પ્રધાનમંત્રી નરેન્દ્ર મોદી 7 અને 8 ફેબ્રુઆરીએ મલેશિયાની મુલાકાત લેશે. આ દરમિયાન તેઓ મલેશિયાના પ્રધાનમંત્રી અનવર ઇબ્રાહિમ સાથે દ્વિપક્ષીય બેઠક કરશે. બેઠકમાં રક્ષા, વેપાર અને રોકાણ સંબંધિત મુદ્દાઓ પર ચર્ચા થવાની છે. આ મુલાકાત ભારતની Act East Policyના અમલના સંદર્ભમાં મહત્વપૂર્ણ માનવામાં આવી રહી છે.
આગસ્ટ 2024માં ભારત અને મલેશિયા વચ્ચેના સંબંધોને વ્યાપક વ્યૂહાત્મક ભાગીદારીનો દરજ્જો આપવામાં આવ્યા બાદ પ્રધાનમંત્રી મોદી માટે મલેશિયાની આ પ્રથમ મુલાકાત છે. વિદેશ મંત્રાલયના જણાવ્યા અનુસાર, મુલાકાત દરમિયાન બંને દેશો રક્ષા સહકારના ક્ષેત્રોમાં રહેલી સંભાવનાઓની સમીક્ષા કરશે.
રક્ષા સહકાર સંબંધિત ચર્ચાઓમાં ડોર્નિયર વિમાનોની વેચાણ પ્રક્રિયા, સ્કોર્પીન સબમરીન તેમજ SU-30 વિમાનોના જાળવણી અને સપોર્ટ સંબંધિત મુદ્દાઓનો સમાવેશ થાય છે.
પ્રધાનમંત્રી મોદી મુલાકાત દરમિયાન મલેશિયામાં વસતા ભારતીય વેપારીઓ અને ઉદ્યોગ પ્રતિનિધિઓ સાથે પણ મુલાકાત કરશે. મલેશિયામાં અંદાજે 29 લાખ ભારતીય પ્રવાસીઓ રહે છે, જે વૈશ્વિક સ્તરે ત્રીજો સૌથી મોટો અને મલેશિયામાં બીજો સૌથી મોટો ભારતીય સમુદાય છે. આ મુલાકાત વેપારિક સહયોગને મજબૂત બનાવવા અને નવા રોકાણ અવસરો પર ચર્ચા માટે પણ નિર્ધારિત છે.
આસિયાન અને ઇન્ડો-પેસિફિક વિસ્તારમાં મલેશિયા ભારતનો મહત્વપૂર્ણ અને વિશ્વસનીય ભાગીદાર છે. Act East Policy હેઠળ ભારતની વ્યૂહરચનામાં મલેશિયાની ભૂમિકા મહત્વપૂર્ણ છે. મુલાકાતનો હેતુ બંને દેશો વચ્ચે વ્યૂહાત્મક અને આર્થિક સહયોગને વધુ મજબૂત કરવાનો છે.
કુઆલાલંપુરના બ્રિકફિલ્ડ્સ વિસ્તારમાં આવેલ તોરાણા ગેટ ભારત અને મલેશિયા વચ્ચે વધતી મિત્રતાનું પ્રતિક માનવામાં આવે છે. આ ગેટનું ઉદ્ઘાટન 23 નવેમ્બર 2015ના રોજ પ્રધાનમંત્રી નરેન્દ્ર મોદી અને તે સમયના મલેશિયાના પ્રધાનમંત્રી નજિબ રઝાક દ્વારા સંયુક્ત રીતે કરવામાં આવ્યું હતું.
19 થી 21 ઓગસ્ટ 2024 દરમિયાન પ્રધાનમંત્રી અનવર ઇબ્રાહિમની ભારત મુલાકાત દરમિયાન ભારત-મલેશિયા સંબંધોને વ્યાપક વ્યૂહાત્મક ભાગીદારીનો દરજ્જો આપવામાં આવ્યો હતો. તે પહેલાં 2015માં પ્રધાનમંત્રી મોદીની મલેશિયા મુલાકાત દરમિયાન દ્વિપક્ષીય સંબંધોને ઉન્નત વ્યૂહાત્મક ભાગીદારીનો દરજ્જો આપવામાં આવ્યો હતો. બંને દેશો વચ્ચે રાજદ્વારી સંબંધો 1957માં સ્થાપિત થયા હતા.
છેલ્લા કેટલાક વર્ષોમાં પ્રધાનમંત્રી મોદી અને પ્રધાનમંત્રી અનવર ઇબ્રાહિમ વચ્ચે અનેક વખત સંપર્ક અને ચર્ચાઓ થઈ છે. 6 જુલાઈ 2025ના રોજ બ્રાઝીલમાં યોજાયેલા બ્રિક્સ શિખર સંમેલનમાં બંને નેતાઓ મળ્યા હતા. 26 ઓક્ટોબર 2025ના રોજ પ્રધાનમંત્રી મોદીએ 22મા આસિયાન-ભારત શિખર સંમેલનમાં વર્ચ્યુઅલ રીતે ભાગ લીધો હતો. તે પહેલાં 22 ઓક્ટોબર 2025ના રોજ બંને નેતાઓ વચ્ચે ટેલિફોનિક વાતચીત પણ થઈ હતી, જેમાં દ્વિપક્ષીય મુદ્દાઓ પર ચર્ચા કરવામાં આવી હતી.
આ મુલાકાત દરમિયાન રક્ષા, વેપાર અને રોકાણ ઉપરાંત સુરક્ષા, આર્થિક અને ટેકનોલોજી સહયોગના વિવિધ પાસાઓ પર પણ ચર્ચા થવાની છે.
