જર્મનીના ઉત્તરીય રાજ્ય લોઅર સેક્સનીના સ્ટેડે શહેરમાં સોમવારે માતા અને બાળક સહાય કેન્દ્રમાં કસ્ટડી વિવાદ દરમિયાન થયેલી ગોળીબારમાં કેન્દ્રના છ કર્મચારીઓના મોત થયા હતા, જ્યારે અનેક અન્ય લોકો ઘાયલ થયા હતા. પ્રાથમિક તપાસ મુજબ ઘટના ત્રણ મહિનાની બાળકીની કસ્ટડીને લઈને ચાલી રહેલા પારિવારિક વિવાદ સાથે જોડાયેલી હોવાનું સામે આવ્યું છે.
પોલીસના જણાવ્યા અનુસાર મૃતકોમાં ચાર મહિલાઓ અને બે પુરુષોનો સમાવેશ થાય છે અને તમામ કેન્દ્રમાં કર્મચારી તરીકે કાર્યરત હતા. વિવાદના કેન્દ્રમાં રહેલી ત્રણ મહિનાની બાળકી અને તેની માતા ઘટનાસમયે કેન્દ્રમાં હાજર હતા, પરંતુ બંને સુરક્ષિત રહ્યા હતા.
પોલીસના જણાવ્યા અનુસાર સ્થાનિક સમય મુજબ બપોરે લગભગ 12:10 વાગ્યે સ્ટેડેના ડાંકરસ્ટ્રાસે સ્થિત યુવા કલ્યાણ અને પરિવાર સહાય કેન્દ્રમાંથી ગોળીબારની જાણ કરવામાં આવી હતી. માહિતી મળતા જ મોટી સંખ્યામાં પોલીસ અને આપાતકાલીન સેવાઓ ઘટનાસ્થળે પહોંચી હતી.
તપાસમાં જાણવા મળ્યું કે ચાર મહિલાઓ અને એક પુરુષનું ઘટનાસ્થળે જ મોત થયું હતું, જ્યારે ગંભીર રીતે ઘાયલ અન્ય એક વ્યક્તિનું બાદમાં હોસ્પિટલમાં સારવાર દરમિયાન મૃત્યુ થયું હતું. તમામ મૃતકો વયસ્ક અને કેન્દ્રના કર્મચારીઓ હતા.
લોઅર સેક્સની પોલીસે જણાવ્યું કે મુખ્ય શંકાસ્પદ 45 વર્ષીય તુર્કી મૂળનો જર્મન નાગરિક છે, જેનો જન્મ જર્મનીમાં થયો હતો અને તે હેનોવરમાં રહે છે. તે સોમવારે પોતાની ત્રણ મહિનાની પુત્રીની કસ્ટડી સંબંધિત મુદ્દે ચર્ચા કરવા કેન્દ્રમાં આવ્યો હતો.
અધિકારીઓના જણાવ્યા અનુસાર તેની બેઠક કેન્દ્રના અનેક કર્મચારીઓ સાથે નક્કી કરવામાં આવી હતી. તે દરમિયાન તેણે ગોળીબાર શરૂ કર્યો હતો.
ઘટનાસમયે ત્રણ મહિનાની બાળકી અને તેની માતા પણ કચેરીમાં હાજર હતા. પોલીસએ પુષ્ટિ કરી છે કે બંનેને કોઈ શારીરિક ઈજા પહોંચી નથી.
અધિકારીઓના જણાવ્યા અનુસાર હુમલાનો નિશાન કેન્દ્રના કર્મચારીઓ બન્યા હતા, જ્યારે બાળકી અને તેની માતા સુરક્ષિત રહ્યા હતા.
ગોળીબાર બાદ આરોપી એક મહિલાની કારમાં ઘટનાસ્થળેથી ભાગી ગયો હતો. પોલીસે તરત જ વિસ્તારની ઘેરાબંધી કરીને શોધ અભિયાન શરૂ કર્યું હતું.
થોડા સમય બાદ પોલીસે નજીકના માર્ગ પર શંકાસ્પદ વાહનને રોકી લીધું હતું. મીડિયામાં સામે આવેલા વિડિયોમાં સશસ્ત્ર પોલીસ કર્મચારીઓ વાહન રોકીને તેમાં સવાર લોકોને બહાર કાઢીને કસ્ટડીમાં લેતા જોવા મળ્યા હતા.
