ભારતીય ક્રિકેટના પૂર્વ કેપ્ટન સૌરવ ગાંગુલીને તેમના જન્મદિવસે આંતરરાષ્ટ્રીય ક્રિકેટ પરિષદ (ICC) દ્વારા સત્તાવાર રીતે ICC Hall of Fameમાં સામેલ કરવામાં આવ્યા છે. આ સન્માન સાથે તેઓ આ પ્રતિષ્ઠિત ઉપલબ્ધિ મેળવનારા ભારતના 12મા ક્રિકેટર બન્યા છે.
ICC Hall of Fameમાં સ્થાન મળ્યા બાદ સૌરવ ગાંગુલીએ સોશિયલ મીડિયા મારફતે પોતાની ખુશી વ્યક્ત કરી હતી. તેમણે આંતરરાષ્ટ્રીય ક્રિકેટ પરિષદ (ICC) અને ICCના અધ્યક્ષ જય શાહનો આભાર વ્યક્ત કરતાં જણાવ્યું કે આ તેમના ક્રિકેટ જીવનના સૌથી મોટા સન્માનોમાંનું એક છે. ગાંગુલીએ કહ્યું કે વિશ્વના મહાન ક્રિકેટરો સાથે ICC Hall of Fameનો ભાગ બનવું તેમના માટે ગૌરવ અને સન્માનની વાત છે. તેમણે વધુમાં જણાવ્યું કે વિશ્વ ક્રિકેટમાં પોતાની અમિટ છાપ છોડનાર ભારતીય ક્રિકેટરોની વિશિષ્ટ યાદીમાં સ્થાન મેળવવું વિશેષ ઉપલબ્ધિ છે.
ICC Hall of Fameને ક્રિકેટ જગતનું સૌથી પ્રતિષ્ઠિત વ્યક્તિગત સન્માન માનવામાં આવે છે. તેમાં માત્ર એવા ખેલાડીઓને સ્થાન આપવામાં આવે છે જેમણે પોતાના પ્રદર્શન, નેતૃત્વ અને રમતમાં યોગદાન દ્વારા આંતરરાષ્ટ્રીય ક્રિકેટના ઇતિહાસને નવી દિશા આપી હોય. સૌરવ ગાંગુલી હવે એવા ભારતીય દિગ્ગજોની યાદીમાં સામેલ થયા છે જેમાં સુનીલ ગાવસ્કર, કપિલ દેવ, બિશન સિંહ બેદી, વિનૂ માંકડ, અનિલ કુંબલે, સચિન તેંડુલકર, રાહુલ દ્રવિડ, વીરેન્દ્ર સહવાગ, ડાયના એડુલ્જી, નીતૂ ડેવિડ અને એમએસ ધોનીનો પહેલેથી સમાવેશ થાય છે. આ સન્માન ભારતીય ક્રિકેટની સમૃદ્ધ વારસા અને વૈશ્વિક સ્તરે તેના યોગદાનને પણ દર્શાવે છે.
સૌરવ ગાંગુલીએ 1992માં આંતરરાષ્ટ્રીય ક્રિકેટમાં पदार્પણ કર્યું હતું અને 2008 સુધી ભારતીય ટીમનું પ્રતિનિધિત્વ કર્યું હતું. પોતાના કારકિર્દી દરમિયાન તેમણે 113 ટેસ્ટ અને 311 એકદિવસીય આંતરરાષ્ટ્રીય મેચો રમી હતી. ટેસ્ટ ક્રિકેટમાં તેમણે 7,212 રન બનાવ્યા હતા, જેમાં અનેક મહત્વપૂર્ણ સદીનો સમાવેશ થાય છે. ઉપરાંત તેમણે બોલિંગમાં પણ યોગદાન આપીને 32 વિકેટ ઝડપી હતી.
વનડે ક્રિકેટમાં તેમના નામે 11,363 રન અને 100 વિકેટ નોંધાયેલા છે, જેના કારણે તેઓ ભારતના સફળ સર્વાંગી યોગદાન આપનાર ખેલાડીઓમાં સ્થાન મેળવે છે. ડાબોડી બેટ્સમેન તરીકે તેમની કવર ડ્રાઇવ અને દબાણની સ્થિતિમાં મોટી ઇનિંગ્સ રમવાની ક્ષમતાએ તેમને તેમના સમયના શ્રેષ્ઠ બેટ્સમેનોમાં સ્થાન અપાવ્યું.
સૌરવ ગાંગુલીનું સૌથી મોટું યોગદાન ભારતીય ક્રિકેટમાં નેતૃત્વના સ્તરે માનવામાં આવે છે. વર્ષ 2000માં ભારતીય ક્રિકેટ મુશ્કેલ સમયમાંથી પસાર થઈ રહ્યું હતું, ત્યારે ગાંગુલીએ યુવા ખેલાડીઓ પર વિશ્વાસ વ્યક્ત કરીને ટીમને નવી દિશા આપી હતી. તેમની કપ્તાની હેઠળ વીરેન્દ્ર સહવાગ, યુવરાજ સિંહ, હરભજન સિંહ, ઝહીર ખાન, ઇરફાન પઠાણ અને મહેન્દ્ર સિંહ ધોની સહિત અનેક ખેલાડીઓને આંતરરાષ્ટ્રીય સ્તરે પોતાની પ્રતિભા દર્શાવવાની તક મળી.
ગાંગુલીની કપ્તાનીમાં ભારતે વિદેશી ધરતી પર સ્પર્ધાત્મક પ્રદર્શન કરવાનું શરૂ કર્યું. વર્ષ 2003ના ICC પુરુષ ક્રિકેટ વિશ્વ કપમાં ભારતીય ટીમ તેમના નેતૃત્વ હેઠળ ફાઇનલ સુધી પહોંચી હતી. ક્રિકેટ નિષ્ણાતો આજે પણ તેમને આધુનિક ભારતીય ક્રિકેટની મજબૂત પાયાની સ્થાપના કરનાર કપ્તાનોમાં ગણે છે.
