इंग्लंडच्या स्टार फलंदाज जो रूटने श्रीलंकेविरुद्ध खेळल्या गेलेल्या तिसऱ्या एकदिवसीय सामन्यात नाबाद 111 धावा करत ऐतिहासिक विक्रम नोंदवला. या शतकासह रूट टेस्ट आणि एकदिवसीय क्रिकेटमध्ये प्रत्येकी 20 शतके पूर्ण करणारा जगातील आठवा फलंदाज ठरला.
कोलंबोतील आर. प्रेमदासा स्टेडियमवर झालेल्या निर्णायक सामन्यात रूटने 108 चेंडूत नाबाद 111 धावा केल्या. हे त्याच्या एकदिवसीय कारकिर्दीतील 20वे शतक असून टेस्ट क्रिकेटमध्ये त्याच्या नावावर आधीच 41 शतके आहेत. या खेळीत रूटने एकदिवसीय क्रिकेटमधील 7,500 धावांचा टप्पाही पार केला.
या कामगिरीसह रूट त्या निवडक फलंदाजांच्या यादीत सामील झाला आहे ज्यांनी टेस्ट आणि एकदिवसीय या दोन्ही फॉरमॅटमध्ये 20 किंवा त्याहून अधिक शतके झळकावली आहेत. या यादीत सचिन तेंडुलकर (टेस्ट 51, एकदिवसीय 49), रिकी पॉन्टिंग (टेस्ट 41, एकदिवसीय 30), कुमार संगकारा (टेस्ट 38, एकदिवसीय 25), हाशिम आमला (टेस्ट 28, एकदिवसीय 27), एबी डिव्हिलियर्स (टेस्ट 22, एकदिवसीय 25), विराट कोहली (टेस्ट 30, एकदिवसीय 54), डेव्हिड वॉर्नर (टेस्ट 26, एकदिवसीय 22) आणि जो रूट (टेस्ट 41, एकदिवसीय 20) यांचा समावेश आहे.
तिसऱ्या एकदिवसीय सामन्यात इंग्लंडने प्रथम फलंदाजी करत 9 बाद 357 धावांचा स्कोर उभारला. कर्णधार हॅरी ब्रूकने 66 चेंडूत नाबाद 136 धावा केल्या, तर रूटने दुसऱ्या टोकाला शतक झळकावले. दोघांमधील भागीदारीमुळे इंग्लंडला मोठी आघाडी मिळाली.
357 धावांच्या लक्ष्याचा पाठलाग करताना श्रीलंकेचा संघ 46.4 षटकांत 304 धावांवर बाद झाला. इंग्लंडने हा सामना 53 धावांनी जिंकत तीन सामन्यांची मालिका 2-1 ने आपल्या नावावर केली. पहिला सामना श्रीलंकेने जिंकला होता, तर दुसऱ्या सामन्यात इंग्लंडने पाच गडी राखून विजय मिळवला होता.