આ કેસમાં પોલીસે મુખ્ય શંકાસ્પદ સહિત કુલ ત્રણ લોકોને કસ્ટડીમાં લીધા છે. અધિકારીઓએ જણાવ્યું છે કે હાલમાં સામાન્ય જનતા માટે કોઈ વધારાનો ખતરો નથી.
લ્યુનેબર્ગ પોલીસ પ્રમુખ કેથરીન શૂલે જણાવ્યું કે આરોપી અગાઉ ધમકીઓ સંબંધિત કેસોમાં પોલીસના ધ્યાનમાં આવી ચૂક્યો હતો. જોકે તેને અત્યંત હિંસક વ્યક્તિ તરીકે વર્ગીકૃત કરવામાં આવ્યો ન હતો.
તપાસમાં એ પણ સામે આવ્યું છે કે આરોપી પાસે માન્ય હથિયાર લાઇસન્સ નહોતું. પોલીસે હવે ગોળીબારમાં ઉપયોગમાં લેવાયેલ હથિયાર ક્યાંથી મેળવાયું તેની તપાસ શરૂ કરી છે.
લોઅર સેક્સનીની ગૃહમંત્રી ડેનિએલા બેહરેન્સે મોડીરાત્રે મીડિયા સાથેની વાતચીતમાં જણાવ્યું કે પ્રાથમિક તપાસના આધારે ઘટના સંપૂર્ણપણે પારિવારિક કારણો સાથે જોડાયેલી જણાય છે.
તેમણે જણાવ્યું કે આ અત્યંત ઠંડા દિમાગથી કરવામાં આવેલ હિંસક ગુનો હતો અને તેની પાછળ કોઈ રાજકીય, ધાર્મિક અથવા આર્થિક હેતુ દેખાતો નથી.
તેમના જણાવ્યા અનુસાર હાલમાં ઉપલબ્ધ પુરાવા સૂચવે છે કે ઘટનાનો સંબંધ માત્ર પારિવારિક વિવાદ અને બાળકીની કસ્ટડી સાથે હતો.
ગોળીબાર દરમિયાન કેન્દ્રની આસપાસ આવેલી ડે-કેર અને પ્રાથમિક શાળાઓમાં સુરક્ષા પગલાં તરીકે બાળકોને તરત જ સુરક્ષિત સ્થળોએ ખસેડવામાં આવ્યા હતા.
બાદમાં પ્રશાસને વાલીઓને બોલાવી બાળકોને તેમના હવાલે કર્યા હતા. તપાસમાં અવરોધ ન આવે તે માટે સ્થાનિક પ્રશાસને થોડા સમય માટે સમગ્ર વિસ્તારને સીલ કર્યો હતો.
હુમલા બાદ સ્ટેડે શહેરમાં મોટી સંખ્યામાં પોલીસ, ફોરેન્સિક નિષ્ણાતો અને આપાતકાલીન તબીબી ટીમો તૈનાત કરવામાં આવી હતી. સમગ્ર વિસ્તારને સુરક્ષા ઘેરામાં લઈને પુરાવા એકત્રિત કરવાની કાર્યવાહી શરૂ કરવામાં આવી હતી.
ફોરેન્સિક ટીમે ઘટનાસ્થળેથી અનેક મહત્વપૂર્ણ પુરાવા એકત્રિત કર્યા છે. પોલીસે શંકાસ્પદની પૂછપરછ શરૂ કરી છે કે હુમલાની યોજના ક્યારે અને કેવી રીતે બનાવવામાં આવી હતી તથા તેમાં અન્ય કોઈની મદદ હતી કે નહીં.
પોલીસે હત્યા, હત્યાના પ્રયાસ અને ગેરકાયદેસર હથિયારના ઉપયોગ સહિતની અનેક કલમો હેઠળ કેસ નોંધ્યો છે. તપાસ એજન્સીઓ આરોપીની પૃષ્ઠભૂમિ, પારિવારિક વિવાદ, માનસિક સ્થિતિ અને હુમલામાં ઉપયોગમાં લેવાયેલા હથિયારના સ્ત્રોતની વિગતવાર તપાસ કરી રહી છે.
અધિકારીઓએ જણાવ્યું છે કે તમામ પાસાઓની સઘન તપાસ ચાલુ છે અને આગામી દિવસોમાં પૂછપરછ તથા ફોરેન્સિક અહેવાલોના આધારે વધુ માહિતી સામે આવી શકે છે.
