થાઇલેન્ડની રાજધાની બેંકોકના લોકપ્રિય ચાટુચાક (Chatuchak) જિલ્લામાં આવેલા એક બારમાં સોમવારે મોડી રાત્રે લાગેલી ભીષણ આગમાં ઓછામાં ઓછા 27 લોકોનાં મોત થયા છે, જ્યારે આઠ લોકો ગંભીર રીતે દાઝ્યા છે. ઘટનામાં 60થી વધુ લોકો ઘાયલ થયા છે અને તેમની વિવિધ હોસ્પિટલોમાં સારવાર ચાલી રહી છે.
પ્રત્યક્ષદર્શીઓના જણાવ્યા અનુસાર, મધરાત બાદ જ્યારે બારમાં મોટી સંખ્યામાં લોકો હાજર હતા અને મંચ પર લાઇવ સંગીત કાર્યક્રમ ચાલી રહ્યો હતો ત્યારે આગ લાગી હતી. થોડા જ સમયમાં આગે સમગ્ર પરિસરને પોતાની ઝપેટમાં લઈ લીધું. મુખ્ય પ્રવેશદ્વાર તરફથી ઊંચી જ્વાળાઓ ઊઠતાં અંદર હાજર લોકોમાં નાસભાગ મચી ગઈ.
સોશિયલ મીડિયા પર સામે આવેલા વીડિયોમાં લોકો જીવ બચાવવા માટે ભાગતા જોવા મળે છે. ઘણા લોકો ધુમાડા અને આગ વચ્ચે બહાર નીકળવાનો પ્રયાસ કરતા દેખાયા હતા, જ્યારે કેટલાક લોકો પડી ગયા હતા.
થાઇ અધિકારીઓના જણાવ્યા અનુસાર, આગ લાગવાના કારણોની તપાસ ચાલુ છે. પ્રાથમિક માહિતી મુજબ બારના વીજ નિયંત્રણ પેનલ અથવા કટ-આઉટ સ્વિચ નજીકથી આગની શરૂઆત થઈ હોવાના સંકેત મળ્યા છે. ત્યારબાદ થોડા જ મિનિટોમાં વિસ્ફોટ જેવી સ્થિતિ સર્જાઈ અને આગ ઝડપથી સમગ્ર પરિસરમાં ફેલાઈ ગઈ.
ઘટના સમયે કાર્યક્રમ રજૂ કરી રહેલા એક સંગીતકારે અધિકારીઓને જણાવ્યું કે શરૂઆતમાં વીજ સ્વિચ નજીક આગ જોવા મળી હતી અને ત્યારબાદ પરિસ્થિતિ અચાનક નિયંત્રણ બહાર થઈ ગઈ. ધુમાડો અને આગ એટલી ઝડપથી ફેલાયા કે લોકોને બહાર નીકળવા માટે પૂરતો સમય મળ્યો નહોતો.
બચાવ અધિકારીઓએ જણાવ્યું કે મોટાભાગના લોકોના મોત આગની જ્વાળાઓને કારણે નહીં પરંતુ ઝેરી ધુમાડાના કારણે થયા હોવાની આશંકા છે. પ્રાથમિક તપાસમાં જાણવા મળ્યું છે કે ઘણા લોકો ધુમાડાથી બચવા માટે બારના પાછળના ભાગ અને શૌચાલયોમાં છુપાઈ ગયા હતા. ત્યાં જ તેમનું ગૂંગળાઈ જવાથી મોત થયું અને બાદમાં મોટાભાગના મૃતદેહો ત્યાંથી જ મળી આવ્યા.
