اضافہ کیا جبکہ ڈونوون فریرا نے 14 گیندوں پر 47 رنز بنا کر ٹیم کا اسکور 225 تک پہنچایا۔ دہلی کی جانب سے مچل اسٹارک نے 3 وکٹ حاصل کیے۔
226 رنز کے ہدف کے تعاقب میں دہلی کو پاتھم نسانکا اور کے ایل راہل نے مضبوط آغاز فراہم کیا۔ دونوں کے درمیان 9.3 اوور میں 110 رنز کی شراکت ہوئی۔ نسانکا نے 33 گیندوں پر 62 رنز بنائے جبکہ راہل نے 40 گیندوں پر 75 رنز اسکور کیے، جس میں 5 چھکے اور 6 چوکے شامل تھے۔
اس کے بعد نتیش رانا نے 33 رنز بنائے۔ آخری مرحلے میں آشوتوش شرما اور ٹرسٹن اسٹبز نے ناٹ آؤٹ شراکت کے ذریعے ٹیم کو ہدف تک پہنچایا۔ راجستھان کے بولرز میں جوفرا آرچر، تشار دیشپانڈے اور رویندر جڈیجا نے ایک ایک وکٹ حاصل کی۔
اس جیت کے ساتھ دہلی کیپیٹلز نے پوائنٹس ٹیبل میں اپنی پوزیشن بہتر کی ہے۔ ٹیم نے 9 میچوں میں 4 فتوحات کے ساتھ 8 پوائنٹس حاصل کیے ہیں جبکہ نیٹ رن ریٹ اب بھی ایک مسئلہ بنا ہوا ہے۔
