ન્યૂઝીલેન્ડની મુલાકાત દરમિયાન વડાપ્રધાન નરેન્દ્ર મોદીએ ઓકલેન્ડમાં ભારતીય સમુદાયને સંબોધિત કરતાં પોતાની જૂની યાદો શેર કરી. તેમણે જણાવ્યું કે લગભગ 40 વર્ષ બાદ ભારતના કોઈ વડાપ્રધાન ન્યૂઝીલેન્ડની મુલાકાતે આવ્યા છે. વડાપ્રધાને કહ્યું કે વડાપ્રધાન બન્યા પછી આ તેમની પ્રથમ ન્યૂઝીલેન્ડ મુલાકાત છે, પરંતુ લગભગ 25થી 30 વર્ષ પહેલાં, જ્યારે તેઓ કોઈ સરકારનો ભાગ નહોતા, ત્યારે પણ તેમને અહીં આવવાનો અવસર મળ્યો હતો.
ભારતીય મૂળના લોકોની મોટી ઉપસ્થિતિ વચ્ચે વડાપ્રધાને ભારત અને ન્યૂઝીલેન્ડ વચ્ચેના ઐતિહાસિક સંબંધો, આર્થિક સહકાર, સાંસ્કૃતિક જોડાણ અને ભારતની વિકાસયાત્રા અંગે વિગતવાર વાત કરી. તેમણે બંને દેશો વચ્ચેના દ્વિપક્ષીય સંબંધોને નવી ઊંચાઈએ લઈ જવાની પ્રતિબદ્ધતા વ્યક્ત કરી અને જણાવ્યું કે આવનારા વર્ષોમાં બંને દેશો વચ્ચેનો સહકાર વધુ મજબૂત બનશે.
વડાપ્રધાને ભારતીય સમુદાયની ભૂમિકાની પ્રશંસા કરતાં કહ્યું કે પ્રવાસી ભારતીયો ભારત અને ન્યૂઝીલેન્ડ વચ્ચેના સંબંધોને મજબૂત બનાવવામાં મહત્વપૂર્ણ સેતુ તરીકે કાર્ય કરે છે. તેમણે જણાવ્યું કે ભારતીય મૂળના લોકો જ્યાં પણ રહે છે ત્યાંના વિકાસમાં સક્રિય યોગદાન આપે છે અને સાથે સાથે પોતાની સાંસ્કૃતિક મૂળ સાથે પણ જોડાયેલા રહે છે.
માઓરી પરંપરાના "વાકા" (Waka)નો ઉલ્લેખ કરતાં વડાપ્રધાને તેને ભારત અને ન્યૂઝીલેન્ડની સંયુક્ત યાત્રાનું પ્રતીક ગણાવ્યું. તેમણે જણાવ્યું કે વેપાર, શિક્ષણ, નવીનતા, કૃષિ, વિજ્ઞાન અને ટેક્નોલોજી સહિતના અનેક ક્ષેત્રોમાં બંને દેશો વચ્ચે સહકારની વ્યાપક સંભાવનાઓ છે.
તેમણે વિશ્વાસ વ્યક્ત કર્યો કે બંને દેશોના લોકો વચ્ચેની ભાગીદારી ભવિષ્યમાં દ્વિપક્ષીય સંબંધોને વધુ મજબૂત બનાવશે અને નવી આર્થિક તથા વ્યૂહાત્મક તકોના દ્વાર ખોલશે.
ન્યૂઝીલેન્ડમાં વસતા ભારતીય સમુદાયની સિદ્ધિઓનો ઉલ્લેખ કરતાં વડાપ્રધાને જણાવ્યું કે ભારતીય મૂળના લોકો શિક્ષણ, વેપાર, વિજ્ઞાન, જાહેર જીવન, રમતગમત અને વિવિધ વ્યાવસાયિક ક્ષેત્રોમાં નોંધપાત્ર યોગદાન આપી રહ્યા છે. તેમણે કહ્યું કે કોઈપણ દેશની સૌથી મોટી શક્તિ તેના લોકો હોય છે અને ન્યૂઝીલેન્ડે વિવિધતાને સ્વીકારી સમાવેશી સમાજનું ઉદાહરણ રજૂ કર્યું છે. ભારતીય સમુદાય પણ દેશના સામાજિક અને આર્થિક વિકાસનો મહત્વપૂર્ણ ભાગ બની ગયો છે.
વડાપ્રધાને એવા ભારતીય મૂળના લોકોનો પણ ઉલ્લેખ કર્યો જેમણે ન્યૂઝીલેન્ડના વિવિધ ક્ષેત્રોમાં નેતૃત્વની ભૂમિકા ભજવી છે અને બંને દેશો વચ્ચેના સંબંધોને મજબૂત બનાવવામાં યોગદાન આપ્યું છે.
