છેલ્લા કેટલાક દિવસોથી ભારત અને અમેરિકા વચ્ચે વેપાર કરાર અંગે ચર્ચા ચાલી રહી હતી અને હવે બંને દેશો વચ્ચે આ મુદ્દે સહમતિ બની છે. ભારતે અમેરિકા સાથે એક અંતરિમ વેપાર કરારને મંજૂરી આપી છે. આ અંગે બંને દેશોએ સંયુક્ત નિવેદન જાહેર કરીને કરારની માહિતી આપી છે.
ભારત અને અમેરિકા વચ્ચે તાજેતરમાં એક અંતરિમ વેપાર કરાર પર સહમતિ થઈ છે. આ કરાર હેઠળ અમેરિકા ભારતીય ઉત્પાદનો પર લાગતા ટેરિફને 50 ટકા પરથી ઘટાડીને 18 ટકા કરશે. તેના પરિણામે ભારતીય MSMEs, ખેડૂતો, માછીમારો અને નાના ઉદ્યોગકારો માટે અમેરિકન બજારમાં પ્રવેશ સરળ બનશે.
આ અંતરિમ વેપાર કરાર હેઠળ અમેરિકા ભારતીય માલ પરના ટેરિફને ઘટાડીને 18 ટકા કરશે. ટેક્સટાઇલ, કપડા, ચામડા અને ફૂટવેર, પ્લાસ્ટિક અને રબર ઉત્પાદનો, ઓર્ગેનિક કેમિકલ્સ, હોમ ડેકોર, હસ્તકલા અને પસંદગીની મશીનરી જેવા ક્ષેત્રોને અમેરિકન બજારમાં તકો મળશે.
જેનેરિક દવાઓ, રત્ન અને હીરા તેમજ વિમાનના ભાગો પર ટેરિફ સંપૂર્ણપણે શૂન્ય કરવામાં આવ્યો છે. ઉપરાંત, ભારતને સેકશન 232 હેઠળ વિમાનના ભાગો પર છૂટ, ઓટો પાર્ટ્સ માટે ટેરિફ રેટ ક્વોટા અને જેનેરિક ફાર્માસ્યુટિકલ્સ અંગે ચર્ચામાં સકારાત્મક પરિણામો મળશે.
ભારતે તેના સંવેદનશીલ કૃષિ અને ડેરી ઉત્પાદનોની સુરક્ષા પર ભાર મૂક્યો છે. મકાઈ, ઘઉં, ચોખા, સોયા, પોલ્ટ્રી, દૂધ, ચીઝ, ઇથેનોલ (ઇંધણ), તમાકુ, કેટલીક શાકભાજી અને માંસ જેવા ઉત્પાદનો સંપૂર્ણપણે સુરક્ષિત રહેશે. આ પગલાથી ભારતીય ખેડૂતો અને ડેરી ઉત્પાદકો પર અમેરિકન બજારની સ્પર્ધાનો પ્રભાવ પડશે નહીં.
આ કરાર હેઠળ ભારત પણ અમેરિકન ઔદ્યોગિક અને કૃષિ ઉત્પાદનો પર ટેરિફ ઘટાડશે અથવા સંપૂર્ણપણે દૂર કરશે. તેમાં ડ્રાયડ ડિસ્ટિલર્સ ગ્રેન, પશુઆહાર માટેનું લાલ જ્વાર, ટ્રી નટ્સ, તાજા અને પ્રોસેસ્ડ ફળો, સોયાબીન તેલ, વાઇન અને સ્પિરિટ્સનો સમાવેશ થાય છે.
ભારત અને અમેરિકા નોન-ટેરિફ અવરોધો દૂર કરવા અને ડિજિટલ ટ્રેડમાં આવતી અડચણો દૂર કરવા પર પણ સહમત થયા છે. ભારત અમેરિકન મેડિકલ ડિવાઇસ પર લાંબા સમયથી લાગેલી પ્રતિબંધને દૂર કરશે અને આઈટી તથા સંચાર ટેકનોલોજી ઉત્પાદનો માટે લાયસન્સિંગ પ્રક્રિયામાં સુધારા કરશે. બંને દેશો ટેકનોલોજી ઉત્પાદનોમાં વેપાર વધારવા અને સંયુક્ત ટેકનોલોજી સહયોગ વિસ્તૃત કરવા પર સહમત થયા છે. તેમાં ગ્રાફિક્સ પ્રોસેસિંગ યુનિટ, ડેટા સેન્ટરમાં ઉપયોગમાં લેવાતા અન્ય ઉપકરણો અને અદ્યતન ટેકનોલોજીનો સમાવેશ થાય છે.
આ કરારના પરિણામે વેપાર વધારવાની સાથે રોજગાર સર્જન માટે તકો ઊભી થશે. MSMEs, યુવાનો અને મહિલાઓ માટે રોજગારની તકો ઊભી થવાની વાત જણાવવામાં આવી છે. સાથે સાથે સપ્લાય ચેનને મજબૂત કરવા અને નવીનતાને પ્રોત્સાહન આપવા માટે આર્થિક સુરક્ષા સહયોગને મજબૂતી આપવામાં આવશે.
