منگل کو بی سی اے اسٹیڈیم میں کھیلے گئے ویمنز پریمیئر لیگ 2026 کے 13ویں میچ میں دہلی کیپیٹلز نے ممبئی انڈینز کو سات وکٹوں سے شکست دے کر سیزن کی دوسری کامیابی حاصل کی۔
ٹاس ہار کر پہلے بیٹنگ کرنے والی ممبئی انڈینز کی شروعات کمزور رہی اور ٹیم نے 21 رنز پر دونوں اوپنرز کی وکٹیں گنوا دیں۔ سجیون سجنا نے 9 رنز بنائے جبکہ ہیلی میتھیوز صرف 12 رنز ہی جوڑ سکیں۔ اس کے بعد نیٹ سائور-برنٹ اور کپتان ہرمن پریت کور نے تیسری وکٹ کے لیے 58 گیندوں میں 78 رنز کی شراکت قائم کی۔ ہرمن پریت کور نے 33 گیندوں میں سات چوکوں کی مدد سے 41 رنز اسکور کیے۔
کپتان کے آؤٹ ہونے کے بعد سائور-برنٹ نے نکولا کیری کے ساتھ مل کر اننگز کو آگے بڑھایا۔ کیری نے 12 رنز کا تعاون کیا۔ سائور-برنٹ نے 45 گیندوں میں ناٹ آؤٹ 65 رنز بنائے، جن میں چھ چوکے اور دو چھکے شامل تھے۔ ممبئی انڈینز نے مقررہ 20 اوورز میں پانچ وکٹوں کے نقصان پر 154 رنز بنائے۔ دہلی کی جانب سے شری چَرَنی نے تین وکٹیں حاصل کیں جبکہ ماریزان کیپ اور نندنی شرما نے ایک ایک وکٹ لی۔
155 رنز کے ہدف کے تعاقب میں اتری دہلی کیپیٹلز کو شیفالی ورما اور لِزَیلی لی نے مضبوط آغاز فراہم کیا۔ دونوں نے پہلی وکٹ کے لیے 7.3 اوورز میں 63 رنز کی شراکت قائم کی۔ شیفالی ورما نے 24 گیندوں میں چھ چوکوں کی مدد سے 29 رنز بنائے۔ اس کے بعد لِزَیلی لی نے لورا وولوارڈ کے ساتھ اننگز کو آگے بڑھایا۔ لی نے 46 رنز بنائے جن میں سات چوکے اور ایک چھکا شامل تھا۔
درمیانی اوورز میں چند وکٹیں گرنے کے بعد کپتان جمیمہ روڈریگز نے ذمہ داری سنبھالی۔ انہوں نے لورا وولوارڈ اور بعد ازاں ماریزان کیپ کے ساتھ مفید شراکتیں قائم کیں۔ جمیمہ روڈریگز نے 37 گیندوں میں ناٹ آؤٹ 51 رنز بنائے، جن میں پانچ چوکے اور ایک چھکا شامل تھا۔ اختتام پر ماریزان کیپ نے چھ گیندوں میں ناٹ آؤٹ 10 رنز بنا کر فتح کو یقینی بنایا۔ دہلی کیپیٹلز نے 19 اوورز میں ہدف حاصل کر لیا۔
اس شکست کے ساتھ ممبئی انڈینز کو مسلسل تیسری ہار کا سامنا کرنا پڑا، تاہم چھ میچوں میں چار شکستوں کے باوجود ٹیم پوائنٹس ٹیبل میں دوسرے مقام پر موجود ہے۔ دہلی کیپیٹلز نے پانچ میچوں میں دو فتوحات کے ساتھ چوتھی پوزیشن حاصل کی ہے۔ رائل چیلنجرز بنگلورو پہلے ہی اگلے مرحلے کے لیے کوالیفائی کر چکی ہے، جبکہ باقی چار ٹیمیں پلے آف کی دوڑ میں شامل ہیں۔