ભારતના વિકાસ વિશે બોલતાં વડાપ્રધાને જણાવ્યું કે હજારો વર્ષ જૂની સંસ્કૃતિ ધરાવતો દેશ હોવા છતાં ભારતે આધુનિક ટેક્નોલોજી અને નવીનતાને ઝડપથી અપનાવી છે. તેમણે કહ્યું કે ભારત પોતાની સાંસ્કૃતિક વારસાનું સંરક્ષણ કરતાં ડિજિટલ પરિવર્તન, ટેક્નોલોજીકલ વિકાસ અને આર્થિક સુધારાઓને સમાન મહત્વ આપે છે. તેમના જણાવ્યા અનુસાર ભારતનું વિકાસ મોડેલ પરંપરા અને આધુનિકતા વચ્ચે સંતુલન સ્થાપિત કરવાનો પ્રયાસ કરે છે.
વડાપ્રધાને મહિલાઓની ભાગીદારી, ગ્રામ વિકાસ અને ટકાઉ કૃષિ સંબંધિત ભારતની પહેલોનો પણ ઉલ્લેખ કર્યો અને જણાવ્યું કે ભારત વિશ્વના વિવિધ દેશોના સફળ અનુભવોમાંથી શીખીને પોતાની નીતિઓને સતત વધુ સારી બનાવી રહ્યું છે.
ભારતની આર્થિક પ્રગતિ અંગે વડાપ્રધાને જણાવ્યું કે વૈશ્વિક આર્થિક પડકારો છતાં ભારત વિશ્વની સૌથી ઝડપી વિકસતી મુખ્ય અર્થવ્યવસ્થાઓમાં સામેલ છે. તેમણે ડિજિટલ પેમેન્ટ સિસ્ટમ, મોબાઇલ ઉત્પાદન, અવકાશ કાર્યક્રમ, ડ્રોન ટેક્નોલોજી અને નવીનતા ક્ષેત્રે ભારતની સિદ્ધિઓનો ઉલ્લેખ કર્યો. તેમણે જણાવ્યું કે યુનિફાઇડ પેમેન્ટ્સ ઇન્ટરફેસ (UPI) દ્વારા નાણાકીય લેવડદેવડ સરળ બની છે અને ભારત ડિજિટલ અર્થવ્યવસ્થાના ક્ષેત્રમાં વૈશ્વિક સ્તરે નવી ઓળખ બનાવી રહ્યું છે. તેમણે પર્યાવરણ સંરક્ષણ, કુદરતી ખેતી અને ટકાઉ વિકાસને પણ ભારતની પ્રાથમિકતાઓમાં ગણાવ્યા.
વડાપ્રધાન મોદીએ ભારત અને ન્યૂઝીલેન્ડ વચ્ચેના આર્થિક સહકારને વધુ મજબૂત બનાવવાની જરૂરિયાત પર ભાર મૂક્યો. તેમણે જણાવ્યું કે વેપાર, રોકાણ, કૃષિ, ફૂડ પ્રોસેસિંગ, શિક્ષણ, સ્ટાર્ટઅપ, નવીનતા અને અવકાશ ક્ષેત્રમાં બંને દેશો વચ્ચે સહકારની વિશાળ સંભાવનાઓ છે. તેમણે વિશ્વાસ વ્યક્ત કર્યો કે ભવિષ્યમાં થતા આર્થિક કરારો બંને દેશોના ઉદ્યોગો અને વ્યવસાયો માટે નવી તકો ઊભી કરશે અને દ્વિપક્ષીય વેપારને વધુ ગતિ આપશે.
વડાપ્રધાને ભારત અને ન્યૂઝીલેન્ડ વચ્ચેના રમતગમત સંબંધોનો પણ ઉલ્લેખ કરતાં જણાવ્યું કે બંને દેશો વચ્ચે રમતગમત સહકારનો લાંબો ઇતિહાસ રહ્યો છે. તેમણે હોકી અને ક્રિકેટ જેવા રમતો દ્વારા બંને દેશોના મજબૂત સંબંધોની ચર્ચા કરી અને રમતગમત મારફતે લોકો વચ્ચેના સંપર્કને વધુ મજબૂત બનાવવાની જરૂરિયાત પર ભાર મૂક્યો. ઉપરાંત તેમણે સાંસ્કૃતિક વારસાના સંરક્ષણને બંને દેશોની સંયુક્ત પ્રતિબદ્ધતા ગણાવી અને જણાવ્યું કે ભારત તથા ન્યૂઝીલેન્ડ પોતાની મૂળ પરંપરાઓનો સન્માન કરતાં આધુનિક વિકાસના માર્ગે આગળ વધી રહ્યા છે.
