ચીનમાં એક શાળાના વિદ્યાર્થીએ એવું કામ કરી બતાવ્યું છે જે જાણીને દરેક વ્યક્તિ ચોંકી ગયો છે. હુબેઈના યિચાંગમાં યિલિંગ હાઈ સ્કૂલમાં ભણતા લેન બોવેને ઘરે જ એક ફોલ્ડેબલ સ્માર્ટફોન બનાવી દીધો છે. ખાસ વાત એ છે કે આ ફોન 3D પ્રિન્ટરની મદદથી તૈયાર કરવામાં આવ્યો છે. તેમના આ નવા પ્રયોગની સોશિયલ મીડિયા પર ખૂબ ચર્ચા થઈ રહી છે અને લોકો તેમની પ્રતિભાની પ્રશંસા કરી રહ્યા છે.
બજારમાં નહોતો એવો ફોલ્ડેબલ ફોન, પોતે બનાવી દીધો
બોવેને જણાવ્યું કે બજારમાં ઘણા પ્રકારના વર્ટિકલ અને હોરીઝોન્ટલ ફોલ્ડેબલ ફોન ઉપલબ્ધ છે, પરંતુ એવો કોઈ ફોન નહોતો કે જેને ફોલ્ડ કરવા પર સ્ક્રીન બહારની તરફ દેખાય. આ જ ખામીને દૂર કરવા માટે તેમણે નવો વર્ટિકલ ફોલ્ડેબલ ફોન બનાવવાનો નિર્ણય લીધો. આ પ્રોજેક્ટ માટે બોવેને લગભગ 24,000 રૂપિયાના 3D પ્રિન્ટરનો ઉપયોગ કર્યો અને તેનો ફ્રેમ તૈયાર કર્યો. ત્યારબાદ, ફોનના અન્ય ઘટકો તેમણે જૂના મોબાઈલ ફોનમાંથી કાઢ્યા અને કેટલાક જરૂરી સામગ્રી ઓનલાઈન ઓર્ડર કરી.
બોવેને તેમનો પહેલો વીડિયો 16 ફેબ્રુઆરીએ ચાઈનીઝ સોશિયલ મીડિયા પર શેર કર્યો હતો, જેમાં તેમણે 16mm જાડા ફોલ્ડેબલ ફોન બનાવતાં દર્શાવ્યું હતું. ત્યારબાદથી જ તેમનો આ નવો પ્રયોગ ઈન્ટરનેટ પર છવાઈ ગયો છે.
ટચસ્ક્રીનને કાર્યક્ષમ બનાવવામાં આવી મુશ્કેલી
બોવેનના મતે, તેમના માટે સૌથી મોટો પડકાર ટચસ્ક્રીનને કાર્યક્ષમ બનાવવાનો હતો. શરૂઆતમાં જ્યારે ફોન અનફોલ્ડ કરવામાં આવતો હતો, ત્યારે ટચસ્ક્રીન કામ કરતી નહોતી. આ સમસ્યાને ઉકેલવા માટે તેમણે ઘણી વખત ફોનનો ડિઝાઇન બદલ્યો અને સતત ટેસ્ટિંગ કર્યું. બોવેને જણાવ્યું કે આ દરમિયાન ઘણી વખત સ્ક્રીન ખરાબ થઈ ગઈ, પરંતુ છેવટે તેમણે તેને એક સામાન્ય સ્માર્ટફોનના બધા કાર્યો સાથે તૈયાર કરી લીધો. જોકે, તેમનું મોડેલ હજુ પણ શરૂઆતી તબક્કામાં છે અને તેમાં ઘણા સુધારા કરવા બાકી છે.
Vivo પણ દીવાની થઈ ગઈ, સોશિયલ મીડિયા પર ખૂબ પ્રશંસા
બોવેનના આ નવા પ્રયોગની ચાઈનીઝ સોશિયલ મીડિયા પર ખૂબ પ્રશંસા થઈ રહી છે. ચીનની લોકપ્રિય સ્માર્ટફોન કંપની Vivo પણ તેમનાથી પ્રભાવિત થયા વિના રહી શકી નહીં. Vivo એ તેમના વીડિયો પર કમેન્ટ કરીને લખ્યું, "આ શાનદાર કામ છે! અમને આશા છે કે તમે આગળ પણ આવા નવા પ્રયોગો કરતા રહેશો."
બોવેનની આ સર્જનાત્મકતા દર્શાવે છે કે આજના યુવાનો નવી ટેકનોલોજી અને તેમની સર્જનાત્મક વિચારસરણીથી કમાલ કરી શકે છે. હવે જોવાનું એ રહેશે કે બોવેન તેમના આ નવા પ્રયોગને કેટલો આગળ લઈ જાય છે અને શું ભવિષ્યમાં કોઈ મોટી સ્માર્ટફોન કંપની તેમનો આ વિચાર અપનાવે છે.
