આજથી નવું નાણાકીય વર્ષ ૨૦૨૫-૨૬ શરૂ થયું છે અને તેની સાથે દેશમાં અનેક ફેરફારો લાગુ થયા છે. આ ફેરફારોની અસર સામાન્ય નાગરિકોથી લઈને વેપારીઓ સુધી પર પડશે. વરિષ્ઠ નાગરિકો અને મહિલાઓ માટે નવી યોજનાઓ ઉપરાંત, યુપીઆઈ નિયમોમાં પણ સુધારા કરવામાં આવ્યા છે.
બિઝનેસ ડેસ્ક: ૧ એપ્રિલ ૨૦૨૫થી નવું નાણાકીય વર્ષ ૨૦૨૫ લાગુ થયું છે, જેની સાથે દેશના અનેક ક્ષેત્રોમાં ફેરફારો જોવા મળી રહ્યા છે. વરિષ્ઠ નાગરિકો અને મહિલાઓ માટે પણ અનેક નવા નિયમો અને નીતિઓમાં સુધારા કરવામાં આવ્યા છે. આ ઉપરાંત, યુપીઆઈ સાથે જોડાયેલા નિયમોમાં પણ ફેરફાર કરવામાં આવ્યો છે, જેનાથી ડિજિટલ ચુકવણીમાં કેટલીક નવી પ્રક્રિયાઓ ઉમેરાઈ શકે છે.
દર મહિનાની પહેલી તારીખે પેટ્રોલ, ડીઝલ અને એલપીજીના ભાવોમાં સુધારો કરવામાં આવે છે, પરંતુ આ વખતે પેટ્રોલના ભાવમાં કોઈ ફેરફાર જોવા મળ્યો નથી. નવા નાણાકીય વર્ષની શરૂઆત સાથે આ ફેરફારોની અસર સામાન્ય જનજીવન અને વિવિધ ક્ષેત્રો પર પડવાની ધારણા છે.
શું થયું સસ્તું?
૧. એલપીજી સિલિન્ડરના ભાવમાં ઘટાડો
૧ એપ્રિલથી કોમર્શિયલ એલપીજી સિલિન્ડરના ભાવમાં ઘટાડો નોંધાયો છે. દિલ્હીમાં ૧૯ કિલોનો સિલિન્ડર ૪૧ રૂપિયા સસ્તો થઈને ૧,૭૬૨ રૂપિયામાં મળી રહ્યો છે. કોલકાતામાં આ ભાવ ૪૪.૫૦ રૂપિયા ઘટીને ૧,૮૬૮.૫૦ રૂપિયા થયો છે. મુંબઈમાં સિલિન્ડરનો ભાવ ૪૨ રૂપિયા ઘટીને ૧,૭૫૫.૫૦ રૂપિયા થયો છે, જ્યારે ચેન્નાઈમાં તે હવે ૧,૯૨૧.૫૦ રૂપિયામાં ઉપલબ્ધ છે. જોકે, ઘરેલુ એલપીજી સિલિન્ડરના ભાવમાં કોઈ ફેરફાર થયો નથી.
૨. હવાઈ મુસાફરી સસ્તી
એવિએશન ટર્બાઇન ફ્યુઅલ (એટીએફ) ના ભાવમાં પણ ઘટાડો થયો છે. દિલ્હીમાં એટીએફનો ભાવ ૯૫,૩૧૧.૭૨ રૂપિયાથી ઘટીને ૮૯,૪૪૧ રૂપિયા પ્રતિ કિલોલીટર થયો છે. કોલકાતામાં તે ૯૧,૯૨૧ રૂપિયા, મુંબઈમાં ૮૩,૫૭૫.૪૨ રૂપિયા અને ચેન્નાઈમાં ૯૨,૫૦૩.૮૦ રૂપિયા થયો છે.
શું થયું મોંઘું?
૧. ફોર વ્હીલરના ભાવ વધ્યા
ટાટા મોટર્સ, કિયા ઇન્ડિયા, હ્યુન્ડાઈ ઇન્ડિયા અને હોન્ડા કાર્સે ૧ એપ્રિલથી પોતાની કારોના ભાવ વધારી દીધા છે. મારુતિ સુઝુકીની કારો ૪% સુધી મોંઘી થઈ ગઈ છે, જ્યારે કિયા, હ્યુન્ડાઈ અને મહિન્દ્રા એન્ડ મહિન્દ્રાએ ૩% સુધી ભાવ વધાર્યા છે. રેનોલ્ટ ઇન્ડિયાએ પણ ૨% સુધી વધારો કર્યો છે.
નવા નિયમોમાં ફેરફાર
* યુપીઆઈ નિયમ
હવે યુપીઆઈ સાથે જોડાયેલા નિષ્ક્રિય નંબરો દૂર કરવામાં આવશે. જો તમારો મોબાઇલ નંબર યુપીઆઈ સાથે લિંક છે અને ઘણા સમયથી સક્રિય નથી, તો તે નંબર દૂર થઈ શકે છે.
* બેન્કિંગ ફેરફાર
એસબીઆઈ, કેનરા અને પીએનબી સહિત અનેક બેન્કોએ ન્યૂનતમ બેલેન્સના નિયમોમાં ફેરફાર કર્યો છે. હવે ખાતાધારકોએ ન્યૂનતમ બેલેન્સ જાળવી રાખવા માટે વધુ સતર્ક રહેવું પડશે.
* વરિષ્ઠ નાગરિકો માટે રાહત
વરિષ્ઠ નાગરિકો માટે સરકારે ટેક્સ છૂટ વધારી છે. પોસ્ટ ઓફિસ સ્કીમથી થતી આવક પર હવે ૧ લાખ રૂપિયા સુધીની છૂટ મળશે, જે પહેલા ૫૦,૦૦૦ રૂપિયા હતી.
* મહિલા સન્માન સેવિંગ્સ સર્ટિફિકેટ સ્કીમ બંધ
મહિલા સન્માન સેવિંગ્સ સર્ટિફિકેટ સ્કીમ (એમએસએસસી) ૧ એપ્રિલથી બંધ કરી દેવામાં આવી છે. આ યોજના મહિલાઓને ૭.૫% નું વાર્ષિક વળતર આપતી હતી.
* નવી પેન્શન યોજના
કેન્દ્રીય કર્મચારીઓ માટે યુનિફાઇડ પેન્શન સ્કીમ (યુપીએસ) લાગુ કરવામાં આવી છે, જે જૂની અને નવી પેન્શન યોજના વચ્ચે સંતુલન બનાવશે. આ યોજના હેઠળ ૧૦,૦૦૦ રૂપિયા માસિક પેન્શનની ગેરંટી આપવામાં આવી છે.
