વૈશ્વિક બજારોમાંથી મળેલા નબળા સંકેતો વચ્ચે ભારતીય શેરબજાર ગુરુવાર, 5 ફેબ્રુઆરી 2026ના રોજ સપાટ શરૂઆત બાદ દબાણમાં આવી ગયો. શરૂઆતના કારોબારમાં રોકાણકારોની સતર્કતા દેખાઈ, પરંતુ થોડા સમયમાં વેચવાલી વધી. પરિણામે બેન્ચમાર્ક સૂચકાંકો પર સીધી અસર પડી અને સેન્સેક્સ 400 અંકથી વધુ તૂટ્યો, જ્યારે નિફ્ટી 25,650ના સ્તરથી નીચે સરક્યો. આઈટી શેરોમાં વેચવાલીના કારણે બજારની ભાવના નબળી રહી.
આજની ચાલ સંપૂર્ણપણે સ્ટોક-સ્પેસિફિક રહી. વ્યાપક ખરીદીથી રોકાણકારો દૂર રહ્યા અને જ્યાં ત્રિમાસિક પરિણામો અથવા ખાસ સમાચાર હતા તેવા શેરોમાં જ મર્યાદિત હલચલ જોવા મળી.
આજના કારોબારમાં રોકાણકારોની નજર મુખ્ય કંપનીઓના ડિસેમ્બર ત્રિમાસિક પરિણામો પર રહી. ભારતી એરટેલ, ટાટા મોટર્સ પેસેન્જર વ્હીકલ્સ, હીરો મોટોકોર્પ અને લાઈફ ઈન્સ્યોરન્સ કોર્પોરેશન ઓફ ઈન્ડિયા આજે પોતાના નાણાકીય પરિણામો જાહેર કરવાની છે. આ પરિણામો ટેલિકોમ, ઓટો અને ઈન્સ્યોરન્સ ક્ષેત્રની દિશા નક્કી કરી શકે છે. પરિણામો જાહેર થાય ત્યાં સુધી રોકાણકારો સતર્ક વલણ અપનાવી રહ્યા છે.
આઈટી શેરોમાં દબાણ યથાવત રહ્યું. આર્ટિફિશિયલ ઈન્ટેલિજન્સમાં ઝડપી બદલાવ અને વધતી ઓટોમેશનને લઈને રોકાણકારોની ચિંતા વધી છે. તેમને આશંકા છે કે આવનારા સમયમાં આ પરિબળો આઈટી કંપનીઓની હાયરિંગ, માર્જિન અને વૃદ્ધિને અસર કરી શકે છે. અગાઉના સત્રમાં પણ આઈટી શેરોમાં ભારે વેચવાલી જોવા મળી હતી અને આજે પણ નવી ખરીદીથી રોકાણકારો દૂર રહ્યા, જેના કારણે બજારની રિકવરી નબળી રહી.
બીએસઈ સેન્સેક્સની શરૂઆત 83,757ના સ્તરે હળવી નબળાઈ સાથે થઈ હતી. શરૂઆતની ઘટ વધતી ગઈ અને સવારે 9:22 વાગ્યે સેન્સેક્સ 273.15 અંક અથવા 0.33 ટકા ઘટીને 83,544.54 પર કારોબાર કરતો હતો. બાદમાં ઘટાડો વધુ ઊંડો બન્યો અને સેન્સેક્સ 400 અંકથી વધુ તૂટ્યો.
નેશનલ સ્ટોક એક્સચેન્જનો નિફ્ટી-50 પણ નબળી શરૂઆત સાથે 25,755.90 પર ખુલ્યો. સવારે 9:23 વાગ્યે નિફ્ટી 87.15 અંક અથવા 0.34 ટકા ઘટીને 25,685 પર ટ્રેડ થતો જોવા મળ્યો. ત્યારબાદ ઘટાડો વધ્યો અને નિફ્ટી 25,650ના સ્તરથી નીચે ગયો. આ દબાણ પાછળ આઈટી શેરોમાં વેચવાલી અને વૈશ્વિક બજારોના નકારાત્મક સંકેતો જવાબદાર ગણાયા.
