દંબુલામાં રમાયેલી ટ્રાઈ વનડે શ્રેણીની મેચ બાદ ભારત એના વૈભવ સૂર્યવંશી અને શ્રીલંકા એના ખેલાડી વિશેન હાલામ્બાગે વચ્ચે થયેલી મેદાની અથડામણ ચર્ચાનું કેન્દ્ર બની છે. સુપર ઓવરમાં ભારત એની હાર બાદ બનેલી આ ઘટનાને લઈને હવે ICCના આચાર સંહિતા હેઠળ કાર્યવાહી શક્ય છે કે નહીં તે અંગે પ્રશ્નો ઉઠી રહ્યા છે.
દંબુલામાં રમાયેલી ટ્રાઈ વનડે શ્રેણીની મેચમાં ભારત એ અને શ્રીલંકા એ વચ્ચે કડક ટક્કર જોવા મળી હતી. નિર્ધારિત 50 ઓવરના અંતે બંને ટીમોનો સ્કોર સમાન રહ્યો હતો, જેના કારણે મેચનો નિર્ણય સુપર ઓવર દ્વારા કરવામાં આવ્યો હતો. સુપર ઓવરમાં શ્રીલંકા એએ જીત નોંધાવી હતી જ્યારે ભારત એને નજીકની હારનો સામનો કરવો પડ્યો હતો. મેચની સ્પર્ધાત્મક પરિસ્થિતિ અને અંતિમ ક્ષણોના દબાણને કારણે મેચ પૂર્ણ થયા બાદ ખેલાડીઓ વચ્ચે તણાવ જોવા મળ્યો હતો.
મેચ પૂર્ણ થયા બાદ ભારતના વૈભવ સૂર્યવંશી અને શ્રીલંકાના વિશેન હાલામ્બાગે વચ્ચે ઉગ્ર બોલાચાલી શરૂ થઈ હતી. થોડા જ ક્ષણોમાં આ વિવાદ શારીરિક સંપર્ક સુધી પહોંચ્યો હતો અને બંને ખેલાડીઓ વચ્ચે હળવી ધક્કામુક્કી જોવા મળી હતી. ઘટના વધુ ન વધે તે માટે શ્રીલંકા એના અનુભવી વિકેટકીપર નિરોશન ડિકવેલાએ વચ્ચે પડી બંને ખેલાડીઓને અલગ કર્યા હતા. સમગ્ર ઘટનાનો વિડિયો સોશિયલ મીડિયા પર ઝડપથી વાયરલ થયો છે, જેના કારણે ક્રિકેટ ચાહકો અને નિષ્ણાતોમાં આ મુદ્દે ચર્ચા તેજ બની છે.
ક્રિકેટમાં ખેલાડીઓના વર્તનને નિયંત્રિત કરવા માટે ICCએ વિગતવાર આચાર સંહિતા બનાવેલી છે. આ સંહિતાના કલમ 2.12 મુજબ કોઈ ખેલાડી, અમ્પાયર, મેચ અધિકારી, સપોર્ટ સ્ટાફ અથવા અન્ય કોઈ વ્યક્તિ સાથે અયોગ્ય શારીરિક સંપર્ક કરવો નિયમોનું ઉલ્લંઘન ગણાય છે.
નિયમ મુજબ ઇરાદાપૂર્વક ધક્કો મારવો, ખભો અથડાવવો, ટક્કર મારવી અથવા રમતની ભાવના વિરુદ્ધ ગણાય તેવું કોઈપણ શારીરિક વર્તન શિસ્તાત્મક કાર્યવાહીનું કારણ બની શકે છે. જોકે, કોઈપણ કેસમાં સજા નક્કી કરતા પહેલાં મેચ રેફરી ઘટનાની ગંભીરતા, ખેલાડીઓની મનશા અને પરિસ્થિતિઓનું મૂલ્યાંકન કરે છે.
જો મેચ રેફરીને લાગે કે ખેલાડીએ ICC આચાર સંહિતાનું ઉલ્લંઘન કર્યું છે, તો વિવિધ પ્રકારની કાર્યવાહી થઈ શકે છે. તેમાં સત્તાવાર ચેતવણી, મેચ ફી પર દંડ, ડિમેરિટ પોઇન્ટ્સ અથવા ગંભીર મામલાઓમાં સસ્પેન્શનનો સમાવેશ થઈ શકે છે.
જોકે, કોઈપણ ખેલાડીને દોષિત ગણતા પહેલાં ઘટનાની સંપૂર્ણ તપાસ કરવામાં આવે છે. વિડિયો ફૂટેજ, મેચ અધિકારીઓની રિપોર્ટ અને સંબંધિત ખેલાડીઓના નિવેદનો પણ નિર્ણય પ્રક્રિયાનો ભાગ બની શકે છે. તેથી વૈભવ સૂર્યવંશી સામે કડક સજા થશે કે માત્ર ચેતવણી સાથે મામલો પૂર્ણ થશે તે અંગે હાલ કોઈ નિશ્ચિત નિષ્કર્ષ પર પહોંચવું વહેલું ગણાશે.
