એમ્સ્ટેલવીનના વાગેનર હોકી સ્ટેડિયમમાં સોમવારે રમાયેલા એફઆઈએચ હોકી વર્લ્ડ કપ 2026ના પૂલ-ઈના મહત્વપૂર્ણ મુકાબલામાં આર્જેન્ટિનાએ ભારતને 5-3થી હરાવ્યું. આ હાર સાથે ભારતીય પુરુષ હોકી ટીમ સેમિફાઇનલની દોડમાંથી બહાર થઈ ગઈ.
ભારત માટે મેચની શરૂઆત મુશ્કેલ રહી. આર્જેન્ટિનાએ પ્રથમ જ મિનિટે જોઆકિન ટોસ્કાનીના ગોલથી ખાતું ખોલ્યું. ત્યારબાદ નિકોલસ ડેલા ટોરેએ પેનલ્ટી કોર્નરને ગોલમાં ફેરવીને આર્જેન્ટિનાની લીડ 2-0 કરી દીધી.
ભારતે વાપસીનો પ્રયાસ કર્યો અને 10મી મિનિટે સુખજીત સિંહે ગોલ કરીને સ્કોર 2-1 કર્યો. ત્યારબાદ ભારતીય ટીમે અનેક હુમલા કર્યા, પરંતુ આર્જેન્ટિનાની ડિફેન્સ લાઇનએ દબાણ જાળવી રાખ્યું.
બીજા હાફમાં આર્જેન્ટિનાએ ભારતીય ડિફેન્સ પર દબાણ વધાર્યું. ટોમસ ડોમેનેએ 33મી અને 45મી મિનિટે ગોલ કરીને આર્જેન્ટિનાની લીડ 4-1 કરી દીધી.
ચોથા ક્વાર્ટરમાં પણ આર્જેન્ટિનાએ આક્રમક રમત ચાલુ રાખી. લુકાસ ટોસ્કાનીએ 53મી મિનિટે ટીમનો પાંચમો ગોલ કરીને સ્કોર 5-2 કર્યો.
ભારતે અંતિમ મિનિટોમાં વાપસીનો પ્રયાસ કર્યો. સુખજીત સિંહે 58મી મિનિટે પોતાનો બીજો ગોલ કર્યો. ત્યારબાદ હાર્દિક સિંહે મેચના અંતિમ ક્ષણોમાં પેનલ્ટી સ્ટ્રોકને ગોલમાં ફેરવીને ભારત માટે ત્રીજો ગોલ કર્યો. જોકે, ભારત 5-3ની હાર ટાળી શક્યું નહીં.
આ હાર સાથે ભારતીય ટીમની સેમિફાઇનલમાં પહોંચવાની શક્યતાઓ સમાપ્ત થઈ ગઈ. ટૂર્નામેન્ટના બીજા તબક્કામાં ભારતને અગાઉ નેધરલેન્ડ્સ સામે 1-3થી હાર મળી હતી અને હવે આર્જેન્ટિના સામે પણ ટીમને પરાજયનો સામનો કરવો પડ્યો.
ભારતે આ પહેલાં પૂલ-ડીમાં વેલ્સને 3-1 અને પાકિસ્તાનને 5-3થી હરાવીને બીજા તબક્કામાં સ્થાન મેળવ્યું હતું. જોકે, બીજા તબક્કામાં ટીમ આ પ્રદર્શન જાળવી શકી નહીં.
