یوپی بورڈ آف سیکنڈری ایجوکیشن (UPMSP) نے 24 فروری 2025ء کو منعقدہ دسویں اور بارہویں کی بورڈ امتحانات کے دوران نقل کے واقعات پر سخت کارروائی کی۔
تعلیم: یوپی بورڈ آف سیکنڈری ایجوکیشن (UPMSP) نے 24 فروری 2025ء کو منعقدہ دسویں اور بارہویں کی بورڈ امتحانات کے دوران نقل کے واقعات پر سخت کارروائی کی۔ امتحانی مراکز پر سخت نگرانی کے باوجود 9 طلباء نقل کرتے ہوئے پکڑے گئے، جبکہ 14 ڈمی امیدواروں کی شناخت کرکے انہیں امتحانی ہال سے باہر کردیا گیا۔
پہلے ہی دن نقل کے متعدد واقعات سامنے آئے
بورڈ امتحان کے پہلے ہی دن امتحان دو پالیوں میں مکمل ہوا۔ پہلی پالی میں دسویں جماعت کا ہندی اور بارہویں جماعت کا ملٹری سائنس کا پرچہ ہوا، جبکہ دوسری پالی میں دسویں جماعت کا ہیلتھ سروسز اور بارہویں جماعت کا ہندی کا پرچہ منعقد کیا گیا۔ پہلی پالی میں فرخ آباد ضلع میں 6 طلباء نقل کرتے ہوئے پکڑے گئے، جبکہ پرتاپ گڑھ میں 1 طالب علم کو امتحان میں نا جائز طریقوں کا استعمال کرتے ہوئے پایا گیا۔ اسی طرح دوسری پالی میں بجنور اور مرزا پور میں 1-1 طالب علم نقل کرتے ہوئے رنگے ہاتھوں پکڑا گیا۔
14 ڈمی امیدوار بھی گرفتار
اس بار یوپی بورڈ نے نقل مافیا پر شکنجہ کسنے کیلئے امتحانی مراکز پر سخت چیکنگ کی۔ نتیجے کے طور پر 14 ڈمی امیدواروں کی شناخت کرکے انہیں گرفتار کرلیا گیا۔ ان میں سے سب سے زیادہ 6 ڈمی امیدوار فرخ آباد سے، 4 غازی پور سے، اور 1-1 ڈمی امیدوار کنوج، جون پور، فیروز آباد اور پرتاپ گڑھ سے پکڑے گئے۔
یوپی ایم ایس پی نے نقل کرنے والے طلباء اور ڈمی امیدواروں کے خلاف یوپی پبلک امتحان (ناجائز طریقوں کی روک تھام) ایکٹ 2024 کے تحت کارروائی کی وارننگ دی ہے۔ اس قانون کے تحت پکڑے جانے والے طلباء کی جوابی کتابیں منسوخ کردی جائیں گی اور ان کا نتیجہ مقررہ قواعد کے مطابق جاری کیا جائے گا۔ بورڈ سیکرٹری بھگوتی سنگھ نے تمام امتحانی مراکز کو سخت ہدایات دی ہیں کہ نقل روکنے کیلئے سی سی ٹی وی کیمرے، فلائنگ اسکواڈ اور سخت چیکنگ کے طریقہ کار کو مزید موثر بنایا جائے۔