ઘટના દરમિયાન ત્યાંથી પસાર થઈ રહેલા કેટલાક સ્થાનિક લોકોએ પણ બચાવ કામગીરીમાં મદદ કરી હતી. એક પ્રત્યક્ષદર્શીએ જણાવ્યું કે તેણે પોતાની કાર રોકીને બારની બારીઓ તોડી અને અંદર ફસાયેલા લોકોને બહાર કાઢવાનો પ્રયાસ કર્યો હતો. એક મોટરસાયકલ ચાલકે પણ અનેક લોકોને બહાર કાઢવામાં અને તેમના શરીર પર લાગેલી આગ બુઝાવવામાં મદદ કરી હતી.
બચાવ કામગીરી દરમિયાન અગ્નિશામક દળ અને સ્થાનિક નાગરિકોના સંયુક્ત પ્રયાસોથી અનેક લોકોને બચાવવામાં આવ્યા.
માહિતી મળ્યા બાદ અગ્નિશામક દળની અનેક ગાડીઓ ઘટનાસ્થળે પહોંચી હતી. લગભગ અડધા કલાકની કામગીરી બાદ આગ પર કાબૂ મેળવી લેવામાં આવ્યો હતો. જોકે ત્યાં સુધીમાં બારનો મોટો ભાગ બળી ગયો હતો.
ઘટના બાદ સમગ્ર વિસ્તારને સુરક્ષા ઘેરામાં લેવામાં આવ્યો છે. ઘટનાસ્થળે ફોરેન્સિક નિષ્ણાતો, પોલીસ અને આપદા વ્યવસ્થાપન વિભાગની ટીમો તપાસમાં લાગી છે.
આગ બુઝાયા બાદ બારનું આંતરિક ભાગ સંપૂર્ણપણે બળી ગયેલું જોવા મળ્યું હતું. અધિકારીઓના જણાવ્યા અનુસાર, બારની સજાવટમાં ઉપયોગમાં લેવાયેલી જ્વલનશીલ સામગ્રીએ આગ ઝડપથી ફેલાવવામાં મદદ કરી હતી, જેના કારણે ઝેરી ધુમાડો પણ વધુ પ્રમાણમાં ફેલાયો.
પ્રાથમિક તપાસમાં એ પણ સામે આવ્યું છે કે બારના ઇમરજન્સી એક્ઝિટની આસપાસ કેટલાક ફર્નિચર અને અન્ય સામાન રાખવામાં આવ્યો હતો, જેના કારણે લોકોને બહાર નીકળવામાં મુશ્કેલી પડી હતી. જોકે અધિકારીઓએ સ્પષ્ટ કર્યું છે કે આ અંગેનો અંતિમ નિષ્કર્ષ વિગતવાર ફોરેન્સિક તપાસ બાદ જ સામે આવશે.
જો તપાસમાં સુરક્ષા નિયમોની અવગણના સાબિત થશે તો સંબંધિત જવાબદાર લોકો સામે કડક કાર્યવાહી થઈ શકે છે.
થાઇ સરકારે ઘટનાની ઉચ્ચસ્તરીય તપાસના આદેશ આપ્યા છે. અધિકારીઓએ જણાવ્યું કે આગ લાગવાનું વાસ્તવિક કારણ, ઇમારતની સુરક્ષા વ્યવસ્થા, અગ્નિશામક સાધનોની ઉપલબ્ધતા અને ઇમરજન્સી એક્ઝિટની સ્થિતિ સહિત તમામ પાસાઓની વિગતવાર તપાસ કરવામાં આવશે.
સરકારે મૃતકોના પરિવારજનો પ્રત્યે સંવેદના વ્યક્ત કરી છે અને ઘાયલોને શક્ય તમામ તબીબી સહાય ઉપલબ્ધ કરાવવાનો વિશ્વાસ વ્યક્ત કર્યો છે.
થાઇલેન્ડમાં જાહેર મનોરંજન સ્થળોએ આગ લાગવાની ઘટનાઓ નવી નથી. અગાઉના વર્ષોમાં પણ બાર અને નાઇટક્લબમાં લાગેલી આગમાં મોટી સંખ્યામાં લોકોનાં મોત થયા છે.