ગુરુવારે એશિયાઈ શેરબજારોમાં પણ ઘટાડો નોંધાયો. વોલ સ્ટ્રીટના અગાઉના સત્રના વલણ અનુસાર ટેક્નોલોજી શેરોમાં વેચવાલી ચાલુ રહી. દક્ષિણ કોરિયાનો કોસ્પી ઇન્ડેક્સ અંદાજે 2.35 ટકા સુધી તૂટ્યો, જ્યારે જાપાનનો નિક્કી 225 ઇન્ડેક્સ લગભગ 0.49 ટકાના ઘટાડા સાથે ટ્રેડ થયો. આ નબળા સંકેતોએ ભારતીય બજારની ભાવનાને વધુ દબાણમાં મૂકી.
અમેરિકી બજારોમાં પણ નબળાઈ રહી. એસએન્ડપી 500 ઇન્ડેક્સ 0.51 ટકાના ઘટાડા સાથે બંધ થયો, જ્યારે ટેક્નોલોજી શેરોથી ભરેલો નાસ્ડેક 100 લગભગ 1.8 ટકા તૂટ્યો. બ્લૂમબર્ગના જણાવ્યા મુજબ નાસ્ડેક 100એ ઓક્ટોબર પછીની સૌથી મોટી બે દિવસની ઘટાડાની નોંધ કરી અને તે તેના 100-ડે મૂવિંગ એવરેજથી નીચે સરક્યો.
હવે રોકાણકારોની નજર નિફ્ટી આઈટી ઇન્ડેક્સ પર છે. એક દિવસ અગાઉ વૈશ્વિક સેલ-ઓફ વચ્ચે આ ઇન્ડેક્સમાં છ વર્ષથી વધુ સમયની સૌથી મોટી ઘટાડો નોંધાયો હતો. આઈટી ક્ષેત્રમાં દબાણ યથાવત રહે તો તેની અસર સમગ્ર બજારની ભાવનાએ પણ પડી શકે છે.
કોટક સિક્યુરિટીઝના હેડ ઇક્વિટી રિસર્ચ શ્રીકાંત ચૌહાણના જણાવ્યા મુજબ વર્તમાન બજારમાં સ્તરોનું મહત્વ વધ્યું છે. તેમના અનુસાર ઉપર તરફ 25,800નું સ્તર અથવા 50-ડે સિમ્પલ મૂવિંગ એવરેજ મજબૂત રેઝિસ્ટન્સ ઝોન તરીકે કામ કરશે. જો બજાર આ સ્તરો ઉપર ટકી રહે છે તો નિફ્ટી 25,900થી 26,000 સુધીની ચાલ દર્શાવી શકે છે. નીચે તરફ 25,600નું સ્તર મહત્વપૂર્ણ છે અને તેનાથી નીચે નિફ્ટી 25,500થી 25,350 સુધી સરકી શકે છે. વર્તમાન પરિસ્થિતિમાં બજાર એક જ દિશામાં નથી, તેથી ડે ટ્રેડર્સ માટે લેવલ આધારિત ટ્રેડિંગને સૌથી સુરક્ષિત વ્યૂહરચના ગણવામાં આવે છે.
કોમોડિટી બજારમાં પણ નબળાઈ જોવા મળી. એમસીએક્સ પર ચાંદીના ફ્યુચર્સના ભાવની શરૂઆત નબળી રહી. સિલ્વરનો બેન્ચમાર્ક માર્ચ કોન્ટ્રાક્ટ 10,754 રૂપિયાના ઘટાડા સાથે 2,58,096 રૂપિયા પ્રતિ કિલો પર ખુલ્યો, જ્યારે અગાઉનો બંધ ભાવ 2,68,850 રૂપિયા હતો. સમાચાર લખાતા સુધી કોન્ટ્રાક્ટ 16,131 રૂપિયાના ઘટાડા સાથે 2,52,719 રૂપિયા પ્રતિ કિલો પર ટ્રેડ થતો હતો. દિવસ દરમિયાન ચાંદીએ 2,58,096 રૂપિયાનું ઉચ્ચ સ્તર અને 2,52,719 રૂપિયાનું નીચું સ્તર સ્પર્શ્યું. આ વર્ષે ચાંદી 4,20,048 રૂપિયા પ્રતિ કિલોના ઉચ્ચતમ સ્તર સુધી પહોંચી ચૂકી છે.
