OpenAI ले आफ्नो पहिलो AI-केंद्रित स्मार्टफोन परियोजनामा काम तीव्र बनाएको बताइएको छ। TF International Securities का विश्लेषक Ming-Chi Kuo का अनुसार कम्पनीले यस डिभाइसको मास प्रोडक्सन 2027 सम्म पर्खनु नपरी आगामी वर्षको पहिलो छमाहीमै सुरु गर्न सक्ने सम्भावना रहेको छ। AI एजेन्ट फोन बजारमा बढ्दो प्रतिस्पर्धा र OpenAI को सम्भावित IPO लाई यस परियोजनाको समयरेखा तीव्र बनाउने कारकका रूपमा हेरिएको छ।
यसअघि कुओले OpenAI फोनको उत्पादन 2028 आसपास सुरु हुने दाबी गरेका थिए, तर पछिल्लो जानकारीले अपेक्षाभन्दा छिटो लन्चको संकेत दिएको छ। यद्यपि, OpenAI ले हालसम्म कुनै स्मार्टफोन परियोजनाबारे आधिकारिक पुष्टि गरेको छैन। त्यसैले हाल सार्वजनिक भएका विवरणहरूलाई लीक तथा सप्लाइ चेनमा आधारित जानकारीका रूपमा हेरिएको छ।
रिपोर्टअनुसार OpenAI को पहिलो स्मार्टफोन MediaTek को कस्टमाइज्ड Dimensity 9600 चिपसेटमा आधारित हुन सक्छ। उक्त प्रोसेसर TSMC को N2P प्रोसेसमा तयार गरिने बताइएको छ, जसलाई 2026 को दोस्रो छमाहीमा प्रस्तुत गर्न सकिने अपेक्षा गरिएको छ। यसले कम्पनीले डिभाइसलाई पूर्ण रूपमा AI-केंद्रित बनाउने तयारी गरिरहेको संकेत गर्दछ।
कुओका अनुसार यस चिपमा अपग्रेड गरिएको HDR पाइपलाइनसहितको नयाँ ISP समावेश हुन सक्छ, जसले क्यामेरा प्रोसेसिङ क्षमता सुधार गर्न मद्दत गर्नेछ। साथै, डुअल-NPU आर्किटेक्चर, LPDDR6 RAM र UFS 5.0 स्टोरेज जस्ता उच्चस्तरीय प्रविधि प्रयोग हुने सम्भावना पनि उल्लेख गरिएको छ। सुरक्षाका लागि pKVM र इनलाइन ह्यासिङजस्ता फिचर समावेश हुन सक्ने रिपोर्टमा उल्लेख गरिएको छ।
OpenAI ले स्मार्टफोन बजारमा प्रवेश गरेमा यसको प्रत्यक्ष प्रतिस्पर्धा Apple, Samsung Electronics र Google जस्ता कम्पनीसँग हुन सक्ने बताइएको छ, जसले हाल AI फिचरमा आफ्नो ध्यान बढाइरहेका छन्। AI एजेन्टमा आधारित स्मार्टफोनलाई भविष्यको महत्वपूर्ण टेक्नोलोजी श्रेणीका रूपमा हेरिएको छ, जहाँ प्रयोगकर्ता अन्तरक्रिया पारम्परिक एपभन्दा AI असिस्टेन्टमा बढी केन्द्रित हुन सक्छ।
विश्लेषकहरूको अनुमान अनुसार विकास प्रक्रिया तय योजना अनुसार अघि बढेमा 2027 देखि 2028 बीच OpenAI फोनको कुल शिपमेन्ट 3 करोड युनिटसम्म पुग्न सक्छ। यद्यपि, कम्पनीको आधिकारिक घोषणा नआएसम्म यी दाबीहरूलाई पूर्ण रूपमा पुष्टि गरिएको मानिएको छैन।
