વોટ્સએપે Meta AI યુઝર્સ માટે નવા Incognito Chat ફીચરની જાહેરાત કરી છે, જેના માધ્યમથી યુઝર્સ AI આસિસ્ટન્ટ સાથે પ્રાઇવેટ અને ટેમ્પરરી વાતચીત કરી શકશે. કંપની મુજબ આ ફીચરમાં ચેટ હિસ્ટરી સેવ નહીં થાય અને વાતચીત પૂર્ણ થયા પછી મેસેજ આપમેળે ડિલીટ થઈ જશે.
વોટ્સએપે Meta AI સાથેની વાતચીતને વધુ સુરક્ષિત બનાવવા માટે Incognito Chat ફીચર રજૂ કર્યું છે. આ ફીચરની મદદથી યુઝર્સ AI આસિસ્ટન્ટ સાથે ટેમ્પરરી અને પ્રાઇવેટ ચેટ કરી શકશે. કંપનીએ જણાવ્યું છે કે આ વિકલ્પ ખાસ કરીને એવા લોકો માટે ઉપયોગી રહેશે, જેઓ હેલ્થ, ફાઇનાન્સ, ઓફિસ અથવા વ્યક્તિગત મુદ્દાઓ સંબંધિત પ્રશ્નો AIને પૂછવા માંગે છે પરંતુ ચેટ રેકોર્ડ સેવ રાખવા ઇચ્છતા નથી.
મેટા મુજબ, આ મોડમાં શરૂ થતી દરેક વાતચીત અલગ સેશન તરીકે કાર્ય કરશે. ચેટ પૂર્ણ થયા પછી મેસેજ આપમેળે દૂર થઈ જશે અને અગાઉની વાતચીતનો ડેટા આગળ ઉપયોગમાં લેવામાં આવશે નહીં.
કંપનીએ જણાવ્યું છે કે આ ફીચર તેની Private Processing ટેક્નોલોજી પર આધારિત છે. આ પ્રક્રિયા હેઠળ AI રિક્વેસ્ટ્સને સુરક્ષિત એન્વાયરમેન્ટમાં પ્રોસેસ કરવામાં આવે છે, જ્યાં વાતચીતનું કન્ટેન્ટ Meta અથવા WhatsApp સીધું ઍક્સેસ કરી શકશે નહીં.
મેટાના દાવા મુજબ, પ્રોસેસિંગ દરમિયાન યુઝર્સના મેસેજ એન્ક્રિપ્ટેડ રહેશે અને તેમની ઓળખ સાથે જોડાયેલી માહિતી, જેમ કે IP એડ્રેસ, પણ છુપાયેલી રહેશે. ઉપરાંત, સેશન પૂર્ણ થયા પછી વાતચીતનો કોઈ રેકોર્ડ સ્ટોર કરવામાં આવશે નહીં.
વોટ્સએપે જણાવ્યું છે કે Incognito Chat ફીચર સંપૂર્ણપણે ઓપ્શનલ રહેશે અને તેને આગામી કેટલાક મહિનાઓ દરમિયાન ધીમે ધીમે WhatsApp અને Meta AI એપ પર ઉપલબ્ધ કરવામાં આવશે.
કંપનીએ સાથે જ સંકેત આપ્યો છે કે તે “Side Chat” નામના નવા ફીચર પર પણ કામ કરી રહી છે. આ ફીચરનો હેતુ યુઝર્સને હાલની ચેટ વચ્ચે જ પ્રાઇવેટ AI સહાયતા આપવાનો છે, જેમાં ચેટ કન્ટેન્ટ એક્સપોઝ નહીં થાય. વોટ્સએપ મુજબ, આ નવા ફીચર્સ દ્વારા AI અનુભવમાં પણ તે જ પ્રાઇવસી-ફર્સ્ટ અભિગમ અપનાવવામાં આવી રહ્યો છે, જે પ્લેટફોર્મની એન્ડ-ટુ-એન્ડ એન્ક્રિપ્શન પોલિસીનો ભાગ રહ્યો છે.
