બુધવારે નવી દિલ્હીના દક્ષિણ-પશ્ચિમ વિસ્તારમાં આવેલા પાલમના સાધ નગર વિસ્તારમાં ચાર માળની ઇમારતમાં લાગેલી આગની ઘટનામાં એક જ પરિવારના પાંચ લોકોના મોત થયા છે અને ત્રણ અન્ય ગંભીર રીતે ઘાયલ થયા છે.
માહિતી મુજબ આગ લાગવાના સમયે ઇમારતમાં એક જ પરિવારના કુલ નવ લોકો હાજર હતા અને આગ ઝડપથી ફેલાતા બધા અંદર ફસાઈ ગયા હતા. ઘટનાની જાણ થતા જ દિલ્હી ફાયર સર્વિસ, દિલ્હી પોલીસ અને એમ્બ્યુલન્સની અનેક ગાડીઓ સ્થળ પર પહોંચી હતી અને કઠિન પ્રયાસો બાદ આગ પર કાબૂ મેળવવામાં આવ્યો હતો તથા રાહત અને બચાવ કામગીરી હાથ ધરવામાં આવી હતી.
રાહત અને બચાવ કામગીરી
દિલ્હી ફાયર સર્વિસ, દિલ્હી પોલીસ અને એમ્બ્યુલન્સની ટીમોએ સ્થળ પર પહોંચીને તરત જ બચાવ કામગીરી શરૂ કરી હતી. ફાયર વિભાગના અધિકારીઓ મુજબ ઇમારત સંક્રીણ ગલીમાં હોવાને કારણે કામગીરીમાં મુશ્કેલીઓ આવી હતી. ભીડ અને તંગ માર્ગોને કારણે ઘણી એમ્બ્યુલન્સોને ઘટનાસ્થળથી થોડા અંતરે જ ઉભી રાખવી પડી હતી.
ઘાયલોના સારવાર અંગે માહિતી
આ ઘટનામાં ઘાયલ થયેલા ત્રણ લોકોને દિવ્ય પ્રસ્થ હોસ્પિટલમાં દાખલ કરવામાં આવ્યા છે. ડોક્ટરોના જણાવ્યા મુજબ તેમની સ્થિતિ ગંભીર પરંતુ સ્થિર છે. હોસ્પિટલ પ્રશાસને જણાવ્યું કે ધુમાડાના કારણે શ્વાસ લેવામાં તકલીફ અને દાઝવાના ઇજાઓ માટે સારવાર આપવામાં આવી રહી છે. અધિકારીઓએ જણાવ્યું કે ત્રણ એમ્બ્યુલન્સ તરત જ સ્થળ પર પહોંચી હતી અને વધારાની એમ્બ્યુલન્સને નજીકના વિસ્તારોમાં તૈયાર રાખવામાં આવી હતી.
આગ ફેલાવાની પ્રારંભિક માહિતી
પ્રારંભિક માહિતી મુજબ આગ ઇમારતના એક ભાગમાં લાગી હતી અને થોડા જ મિનિટોમાં સમગ્ર ઇમારતમાં ફેલાઈ ગઈ હતી. ધુમાડાના કારણે લોકોને બહાર નીકળવાની તક મળી નહોતી. ફાયર કર્મચારીઓએ આગ પર કાબૂ મેળવ્યો, પરંતુ તે પહેલાં નુકસાન થઈ ગયું હતું.
તપાસ ચાલુ
હાલ આગ લાગવાના ચોક્કસ કારણો અંગે સ્પષ્ટ માહિતી મળી નથી. પોલીસ અને ફાયર વિભાગે સ્થળનું નિરીક્ષણ શરૂ કર્યું છે. અધિકારીઓના જણાવ્યા મુજબ શોર્ટ સર્કિટ, ગેસ સિલિન્ડર અથવા અન્ય તકનિકી કારણોની તપાસ ચાલી રહી છે. તપાસ પૂર્ણ થયા બાદ જ ઘટનાનું ચોક્કસ કારણ અને સુરક્ષા નિયમોના પાલન અંગે માહિતી મળી શકશે.
