12 फेब्रुवारी 2026 रोजी झालेल्या 13व्या संसदीय निवडणुकीत बांग्लादेश नॅशनलिस्ट पार्टी (बीएनपी) ने विजय मिळवला असून पक्षाचे अध्यक्ष तारिक रहमान यांनी सरकार स्थापनेचा दावा केला आहे. या निकालानंतर 36 वर्षांनंतर देशात पुरुष पंतप्रधान होण्याचा मार्ग मोकळा झाला आहे.
तारिक रहमान यांचा जन्म 20 नोव्हेंबर 1965 रोजी ढाका येथे झाला. ते माजी पंतप्रधान खालिदा झिया आणि माजी राष्ट्रपती जिया-उर-रहमान यांचे सुपुत्र आहेत. जिया-उर-रहमान हे बीएनपीचे संस्थापक आणि माजी राष्ट्रपती होते, तर खालिदा झिया या तीन वेळा पंतप्रधान राहिल्या आहेत. त्यांचा दुसरा कार्यकाळ काही आठवड्यांचा होता, तर इतर दोन कार्यकाळ पूर्ण झाले.
1990च्या दशकात तारिक रहमान यांनी सक्रिय राजकारणात प्रवेश केला आणि 1991 मध्ये खालिदा झिया पंतप्रधान होण्यात त्यांनी भूमिका बजावली. त्यांच्या तिसऱ्या कार्यकाळात ते बीएनपीचे प्रभावी नेते म्हणून पुढे आले.
2001 मध्ये खालिदा झिया सत्तेत आल्यानंतर तारिक रहमान यांनी पक्षाच्या निर्णयप्रक्रियेत भूमिका बजावली. ढाका येथील ‘हवा भवन’ येथून पक्षाचे धोरणात्मक निर्णय घेतले जात असल्याचे म्हटले जात होते. या काळात त्यांच्यावर भ्रष्टाचार, लाचखोरी आणि सत्तेचा गैरवापर केल्याचे आरोप झाले. विरोधी अवामी लीगने त्यांना ‘डार्क प्रिन्स’ असे संबोधले.
2006-07 दरम्यान राजकीय अस्थिरता आणि भ्रष्टाचार प्रकरणांच्या पार्श्वभूमीवर लष्कर समर्थित अंतरिम सरकारने मोहीम राबवली. मार्च 2007 मध्ये तारिक रहमान यांना अटक करण्यात आली आणि त्यांच्याविरुद्ध 84 खटले दाखल करण्यात आले. या खटल्यांमध्ये मनी लॉन्डरिंग, घोटाळे आणि 2004 च्या ग्रेनेड हल्ल्याशी संबंधित आरोपांचा समावेश होता. बीएनपीने हे आरोप त्यांच्या प्रतिस्पर्धी शेख हसीना यांच्या कटाचा भाग असल्याचा दावा केला.
कारावासादरम्यान त्यांना शारीरिक अत्याचार सहन करावे लागल्याचा दावा करण्यात आला, ज्यामुळे त्यांच्या मणक्याला गंभीर इजा झाली. सप्टेंबर 2008 मध्ये जामिनावर सुटल्यानंतर त्यांनी पत्नी जुबैदा आणि मुलगी जैमा यांच्यासह लंडनमध्ये वास्तव्यास सुरुवात केली. त्यानंतर त्यांचा 17 वर्षांचा निर्वासित कालावधी सुरू झाला.
ऑगस्ट 2024 मध्ये शेख हसीना यांच्या विरोधात झालेल्या विद्यार्थी आंदोलनानंतर अवामी लीग सरकार सत्तेबाहेर गेले आणि देशात अंतरिम सरकार स्थापन झाले. या सरकारचे प्रमुख मुहम्मद युनूस होते. त्यांच्या कार्यकाळात तारिक रहमान यांच्याविरुद्ध दाखल सर्व खटले न्यायालयांनी रद्द केले.
डिसेंबर 2025 मध्ये त्यांनी लंडनहून बांग्लादेशात परतण्याची घोषणा केली. 25 डिसेंबर रोजी ढाका विमानतळावर त्यांच्या समर्थकांनी स्वागत केले.
परतल्यानंतर त्यांनी ढाका-17 आणि बोगरा-6 या मतदारसंघांतून निवडणूक लढवली आणि दोन्ही ठिकाणी विजय मिळवला. या विजयासह बीएनपीला सत्तास्थापनेसाठी आवश्यक बहुमताचा मार्ग खुला झाला. त्यांनी स्वच्छ राजकारण, भ्रष्टाचाराविरुद्ध शून्य सहनशीलता, युवकांसाठी रोजगार आणि लोकशाहीची पुनर्स्थापना हे उद्दिष्ट मांडले.
60 वर्षीय तारिक रहमान यांना त्यांच्या समर्थकांकडून ठाम आणि धोरणात्मक विचारांचे नेते म्हणून वर्णन केले जाते. त्यांच्या नेतृत्वाखाली बीएनपीने सत्तास्थापनेचा दावा केला आहे. त्यांच्या पंतप्रधानपदाच्या दाव्यामुळे 36 वर्षांनंतर पुरुष पंतप्रधान पदावर पुनरागमन नोंदवले गेले आहे.
