7 મેના રોજ WhatsApp Business એ ભારતમાં પોતાનો નવો Business AI એજન્ટ લોન્ચ કર્યો છે, જે ખાસ કરીને નાના અને મધ્યમ વ્યવસાયોની જરૂરિયાતોને ધ્યાનમાં રાખીને તૈયાર કરવામાં આવ્યો છે. કંપનીના જણાવ્યા મુજબ, આ ફીચર WhatsApp Business એપ મારફતે અનેક ભારતીય ભાષાઓમાં ઉપલબ્ધ રહેશે અને ગ્રાહક સપોર્ટ, લીડ મેનેજમેન્ટ તથા વેચાણ પ્રક્રિયાને સરળ બનાવવામાં મદદ કરશે.
આ AI એજન્ટ ગ્રાહકોના પ્રશ્નોના 24x7 ઓટોમેટિક જવાબ આપી શકશે. તેની મદદથી બિઝનેસ ઓનર્સ લીડ્સ કૅપ્ચર કરી શકશે, અપોઇન્ટમેન્ટ બુક કરી શકશે, પ્રોડક્ટ રેકમેન્ડેશન આપી શકશે અને સેલ્સ કન્વર્ઝન વધારી શકશે. આ ફીચર સ્થાનિક ભાષાઓને પણ સપોર્ટ કરે છે.
Business AI એજન્ટ સેટઅપ થયા પછી બિઝનેસની જૂની ચેટ્સ, પ્રોફાઇલ અને વેબસાઇટમાંથી માહિતી મેળવીને કામ કરશે. તેને WhatsApp કૅટલોગ અને Meta Commerce Manager મારફતે પણ ટ્રેન કરી શકાય છે, જેથી ગ્રાહકોને વધુ સચોટ અને પર્સનલાઇઝ્ડ જવાબ મળી શકે.
આ AI ગ્રાહકોને પ્રોડક્ટ્સ, કિંમતો, ઑફર્સ, ડિસ્કાઉન્ટ અને શિપિંગ સંબંધિત માહિતી આપવામાં મદદ કરશે. સાથે સાથે FAQ એટલે કે વારંવાર પૂછાતા પ્રશ્નોના જવાબ પણ ઓટોમેટિક રીતે આપશે.
Meta Indiaમાં બિઝનેસ મેસેજિંગના ડિરેક્ટર Ravi Garg ના જણાવ્યા અનુસાર કંપની છેલ્લા કેટલાક મહિનાઓથી પસંદગીના બિઝનેસ સાથે તેનો પાયલોટ ટેસ્ટ ચલાવી રહી હતી. ભારત ઉપરાંત આ ફીચર બ્રાઝિલ અને કમ્બોડિયા જેવા બજારોમાં પણ ઉપલબ્ધ છે.
કંપનીએ બિઝનેસ ઓનર્સને AI નિયંત્રણ માટે અનેક વિકલ્પો આપ્યા છે. ઓનર્સ નક્કી કરી શકશે કે AI માત્ર નવા ગ્રાહકો સાથે વાત કરે, જાહેરાતોથી આવેલા યુઝર્સને જવાબ આપે અથવા તમામ ગ્રાહકોને સંભાળે.
જો વાતચીત સંવેદનશીલ અથવા જટિલ બની જાય તો AI તેને સીધી રીતે બિઝનેસ ઓનર સુધી ટ્રાન્સફર પણ કરી શકશે. ગ્રાહકોને મોકલાતા મેસેજ પર “AI” લેબલ દર્શાવવામાં આવશે જેથી તેમને ખબર રહે કે જવાબ AI દ્વારા આપવામાં આવ્યો છે.
Meta એ સંકેત આપ્યો છે કે ટૂંક સમયમાં WhatsApp ચેટની અંદર UPI પેમેન્ટ સુવિધા પણ ઉમેરવામાં આવશે. ભવિષ્યમાં અન્ય પેમેન્ટ વિકલ્પો પણ સામેલ થઈ શકે છે.
પાયલોટ પ્રોગ્રામનો ભાગ રહેલી Gunveen Kaur એ જણાવ્યું કે AI એજન્ટની મદદથી તેમને દરરોજ 6 થી 7 ઓર્ડર સીધા ક્લોઝ કરવામાં મદદ મળી. તેમના જણાવ્યા મુજબ બિઝનેસની વેચાણમાં અંદાજે 40 ટકા સુધી વધારો નોંધાયો.
Metaના જણાવ્યા અનુસાર ભવિષ્યમાં ટેક્સ્ટ અને ઈમેજ ઉપરાંત વીડિયો જેવી AI ક્ષમતાઓ પણ આ પ્લેટફોર્મમાં ઉમેરવામાં આવશે, જેથી નાના વેપારીઓને ગ્રાહકો સાથે વધુ સારી રીતે જોડાવામાં મદદ મળી શકે.
